¹ Omunoti illarak hatai fur. ² Olwahyete atamonok al ofwonni isi jihatai, nyo al ihanie omuk ihwo nya olwahye isi anjelohyen dwadi obeŋi isi omijani isi. ³ Olwahyete hya hul ifitani ibabus ihwa iwanata tai ibabus ikosi, olwahyete hya hul owoni’to iko ettigemyo nyo iwanata tai bwo fe iko ahwattek ihwo hunosi. ⁴ Ijara itagoli eram yama tohosyere wati daŋ, bwo fe hehaniete erre somon nyo oŋot adi Hollum arotok iko asomok. ⁵ Hefitana atajya hatai ta amuno gurusi. Itoŋoti iko nelik tajya iko asaŋ hun owoni’to jihatai, nyo ojo Hollum ta ahwan honyi jo, “Abeŋ adi ni edehi itai ’tuŋ bwo fe abeŋ adi ni abusak itai ahode ’tuŋ.” ⁶ Tania eremik hohoi daŋ ababo ikyana te eŋere ojo, “Ara Hobu ahalwahani hoŋ, Abeŋ adi ni abaŋ. Anyo adi ihanie laati jihoŋ?” ⁷ Ogiluna hul arai’to eleittaha hatai, hul ittiyenie jihatai eram Hollum. Omijyete amanya hosi bwo ijifatyete neruk hosi. ⁸ Orrijo Yesu Kristo ahana ihwa ŋoloŋole bwo odulo adi inyi ihwo nya tulaŋ. ⁹ Hepalata addi jyo nettiyenita arryai hun olufaji’to nyo ara amehino ono Hollum an itagol’to atajya, obyaŋara aŋiryasin nyo obeŋi isi olwahye laati hul oŋiye’to. ¹⁰ Ewon hohoi iko etityek bwo fe hulya hul ijifatye’to efahita hunya beryen obeŋi isi oremehini ŋiyo dia. ¹¹ Nyo iyaŋuno nya ehumani ol obolo’to nooto ono anyanya imaji on odwa’to isyoryere te eyyata wati ette iswahina ahwattek hanyanya iler miji. ¹² Tania odihu nya Yesu adyaha to ler miji italiboryere laati ta nooto honyi. ¹³ Tania ijara hohoi efwo jihonyi iler miji idihuniere ettigemita ta afure honyi. ¹⁴ Nyo obeŋ obo amiji jihohoi on odulo’to jyo afau ana, ati etila hohoi amiji ono hottu’to. ¹⁵ Tenyi ijara hohoi edulo isyoryere ahumo jyo Hollum ihwa ehumita, isi nekyanita hutto hutuhe hohoi hun itahabuye’to afure honyi. ¹⁶ Hepwahata ihaniere ayiji iko ilwahyere alocaŋak, nyo ehanita ihwa huna itamunoi Hollum. ¹⁷ Ifahati hul arai’to eleittaha hatai bwo fe oniŋyete isi nyo irrirryai isi atajya hatai bwo ofwonni adi isi moi ilyeco ehanita hosi. Tania oniŋyete isi jo oŋida isi igyamai egyama hosi ta namuno, obyaŋara te ejiriŋa, nyo obeŋ adi ania iyauno ayiji jihatai. ¹⁸ Oduloro mojo tohohoi nyo emijak hohoi jo oyiji atajya hohoi bwo fe ewak hohoi manya on oyyu te erre daŋ. ¹⁹ Elolya ni jihatai bebe imojori toni, jo oŋida ani acohuno jihatai kokwak. ²⁰ Ihwania ijara Hollum olo nelik taji igyama itajya hatai nyo itubuhu nya inyi Hobu hohoi Yesu to ye, inyi leyyahani eleittok olo akyoro ta nooto ono ecorit on odulo’to fur. ²¹ Ijara inyi isyo jihatai erre daŋ ihaniere awahan honyi, bwo fe ijara inyi igyama ihwattek hatai erre hun itamunoye’to inyi to Yesu Kristo. Ijara akwatan hatawana jihonyi fur. Amen. ²² Illarak hoŋ elolya ni jihatai jo odihuna nesiŋita hun egyoro ni jihatai ta awaraga on osuk’to ana. ²³ Omijana jo ahohino illa hohoi Timoteo to babus. Kuyya alattu inyi kwak efwo adi hohoi ikonyi imijyere itai. ²⁴ Itifonyana eleittaha hatai daŋ iko aati Hollum daŋ. Itifonyai laati hutta fau Italya itai. ²⁵ Ijara amehino hatawana jihatai daŋ. Isi hunia.