¹ Ekyana dwo ni nerre huna jo oŋida ibyaŋata tai ipalata addi. ² Ifuhari adi isi itai to hasik imojiti bwo teyya ette noloŋ ’tuna an igigilorik lattok hatai jo egyama isi jyo Hollum. ³ Ihanie adi isi jihatai ihwania, nyo obeŋi isi omijani Monye, obeŋi bu omijani nani. ⁴ Hodwo hirre ekyana ni jihatai oŋida al attu noloŋ hosi igiluna tai jo eramak nya ni jihatai. Abeŋ nya ni ekyana erre huna jihatai ahosyere nyo awon nya ni ikatai. ⁵ Ihwania alo ni jyo lya al ifahu’to nani, obeŋ ati lobo alatai ifiyo nani jo, Aja ilo iye? ⁶ Bwo fe ijiriŋati tai bebe nyo ekyana ni jihatai neram ana. ⁷ Ati eramak ni itai ahode, oyyu jihatai luŋa jo oŋida ani alo addi. Al abeŋ ni alo, obeŋ adi Etalwahani ottu jihatai. Al alo ni efahu adi ni inyi jihatai. ⁸ Al attu inyi ituruk adi inyi laati ta neram ono neyyauna, iko ono nalibori ojo bwo fe naŋoco hiram. ⁹ Ituruk inyi isi te eram ono neyyauna nyo obeŋi nya isi iruhi nani; ¹⁰ te neram ono nalibori nyo alo ni jyo Monye, ittata byaŋan igonyuna nani; ¹¹ ta aŋoco hiram nyo laŋoti neram ono hobu olo afau ana. ¹² Holwaji nerre hun awak ni ikyana jihatai ati ittallihoto tai itaniŋuna isi ahana. ¹³ Ati al attu Oloyiri alya olo nelahode, ittiyenio adi inyi itai nerre daŋ hun arai ahode, nyo obeŋ adi inyi ikyana ta ahwan honyi hama, ati ikyana adi inyi jihatai nerre hun itayiru inyi bwo fe iramak adi inyi jihatai nerre hun ofwonni adi lihalu. ¹⁴ Itahuyo adi inyi ani nyo omoju adi inyi nekyanita hoŋ ette iramana jihatai. ¹⁵ Erre daŋ hun owoni jyo Monyoŋ arai ahunoŋ. Tania ajo ni jo iyaro adi inyi hunoŋ ette itahutana jihatai. ¹⁶ Harasa kai ittata byaŋan igonyuna nani. Ojo gaa, ittata igonyuna ani. ¹⁷ Tania ikikyanai omuk leyiyanak honyi ojori, Anyo hiram an ikyana inyi ojo, Harasa kai ittata byaŋan igonyuna nani, ojo gaa, ittata igonyuna nani, bwo fe alo ni jyo Monye? ¹⁸ Arasai isi ittittifa anyo nekyana ana an ikyana inyi ojo, Gaa. Ebeŋ hohoi etaniŋu neram an ikyana inyi. ¹⁹ Omijak ati Yesu jo, awahi isi ifiyo neram jihonyi, ette inyi jaran jihosi ojo, Herasati tai ittittifa awoyo ono ekyana hoŋ jo, Harasa kai ittata byaŋan igonyuna nani, ojo gaa, ittata igonyuna nani? ²⁰ Ahode ahode ajo ni jihatai, Iyyoti adi itai bwo fe iyihitati, ati laati asai omunoi adi. Ijiriŋati adi itai, ati ottu adi nejiriŋa hatai rahan amuno. ²¹ Iburaŋatyo aŋotte nyo attu asaa honyi an isyori inyi eito ati al isiu inyi ogworo inyi adyaha ta amuno nyo isiu inyi eito ifau. ²² Ati ihwania ijiriŋati tai, ati attu adi ni itai mijo attati atajya hatai muno, bwo obeŋ obo atulo ohororo amuno hatai jihatai. ²³ Ati jyo oloŋ ania ibyaŋata adi itai ifiyete ani omuk erre. Eramak ni itai ahode ahode erre daŋ hun ifiyete tai jyo Monyoŋ ta afure hoŋ isyo adi inyi jihatai. ²⁴ Many iko ahana ibyaŋata tai ifiyete obo ariŋ ta afure hoŋ. Ifiyete bwo isyori adi jihatai jo oŋida amuno hatai ifut. ²⁵ Hodwo hirre ekyana ni jihatai ta narryamara. Ottu ati noloŋ an abyaŋari adi ni enyyak ikyanari jihatai ta narryamara, ati ekyana adi ni ahode nerre Monyoŋ. ²⁶ To oloŋ ania ifiyete adi itai erre ta afure hoŋ, ati abeŋ ni ajo jihatai jo amojo adi ni jyo Monyoŋ tetai. ²⁷ Nyo omuno bu Monyoŋ itai, nyo itai imunoti nani bwo fe iruhoto tai jo adyetuno ni jyo Monyoŋ. ²⁸ Adyetuno nya ni jyo Monyoŋ ette ’tuna lifau, ati edyaharo adi ni afau ette caharu jyo Monyoŋ. ²⁹ Ojori leyiyanak jihonyi jo, Ikeja, ikyana iye ihwania ekyana on oleyo, obyaŋara ta arryamara. ³⁰ Ihwania emijak hohoi jo imijak iye erre daŋ, ati ibeŋ iye ittifya obo atulo ifiyere iye to omuk erre. Tania eruk hohoi jo idyetuno iye jyo Hollum. ³¹ Ojo Yesu, Iruhoto tai ihwania? ³² Imijyete, ihuhutu asaa, ilyaha ihwania an itisarrahini adi itai ababo ihasik hatai, ittata tai ani idyaharo hama. Ati abeŋ adi ni etoŋo abotye nyo awon ni iko Monye. ³³ Ajo ni jihatai erre huna jo iwanata adi itai iko nelik tajya toni. Lifau ana inyurana adi itai ettigemyo, ati itagoloto atajya hatai nyo agalik ni erre hutta fau.