¹ Ojo Agripa jyo Paulo, Ikyanai huno hoi. Attati Paulo ikaf aani honyi jyo hobu ette jaran: ² Esiru ani amjii bebe, hobu Agripa, nyo aremik ni ahana ikyana jihoi te errositi daŋ huno Yudea jihoŋ. ³ Nyo imijak iye emohiti iko emanyiti daŋ huno Yudea. Tania itaniŋye jihoŋ. ⁴ Omijani Yudea emanyiti hoŋ daŋ ninya hara ni ahito limiji hohoi iko limiji Yerusalem. ⁵ Omijani isi bebe kuyya ikyanai isi nelahode, jo amanya nya ni te efahita hun ogoli huno Farisei. ⁶ Bwo fe ihwania awotya ni ilokiko dini te eram ono ecorit inya ocorok Hollum jyo hohonyok hohoi. ⁷ Iyihini awoi hohoi ’tomon harrihai daŋ te ecorit ana, bwo fe omojotye isi ta afanni iko ta attari. Bwo fe te eram ana lerrosoni nya ani Yudea. ⁸ Nyo igigiloti tai jo ogol bebe jyo Hollum itubuhuniere atulo to ye? ⁹ Egigilo nya ni jo oŋida ehanio ni erre arryai itihotyere afure Yesu olo Nasaret. ¹⁰ Etahawwayo nya ni isi to miji Yerusalem bwo fe etifitatta nya ni aati Hollum arryai ibabus te ekyana ono ehumak eleittaha. Iyarai nya isi littohori ette bwo fe ni aŋot isi jo hoyehi. ¹¹ Etabahyo nya ni isi enyyahita arryai ihasik imojiti jo oŋida isi ihari Yesu bwo fe te ejorya on obolo ettigemyo ni isi many ifauhyen omuk daŋ. ¹² Tania adaha nya ni to obo oloŋ ikoi Damasko te ekyana ono ehumak eleittaha. ¹³ Attati ni igonyuna ta afanni afaŋan an afaŋ’to bebe agalik oloŋ. Itafaŋ nya inyi ani iko aati hunya edaha’to ikoŋ. ¹⁴ Ette hohoi daŋ kwaharu ifau ette ni itaniŋuna obo ekyana te ekyana Ebrei on ojo, Saulo, Saulo, nyo ittigemyo iye ani? Odyaha ataji hoi ania te ettigemita. ¹⁵ Ati ajo ni, ngai iye Hobu? Bwo ojo Hobu jihoŋ, Ani Yesu al ittigemyo iye. ¹⁶ Otte ati te ejek hoi, nyo aleyo ni jihoi te eram abotye. Anyimu ni iye igyamari jihoŋ irari ahetamijanani te egonyuna hoi ani bwo fe iko to omuk erre hun etaleyehi adi ni ta ahwan hoŋ jihoi. ¹⁷ Etalahu adi ni iye to has wati bwo fe jyo paganohyen. Nyo efak ni iye jihosi, ¹⁸ litahutaniere nelahode jihosi liloicere atajya hosi te dumele lifaŋan bwo fe to dwaran Sitan jyo Hollum. Ette adi isi nyurana nabusana ono eyyata hosi iko amaji lihiji wati hul italibori ta neruk hosi jihoŋ. ¹⁹ Tania hobu Agripa, abeŋ ni amesyo netamijani on ottu’to t’edou. ²⁰ Ati eramak nya ni laati hutto Damasko ahosyere bwo lihalu hulo Yerusalem, bwo ati hutta fau Yudea daŋ iko paganohyen, jo oŋida isi iloiti atajya hosi jyo Hollum bwo fe hehaniehe ehanita hun osiruni’to jyo laati hul oniŋye’to. ²¹ Te eram ana inefuni Yudea ani to haji imojit eneittok ette jaran ettoho ani. ²² Ati olwak Hollum ani jyo noloŋ nya many iko ahana. Tania etoŋo ni dini ihwania litamijananiere laati daŋ erre hunya ikiluni eyak sayyo iko Mose jo ofwonni adi isi. ²³ Ojori nya isi jo, ittigemye adi laati Kristo bwo fe ara adi inyi letteri wati daŋ libuhuniere to ye ette adi inyi itahutana nafaŋan jyo laati hohoi iko jyo paganohyen. ²⁴ Ninya hekyana inyi ihwania attati Festo ikyana on okwat jihonyi ojo, Paulo, ahode isita iye. Isita iye ta amijana hoi erre arryai. ²⁵ Ati ojo Paulo jihonyi, Festo, illaŋ, abeŋ ni esita, ati ekyana ni nelahode ahode. ²⁶ Nyo omijak hobu nerre huna daŋ bwo fe aremik ni ikyana isi daŋ jihonyi nyo amijak ni jo obeŋi isi itidimye. Omijani laati daŋ isi. ²⁷ Hobu Agripa, ibeŋ iye iruk nekyanita huno leyak sayyo? Amijak ni luŋa jo iruk iye. ²⁸ Ojo Agripa jyo Paulo, To oloŋ ono ahana igigilo iye jo ituruk iye ani a Kristyano? ²⁹ Ojo Paulo, Ahode ihosyere Hollum awak ni iye iko laati hulo daŋ ifwanna ratan ihwa ani luŋa arari hama ta naririk huna. ³⁰ Attati hobu dyoto iko Festo iko Bernika bwo laati daŋ hinya itoŋoi’to ikosi. ³¹ Ofwoi isi daŋ aŋati, ette jaran, Obeŋ atulo olo ihanio omuk erre hun itasiruni’to naye kuyya dwo bu ababus. ³² Ati ojo Agripa jyo Festo, Aremik dwo ni houna inyi hara dwo obeŋ inyi ojo jo ejulum inyi many jyo Cesare.