¹ Jyo ecorit etteri owoni efahita hun omojorik aati iko amaji on odwa’to. ² Nyo ihuhumani nya amusyama ihwa aji, bwo jyo amaji ottohosyere owon allomo iko ateremeja an ihanatarik emune on odwa’to. Ifurani amaji ana amaji on odwa’to. ³ Ihosyere boŋo etarrihi owon amaji obo an ifurani amaji on odwa’to bebe. ⁴ Imaji ana owon etityek ono ottogoŋ on orrohini ta ayyel bwo fe owon asenuk ono ecorit on orrohini bwo fe ta ayyel. Itwa senuk owon atobok on orrohini ta nayyel bwo owon manap itwa honyi. Owon bwo fe elluk ono Arone on oyis’to iko efahita hun ikyafani imorwoi itwa senuk. ⁵ Ihide senuk owoni anjelohyen hulo akwatan hul imuhoni etoŋi ottohide senuk an ifurani amaji ono amehino, ati obeŋ asaa ihwania ikyanari tesi daŋ ababo. ⁶ Oŋidari erre hunia, tania odulori ehumak jiŋita jyo amaji ottohosyere igyamari egyama hosi. ⁷ Ati jyo amaji etarrihi ojiŋak ehumani ol obolo’to hama enyyahi abotye te eŋa abotye. Obeŋ inyi ojiŋak ta ahas ijai ati iyaro inyi nooto an isyo inyi te eyyata honyi iko te eyyata wati. ⁸ Tania itahutak Oloyiri ol Olibo jihohoi jo, obeŋ amaji on odwa’to bebe aŋa inya howotya amusyama etteri. ⁹ Nyo ara inyi arrijori ono oŋitek hunia. Nyo ittallihi esyorita iko ehumita hunya isyori laati italibo atajya hya hul iyaŋunie’to isi. ¹⁰ Nyo arai efahita huna ta ahwan tulo hama, ihwa aŋiyo bwo amata ojo ellilla. Isyarani efahita hunia jihohoi many ottuniere Kristo. ¹¹ Ati oleyo Kristo ihwa ehumani ol obolo’to olo erre hun oyiji’to hun ofwonni adi. Ojiŋak inyi ihaji on obolo’to on obeŋi oduhoni ta ahas an agalik aji ninya nyo obeŋ inyi ara ono afau ana. ¹² Ojiŋak inyi enyyahi abotye imaji on odwa’to bebe. Obeŋ inyi iyaro nooto ono nedye kuyya bu ono atawa, ati ojiŋak inyi iko nooto honyi itasiruniere etalahuna hohoi. ¹³ Nyo kuyya oremik arwasyo ono nooto hidye kuyya ono esuŋ kuyya bu enwara ono atawo italiboryere atulo, ¹⁴ oyyu nooto ono Kristo agalik italiboryere atajya hatai t’egyamita hun ofyahaji’to igyamari jyo Hollum al isu’to. Nyo to Oloyiri al isu’to tulaŋ isyo nya Kristo ahwan honyi ol obeŋ iko eyyau jyo Hollum. ¹⁵ Te eram ania ara inyi etimwarani olo ecorit aŋejuk jo oŋida laati hul iloŋuni ifwotuni orutat hun odulori’to fur hunya ocoroni jihosi. Ifwotuni isi orutat nyo ta naye honyi italahu inyi isi t’eyyata hunya ihanie isi hamanyai isi te ecorit etteri. ¹⁶ Al igyoroni awaraga ono orutat, ittallihi isi rutana erre honyi hobeŋ lamonye oye. ¹⁷ Nyo oyyu awaraga ono orutat al aye lamonye; obeŋ inyi igyama hesu lamonye al igyoro’to inyi. ¹⁸ Bwo fe tania obeŋ nya ecorit etteri igyama hobeŋ nooto owouno. ¹⁹ Nyo ninya iramak Mose efahita daŋ jyo laati daŋ, iduhu inyi nooto ono atawa bwo fe ono nedye iko aari, bwo iduhu inyi aboŋo on odo’to iko atanata ’yanio ette sabulonia ihoto ette rwasyere abuk ono efahita bwo fe laati daŋ. ²⁰ Ette inyi jaran, “Ara ana nooto ono ecorit an isyo Hollum jihatai.” ²¹ Ihwo nya orwas inyi aji iko asahani daŋ huttotwa haji ta nooto. ²² Ahode ihwa ojori efahita italibori erre daŋ ta nooto bwo fe kuyya obeŋ nooto owouno obeŋ bwo fe abusana ono eyyata. ²³ Oŋida italibori erre hun arai’to arrijorihyen huno erre hutte dou ihwo nya, ati oŋida italibori erre hutte dou te ehumita hun oyiji’to agalihini hunia. ²⁴ Obeŋ nya Kristo ojiŋak imaji on odwa’to on oduhoni laati an ara’to arrijori ono erre hutte dou, ati ojiŋak inyi idou luŋa iwotyari ihosyere Hollum tohohoi. ²⁵ Obeŋ nya inyi ojiŋak dia isyoryere ahwan honyi gagaga, ihwa ojiŋata ehumani ol obolo’to imaji on odwa’to bebe aŋasi daŋ iko nooto on obyaŋara ononyi. ²⁶ Kuyya ara dwo ihwo nya oŋida nya Kristo odihu ettigemita gagaga many t’etteri fau; ati ihwania te esidi fau ottu inyi enyyahi abotye iyari eyyata addi ta naye honyi. ²⁷ Ihwa isyo nya Hollum jyo laati iyeri enyyahi abotye, bwo ihalu ania owon aŋoco, ²⁸ isyori bwo fe Kristo enyyahi abotye idihuniere eyyata wati arryai; bwo fe ottu adi inyi enyyahi etarrihi, obyaŋara te eram ono eyyata, ati italahuniere hul itilai’to inyi.