¹ Ani ajalaŋi ahode bwo Monyoŋ ahedulani ajalaŋi. ² Isisalutta inyi atanata hoŋ omuk hun obeŋi’to oŋiji bwo oŋututta inyi atanata daŋ hun oŋiji’to jo oŋida inyyahi ŋijuna arryai. ³ Ihwania iliboroto tai te ekyana en ekyana ni jihatai. ⁴ Ogolihina jihoŋ bwo fe ni agolik jihatai. Ihwa obeŋ atanati ajalaŋi oremik ŋijuna aŋer honyi hama bwo obeŋ iryata ilajalaŋi obeŋ obo alatai oremik ŋijuna aŋer many igolihiniete tai jihoŋ. ⁵ Ani ajalaŋi, bwo itai atanata. Ol ogolik’to jihoŋ bwo ni jihonyi oŋiju inyi aŋer arryai. Nyo al ilamajata tai jihoŋ ibyaŋata tai iremehina ihanio obo ariŋ. ⁶ Al obeŋ obo ogolik jihoŋ irwoŋoro inyi alet ihwa atanati iyohojori. Atanata hunia aharanyuni isi ette irwoŋonia ihima iswahiniere. ⁷ Al igolihina tai jihoŋ bwo ekyanita hoŋ ogolihini jihatai, ifiyete anyo iwahata tai bwo inyurana adi itai. ⁸ Ta aŋijuna haŋer iko aratan aheyiyanak hoŋ itahabuyete tai Monyoŋ. ⁹ Ihwa omuno Monyoŋ ani bwo fe amuno ni itai, ogolihina limuno hoŋ. ¹⁰ Al igotyete tai efahita hoŋ igolihina adi itai imuno hoŋ ihwa en efahari ni efahita Monyoŋ bwo fe agolik ni imuno honyi. ¹¹ Eramak ni itai erre huna jo oŋida amuno hoŋ arasa jihatai bwo fe oŋida amuno hatai ifut. ¹² Efahi hoŋ ana, omunoti illarak hatai ihwa an amunori ni itai. ¹³ Obeŋ obo atulo oremik itahutana amuno agalik ana jo oye inyi imaji illarak honyi. ¹⁴ Itai illarak hoŋ al ihaniete tai ariŋ en efak ni itai. ¹⁵ Abeŋ adi ni eloŋo itai apiti nyo obeŋ apit omijak anyo ihanio eleittok honyi ati eloŋo ni itai illarak nyo etahutak ni jihatai erre daŋ hunya ettiyenu ni jyo Monyoŋ. ¹⁶ Ibyaŋata tai inyimuna ani ati anyimu ni itai ette ifahina itai jo oŋida ifwatta tai ŋijuna aŋer. Bwo fe oŋida aŋer hatai arasahinie bwo fe te erre daŋ hun ifiyete tai jyo Monyoŋ ta afure hoŋ isyo adi inyi jihatai. ¹⁷ Efahi hoŋ ana, omunoti illarak hatai. ¹⁸ Al oliwarik omuk aati itai ogiluna jo oliwarik isi ani ahosyere. ¹⁹ Irata dwo itai ahulo afau ana omunoi dwo aati hulo itai ihwa illarak hosi, ati ibyaŋata tai irata hulo afau ana nyo anyimu ni itai jyo afau ana, inyi on oliwarik aati itai. ²⁰ Ogotyete erre hun eramak ni itai, obeŋ lapit agalik eleittok honyi. Al ittigemye isi ani ittigemye adi bwo fe isi itai. Kuyya ogotyerek isi ekyana hoŋ, ogotyerek adi bwo fe isi nekyana hatai. ²¹ Ihanie adi isi erre hunia daŋ jihatai ta afure hoŋ nyo obeŋi isi omijani lya al ifahu’to ani. ²² Hara dwo abeŋ ni attu ikyana jihosi obeŋi dwo oŋoti eyyata jihosi. Ati ihwania obeŋi elyeti jihosi te eyyata hosi. ²³ Ol oliwari’to ani oliwari inyi Monyoŋ bwo fe. ²⁴ Hara dwo abeŋ ni ehanio egyamita hun hobeŋ tulo igyama ihiji hosi obeŋi dwo oŋoti eyyata hosi. Ati ihwania igonyuni isi, bwo fe oliwarik ani iko Monyoŋ. ²⁵ Ihwania itasiruni ekyana ninya igyoroni ifahita hosi ojo, “Oswarik isi ani oboijai.” ²⁶ Ottu adi Etalwahani, inyi Oloyiri olo nelahode ol odetuno’to jyo Monye. Efak adi ni inyi jihatai bwo inyi ahetamijanani hoŋ. ²⁷ Bwo fe irata adi itai etamijanak hoŋ nyo ewon nya itai ikoŋ many t’etteri.