¹ Ninya afany Festo ifau ania ihalu oŋitek hunihoi olo nya inyi to Cesarea many Yerusalem. ² Nyo iramani ehumak eleittaha iko eleittaha hulo Yudea eram ono Paulo jihonyi bwo ilolyahini jihonyi, ³ iloŋuniere Paulo many Yerusalem. Nyo igigiloi isi ifwarri irrari inyi ikoi ittohori. ⁴ Ati itarraŋ Festo jihosi ojo, Ifita Paulo ifau Cesarea bwo awak ni leten ihwania dia. ⁵ Ette inyi jaran jihosi, Ijara omuk eleittaha hatai efwo ikoŋ. Kuyya owon obo eram jyo atulo olo oremehini isi ’rosyo inyi. ⁶ Ihalu omuk oŋitek hottohunik kuyya ’tomon, olo inyi Cesarea ilokikoi. Nya motye itoŋo inyi imaji lokiko ette iloŋuna isi heteyaŋuniehe Paulo jihonyi. ⁷ Ninya ottu inyi ette Yudea hul ofwoi’to to Yerusalem wotya ihosyere honyi irrasaniere inyi erre arryai hun obeŋi’to italeyehini nelahode. ⁸ Ojo Paulo, Abeŋ ni amesyo efahita Yudea kuyya amyana aji imojit eneittok, ara bu amoryo Cesare, obeŋ ’tuŋ. ⁹ Ati awak Festo itilik atajya Yudea ette jaran jyo Paulo, Iwak iye leten Yerusalem iwwahari eram hoi dia ihosyere hoŋ? ¹⁰ Ati ojo Paulo, Awotya ni ihwania ilokiko ono Cesare. Oremik ana. Imijak iye abeŋ ni ehanio obo ariŋ on orroho jyo Yudea. ¹¹ Kuyya ehanio ni on orroho bwo fe osiru jihoŋ aye, abeŋ ni afuho. Ati kuyya orrosi isi ani asai obeŋ tulo oremik itujulumonia ani jihosi. Ati ejulum ni jyo Hobu Cesare. ¹² Inyyak Festo iwwaha iko ewwak hirre hama ette jaran jyo Paulo, Ijo iye iyaro adi iye eram hoi jyo Cesare, ilo ati jyo Cesare. ¹³ Ihalu omuk oŋitek ofwonni Hobu Agripa iko ŋorwoi honyi Bernika many Cesarea irraŋuniere Festo. ¹⁴ Arasai nya isi dia oŋitek arryai attati Festo iwwaha eram ono Paulo jyo hobu Agripa jo, Owon obo atulo ol obusak nya Filice ibabus. ¹⁵ To ninya awanari ni Yerusalem, iramani ehumak eleittaha iko aati eleittaha hulo Yudea inyi jihoŋ ojori, ijara ani aŋot eram honyi. ¹⁶ Ajo nya ni jihosi jo, abeŋ ni aremik isyarana inyi jihatai nyo obeŋ efahi ono Roma ojo oŋida isyori obo atulo jyo aati horos honyi hobeŋi iwwahai eram honyi ihomomite hosi bwo inyi itarraŋ erositi hosi. ¹⁷ To ninya ottubarik isi dini abeŋ nya ni elliŋya ati nya motye alo ni imaji lokiko bwo etiloŋu ni inyi. ¹⁸ Ninya owotyai arrosok honyi obeŋi isi arrasani inyi omuk erre hun orrohoji ihwa egigilo ni. ¹⁹ Ati aŋalafai isi ikonyi ta neruhita hosi bwo fe iko to obo atulo afure honyi Yesu linya oye’to, bwo ojo Paulo, isu inyi. ²⁰ Ati abeŋ nya ni amijak aŋai aŋot adi ni neram ania, attati ni ifiyo Paulo kuyya awak inyi ijulum many jyo olokiko eneittok otto Yerusalem. ²¹ Ati olwaha nya Paulo jihoŋ lirrirryari inyi libabus many eyari inyi eram honyi jyo hobu Cesare. Ania, efak ni lomuk loseŋer lirrirryari inyi many ifahinierek inyi jyo Cesare. ²² Ojo Agripa jyo Festo, Awak ni itaniŋuna nekyana ono atulo alya ta ahwan hoŋ. Ojo Festo, Itaniŋu adi yo motye. ²³ Ojo nya motye, ofwonni Agripa iko ŋorwoi honyi Bernika te etahabwo on obolo ette jiŋana ihaji ono lokiko iko oseŋer arryai ojo eleittaha hul omuk. Attati Festo ifahina heteyaŋuniehe Paulo. ²⁴ Ojo Festo, Hobu Agripa, ikatai daŋ hul afanyi’to dini, imijyete atulo lya olo. Inyi alya inya iwuwoŋitarik laati Yudea jihoŋ dini bwo fe Yerusalem jo, ijara inyi hotoye. ²⁵ Ati abeŋ ni anyurak omuk erre jihonyi hun itasiruni’to aye tenyi. Bwo fe inyi ihwania ta ahwan honyi awak ijulum jyo Cesare bwo fe ajo ni efak inyi dia. ²⁶ Ati abeŋ ni amijak anyo adi egyorok ni jyo hobu tenyi. Tania eyaŋuno ni inyi jihoi, hobu Agripa, oŋida iye bwo fe ikyem inyi linyuraniere neram honyi an aremehiniere ni igyoroniere jyo Cesare. ²⁷ Nyo obeŋ oyyu ifahiniere ababus ihwo olo jyo hobu bwo ebeŋ egyorok nerre hun ojori ihan inyi.