¹ Arai efahita arrijori ono erre hun oyiji’to hun ofwonni adi, ati obyaŋara isi erre hunia luŋa, tania ittallihi isi itabisana laati hul ofwonni’to te ehumita hun odulori isi isyoryo aŋasi daŋ. ² Kuyya itabisani dwo isi aati opwahi dwo isi esyoryo ehumita. Nyo kuyya italibori ehumita laati hul isyorye’to, obeŋi dwo isi inyyahi igigilo te eyyata hosi. ³ Ati te ehumita hosi igigiloi isi aŋasi daŋ te eyyata hosi. ⁴ Nyo obeŋ nooto ono esuŋ kuyya bu ono nedye oremehini iyara eyyata addi. ⁵ Tania ninya attu Kristo ifau ojo inyi jo, “Ibeŋ iye iwak esyorita iko ehumita, Ati ihuhumak iye ahwan toni. ⁶ Ibeŋ bwo fe iye imuno ehumita hun oswahini iko huno eyyata. ⁷ Ette ni jaran, Ahode Hollum, attu ni ihaniere awahan hoi, Ihwa igyoroni nya ibuk hoi toni.” ⁸ Ahosyere ojo inyi jo, Ibeŋ iye imuno esyorita iko ehumita, ibeŋ bwo fe iwak ehumita hun oswahini iko huno eyyata hun isyori ihwa igyoroni ifahita. ⁹ Ihalu ojo inyi jo, Ahode attu ni ihaniere awahan hoi. Tania itapwak inyi ecorit etabotye jo oŋida inyi itagol etarrihi. ¹⁰ Ta awahan ono Hollum enyurak hohoi alibori nyo isyo Yesu Kristo ahwan honyi enyyahi abotye ta laati daŋ. ¹¹ Oŋitek daŋ owotyai ehumak isyoryere ehumita hosi gagaga ati obeŋi ehumita hunia oremehini iyara eyyata wati addi. ¹² Ati isyo nya Kristo ehumi abotye on odulo’to fur te eyyata, ette inyi itoŋo oŋyatai ono Hollum, ¹³ itilari many ihananierek amyorok honyi ihwa ebalori hejek honyi. ¹⁴ Te ehumi abotye italibo inyi onyimot honyi tulaŋ. ¹⁵ Bwo fe ara Oloyiri ol Olibo ahetamijanani hohoi ette inyi jaran, ¹⁶ “Ojo Hobu, ara ana ecorit An esyo adi ni jihosi ihalu oŋitek hwa. Ehanak adi ni efahita hoŋ itajya hosi Bwo fe egyorok adi ni isi igigilita hosi.” ¹⁷ Ojo inyi bwo fe, “Abeŋ adi ni enyyak giluna eyyata hosi iko arrohojita hosi.” ¹⁸ Tania al owon abusana, obeŋ tulo inyyak isyarana ehumi te eyyata. ¹⁹ Tania illarak hoŋ, ewon hohoi iko eŋere ijiŋaniere imaji on odwa’to bebe to nooto ono Yesu, ²⁰ te ekoi aŋejuk, an isu’to, an aŋa inyi jihohoi ijiŋaniere. Ejiŋa hohoi aboŋo an agwasa’to an ara’to ihwa ahwan honyi. ²¹ Ewon hohoi iko ehumani ol obolo’to bebe al ilettohori aati Hollum. ²² Tania hehutonia onyihai ta atajya hun obisi, hun ifuti iko neruk, bwo fe hun illillauni t’ewahiti hun orrohoji’to, bwo fe hehutonia iko ahwattek hun illillauni ta aari hun olibori’to. ²³ Hagolihina jyo neyihina hohoi ta abyaŋan ikuyya, nyo obeŋ lya al ocorok’to erre hunia itapwak ecoriti honyi. ²⁴ Bwo fe ijara hohoi egigilo ta illarak hohoi itawuloyere isi homunohi illarak hosi bwo fe igyamari on oyyu. ²⁵ Bwo fe oŋida hohoi ebeŋ etapwak attubyo hwattek hohoi ihwa ihanie laati omuk, ati hesiŋyete illarak hohoi an agalik nyo igonyuna tai oloŋ ono Kristo ilyaha. ²⁶ Kuyya ifwotu atulo nelahode bwo ihalu odulo inyi iyyauta bwo omuno inyi eyyata, obeŋ obo ehumi ’tuŋ on oremik ifufusoro eyyata hunia. ²⁷ Ati onyurak adi inyi aŋoco on orroho bebe bwo fe eema on owulo’to bebe an itattur adi amyorok hulo Hollum. ²⁸ Ottohori nya atulo ta abyaŋan mehino al iha’to efahita huno Mose al ikyanai etamijanak arrihai kuyya bu hunihoi. ²⁹ Ati osiru adi aŋoco on obolo bebe agalik jyo lya al iha’to Lonyi Hollum, al omyana inyi nooto ono ecorit an italibo’to inyi, bwo fe omoryo Oloyiri olo amehino. ³⁰ Nyo emijak hohoi lya linya ojo’to jo, “Enienu adi ni bwo fe aduma adi ni.” Ojo inyi bwo fe jo, “Oŋot adi Hobu laati honyi.” ³¹ Ahode ikwahiniere ihas Hollum leswoni ara eram ono abaŋi bebe. ³² Ati ogilutati oŋitek hun allaŋi’to nyo ninya liruhoto tai idihuna tai ettigemita hun ogoli’to. ³³ To omuk oŋitek osuhotyerek nya aati itai te emoriti iko ebahiti, bwo to omuk oŋitek itoŋoti nya itai arabotye iko aati hul onyurani’to ettigemita. ³⁴ Nyo imehiniete nya itai jyo hya hul ifitani ibabus, bwo fe imunoti nya itai ninya iyarai laati asaŋ hatai addi, nyo imijana tai jo owoni erre hun oyiji’to agalihini bwo fe odulori isi jihatai fur. ³⁵ Tania herwasana neyihina hatai addi nyo inyurana adi itai aduma on obolo’to. ³⁶ Oŋida owon adihan tajya jihatai jo al ihaniete tai awahan Hollum inyurana adi itai ecoriti. ³⁷ Nyo ojori egyerita jo, “Ihalu kai afany adi lya ol ottu’to, Bwo obeŋ adi inyi illiŋya. ³⁸ Ati amanya adi legyamani hoŋ ol olibo’to ta neruk Ati al oyito inyi abeŋ adi ni amuno inyi.” ³⁹ Ebeŋ hohoi era ihwo hya hul oyitoroi’to ette ye, ati ewon hohoi iko neruk italahuniere oloyirihyen hohoi.