¹ Anyo ayiji irari Ayudetanani? Anyo bwo fe ayiji iŋotori? ² Oyyu bebe irari Ayudetanani bwo fe iŋotori. Ahosyere isyo nya Hollum ekyanita honyi jyo laati Yudea. ³ Buo alla abeŋi omuk hulosi ogottierek asayyo Hollum hunia; itahutak ati inyi jio, obeŋ adi Hollum ogottiere ekenita honyi? ⁴ Obeŋ 'tuŋ! Duadi bu ogesemi aati 'daŋ, arasa Hollum ikiana ahode hode, ihuo igioroni ibuk Honyi jio; “Ijiara luŋa ekiana hoi itahutak abisan hoi. Elle itiwwahie iyye, ijiara luŋa omijani jio ibis iyye.” ⁵ Ejio adi anyio elle itahutani epalita hohoi jio obisi ehanita Hollum? Eremik ti jiaran jio, ipal Hollum elle ettigemio inyi hohoi? (Ekiana ni jihatai ihuo atulo.) ⁶ Obeŋ 'tuŋ! Alla abeŋ duo aŋocio Hollum obis, oremik duo inyi aŋai iŋot eram waati 'daŋ? ⁷ Ati kuyya ta agesemita hoŋ oleyo nelahode ono Hollum iko akwatan honyi, nyo oŋot inyi eyyau jihoŋ? ⁸ Hafatta iyyautari oŋida ayiji oleyo. Ihwa ojori laati ettiyenio ni, ati ogesemi isi. Orrohoji hul ikyanai’to ihwania. ⁹ Anyo attadi? Eyyu hohoi Yudea egalik paganohyen? Obeŋ ’tuŋ. Ihwa etahutak dwo ni jo, arai laati daŋ apiti jyo eyyau, laati hutto Yudea iko hutto Grik. ¹⁰ 10 Ihwa igyoroni jo, “Obeŋ obo ol olibo ’tuŋ, dwadi abotye. ¹¹ Obeŋ obo ol itaniŋu. Obeŋ obo ol ottifya Hollum. ¹² Isyabarai isi daŋ addi jyo Hollum Ette fwanna ’rohoji. Obeŋ obo ol ihanio on oyyu, dwadi abotye. ¹³ Arai ogolohi hosi ihwa elumyo hun obwarai’to. Ta aŋadyefa hosi ikyanai isi erre huno enyobyo. Arai ekyanita hosi ihwa eyyeri muno to hutuhe hosi. ¹⁴ Ifuti etuhe hosi iko epitita iko aŋuŋusya. ¹⁵ Awahi ejek hosi afwatan irryomoniere iko aati. ¹⁶ Owon etatturyo iko ejiriŋa ikota hosi. ¹⁷ Bwo obeŋi isi omijani ekoi ono nelik tajya''. ¹⁸ ''Bwo obeŋi isi abaŋi Hollum ta atajya hosi.” ¹⁹ Emijak hohoi jo erre daŋ hun igyoroni ifahita arai isi ta aati hul ifwotuni efahita, jo oŋida obeŋ obo elyat jyo obo atulo ati ofwoi aati daŋ jyo aŋoco ono Hollum. ²⁰ Nyo obeŋi adi italibori obo atulo to hoŋite Hollum te ejifatyo honyi efahita, nyo te efahita omijani isi neyyau. Attuna Libori ta Neruk ²¹ Ati ihwania egonyu hohoi aŋai itimoru Hollum laati jihonyi, obyaŋara te efahita. Nyo igyoroni nya efahita iko eyak sayyo - ²² ta alibori on ottu’to jyo Hollum ta neruk jyo Yesu Kristo. Isyori ana jyo eruhok daŋ nyo obeŋ alufaji. ²³ Nyo iyyauni aati daŋ ette ilak fanyan ihosyere Hollum. ²⁴ Ati italibo Hollum isi asai ta amehino honyi ta ahohina ono Yesu Kristo eyyata. ²⁵ Nyo isyo nya Hollum inyi irari ehumi itimwaraniere laati ta neruk jyo naye honyi. Ihanio Hollum ihwania itahutaniere alibori honyi, nyo odihu nya inyi laati ta abyaŋan honyi igigilo te eyyata hunya beryen. ²⁶ Ati to oŋitek huna itahutak inyi jo ara inyi Hollum ol omijak aŋoco bwo fe italibo aati daŋ hul iruhi’to jyo Yesu. ²⁷ Tania owon etadara hohoi aja? Obeŋ bu inyi. Aŋai obeŋ etadara? Ilak alibori ottu te efaha efahita? Obeŋ, ottu inyi ta neruk hohoi. ²⁸ Nyo ejo hohoi jo itimwarani atulo te eyihina honyi, obyaŋara te efaha honyi efahita. ²⁹ Ara Hollum Hobu olo Yudea hama? Ilak ara inyi bwo fe Hollum olo paganohyen? Afe, ara inyi olo paganohyen bwo fe. ³⁰ Nyo owon Hollum abotye bwo itimwarak adi inyi laati Yudea iko paganohyen daŋ ta neruk hosi hama. ³¹ 31 Tania etapwak hohoi efahita ta neruk? Obeŋ ’tun. Ati etagol hohoi efahita.