¹ Tania ihwa ikoloni etamijanak arryai hohoi, ijara hohoi ebusak erre hun odiŋi’to iko eyyata hun iniafatye’to hohoi ’tid, bwo fe ijara hohoi eŋettyo ta adihan tajya te ekoi on owon’to jihohoi. ² Ijara hohoi emijo jyo Yesu Ekyomoni iko Etabisani olo neruk hohoi. Inyi alya ol odihu’to akruce nyo igigilo inyi ta namuno on owon adi ihosyere honyi. Ati omyana inyi neloriri ono akruce attati inyi itoŋo iŋati iŋet ono akurus Hollum. ³ Ikyemijyete do lya ol odihu’to nemoriti huno leyyak hul oliwarik’to inyi ŋadi itai ilafuhoti bwo fe itabanata itajya hatai. ⁴ Ikyamati tai iko eyyata ati ibyaŋata tai ikyamati ikosi many owouniere nooto hatai, ⁵ bwo fe igwoti tai nekyana inya isiŋyerek itai ihwa lonyirok jo, “Lonyi hoŋ hemyana abahyo ono Hobu, Bwo fe helafuho al isiŋyo inyi iye. ⁶ Nyo abak Hobu lya ol omuno inyi, Bwo fe itabis inyi lonyirok daŋ ababo hul ifwotu inyi.” ⁷ Idihuna tai abahyo itabisaniere ehanita hatai. Ihanio Hollum jihatai ihwa lonyirok, nyo alali monye ol obeŋ’to abak lonyi honyi? ⁸ Kuyya obeŋ inyi abak itai, ihwa ihanio inyi jyo lonyirok honyi daŋ, ibyaŋata tai irata olonyirok honyi ati irata tai olorotot. ⁹ Bwo fe etahabuyo hohoi monyye hohoi hutta fau hul abahye nya hohoi, tania oŋida hohoi eniŋyo Monye hohoi ette dou inyuraniere nesu. ¹⁰ Ahode abahye isi hohoi ta aŋasi kai ihwa igigiloi isi jo oyyu adi, ati abak inyi hohoi ilwahyere hohoi inyuraniere alibori honyi. ¹¹ Ta asaa ono abahyo ewon hohoi iko ejiriŋa obyaŋara namuno, ati ihalu iyaŋuno inyi nelik tajya iko abisan jyo hya hul oniŋye’to inyi. ¹² Tania akafata ahas hatai hun ilihi’to bwo fe itagoloto ahunyita hatai hun ikikiroi’to. ¹³ Ihuhumata ekota hun obisi’to te ejek hatai jo oŋida lya ol oŋura’to obeŋ okwaharo ati onyurak adi agolon. ¹⁴ Ottifyati imanyari ta nelik tajya iko laati daŋ bwo fe ottifyati alibori nyo ta abyaŋan libori obeŋ tulo igonyu Hobu. ¹⁵ Ihumata irrirrya ŋadi obo atulo tehiji hatai obeŋ onyurak amehino ono Hollum. Ihumata bwo fe ŋadi ottu aliwa an iyauno arrohoji ihiji hatai itarrohojyere laati arryai. ¹⁶ Ihumata irrirrya ŋadi owon obo ihiji hatai al ara ahasomoni kuyya bu atulo al igigilo te erre hutta fau ihwa Isau linya itinyyaŋak’to orutat honyi ta aŋirya. ¹⁷ Nyo imijana tai jo ihalu ottifya Isau orutat honyi, ati iha Hollum inyi. Dwadi ottifya inyi ta neyyo obeŋ inyi onyurak ekoi inyyahuniere orutat honyi. ¹⁸ Nyo ibyaŋata tai ifwanna jyo adoŋe on oleyo, on owulo’to ahima, amaji an awanari edumele iko neryok ojo asiŋit. ¹⁹ Owon nya bwo fe ahuta ono aforojo iko netuk an ikyana’to, ati hunya itaniŋuni’to ilolyai isi jo oŋida dwo Hollum obeŋ inyyak ikyana jihosi. ²⁰ Nyo ittallihi isi fwotuna efahi an isyarani jihosi ojo, “Dwadi ara acaŋ on ottir’to adoŋe irwoŋi inyi ta amorwo.” ²¹ Abaŋ nya Mose bebe al igonyu inyi erre huna ette jaran, “Ekikiro ni ta abaŋi.” ²² Ati ifwanna tai jyo adoŋe ono Sion, jyo amiji ono Hollum al isu’to, an anya’to Yerusalem ette dou, bwo fe ifwanna tai jyo anjelohyen hul ottubanie’to ta namuno. ²³ Ifwanna tai bwo fe jyo attubanio wati hul igyoroni afureta hosi idou, bwo fe jyo Hollum aŋotoni wati daŋ bwo fe jyo oloyirihyen habisak hul olibori’to. ²⁴ Ifwanna tai bwo fe jyo Yesu etimwarani olo ecorit aŋejuk, bwo fe jyo arwasyo hoto an iyaŋuno jihohoi amehino agalik nooto ono Abele. ²⁵ Ihumata mijo ŋadi ihara tai lya al ikyana’to. Nyo kuyya obeŋi isi irisi to ninya iharik isi lya al iramyo’to isi to fau, aŋai attadi eris hohoi kuyya eha hohoi lya al ikyana’to t’edou? ²⁶ Beryen itakitik nekyana honyi afau bwo ihwania isyo inyi ecorit jihohoi jo, “Enyyahi abotye etakitik adi ni afau, obyaŋara afau hama, ati edou bwo fe.” ²⁷ Al ojo inyi jo, Enyyahi abotye, itahutak ania jo iyari adi erre hun oyyeuni addi hun ikikiroi, jo oŋida erre hun obeŋi’to ikikiroi odulori fur. ²⁸ Tania ihwa efwotu hohoi olobye on obeŋ’to oremik ikikiro, ijara hohoi esyo ahumo jyo Hollum iko negyamita hun oyiji’to ta abaŋi iko te etahabuyo. ²⁹ Nyo ara Hollum hohoi ihwa eema on oŋiyo’to erre daŋ.