¹ Ikikorik Paulo jihosi ette jaran, Illarak hoŋ, olibo amanya hoŋ ihosyere Hollum many iko ahana. ² Attati Anania, ehumani ol obolo’to, ifahina hinya owotyai’to liger Paulo hatabahyehe inyi lihutuk. ³ Ati ojo Paulo jihonyi, Abak adi iye Hollum. Ira iye ihwa olohitir an ibuyai. Ijo iye iŋot ani te efahita ati ibak iye ani asai, ariŋ on ojori efahita hehaniete. ⁴ Hul owotyai’to iger honyi ette jaran, Imoryo iye ehumani ol obolo’to olo Hollum? ⁵ Ojo Paulo, Illarak hoŋ, abeŋ dwo bu ni amijak jo ara inyi ehumani ol obolo’to nyo igyoroni jo, “Oŋida ibyaŋata tai ikyanati on orroho jyo eleittok hatai.” ⁶ Ati ninya igonyu Paulo jo arai lomuk ahulo Saducehyen bwo omuk ahulo Farisei ojo inyi jihosi, Illarak hoŋ, ani Afariseitanani nyo ara monyoŋ olo Farisei. Amijak ni jo ara te eyihina en eyihiniere hohoi ta nebuhuna layak on okemyerek isi ani lilokikoi ana. ⁷ Ninya likenu inyi erre huna ette Saducehyen ŋalafa iko Farisei ette isi bwanya. ⁸ Nyo ojori Saducehyen jo obeŋ nebuhuna, bwo fe jo obeŋi anjelohyen, bwo fe ojori nya isi jo obeŋ oloyiri, bwo Farisei fe iruhi huna daŋ. ⁹ Tania owon nya newuwoŋita on obolo bwo omuk hulo egyorok hulo Farisei owotyai ette jaran, Ebeŋ hohoi enyurak obo ariŋ on orroho jyo latulo olo. Hara hekyana dwadi obo oloyiri kuyya anjelo jihonyi. ¹⁰ Attati naŋalafa on obolo bebe dyoto, ette eleittok olo oseŋer baŋi jo lafwonni adi hotto hya ’tohoro Paulo, ette inyi ifahina oseŋer hetefwahi iyaro inyi t’ehiji hosi ikorokon. ¹¹ Nya motye owotya Hobu ihosyere Paulo ette jaran, Itagolo ataji hoi nyo ihwa iramak iye etamijanita toni imiji Yerusalem, iramak adi iye bwo fe imiji Roma. ¹² Ninya afaŋ amotye ottubanie omuk Yudea ette illama jo, Ebeŋ adi hohoi enyyak ŋiyo kuyya emata many ettohori hohoi Paulo. ¹³ Owoni nya laati atomwana aŋwan hul ikyanai ihwania. ¹⁴ Ofwoi isi jyo ehumak eleittaha iko amarwak ojori, Ellama hohoi jyo ebeŋ adi hohoi ettir obo aŋiyo many ettohori hohoi Paulo. ¹⁵ Tania ifahina nekyana jyo eleittok olo oseŋer jo, heteyaŋuniehe Paulo jihohoi oŋida hohoi enyyak kemyo inyi. Al adaha inyi ikoi, ettoho adi hohoi inyi. ¹⁶ Ihwania lonyi hanie Paulo itaniŋu eram ana ette inyi leten ikorokon iramaniere Paulo. ¹⁷ Iloŋ Paulo oseŋeritanani ojo, Iyaro eito olo jyo eleittok hatai nyo owon obo eram jihonyi an awak inyi ikyana. ¹⁸ Ihwania iyaro inyi leito alya jyo eleittok olo oseŋer ette inyi jaran, Eloŋu ani Paulo el ifitani ojo jihoŋ, iyaro eito olo jyo eleittok hatai nyo awak inyi ikyana omuk erre jihoi. ¹⁹ Orihu eleittok olo oseŋer leito alya ta aani jyo obo aŋati, ette jaran, Anyo riŋ an iwak iye iramana ani? ²⁰ Itarraŋ inyi, Ojori Yudea jo efiyo adi isi iye iyaŋuniere Paulo ilokiko motye, ihwa awahi isi ittifya eram honyi. ²¹ Ati heruk ekyanita hosi nyo arrai laati atomwana aŋwan hul ocoroni’to jo, ebeŋ adi isi eŋiyo kuyya emata, hebeŋ isi ettoho Paulo. Ihwania itilai isi iye iyaŋuniere inyi. ²² Attati eleittok ifahina leito alya addi ojo, Heramak obo atulo jo iyaŋuno iye asayyo huna jihoŋ. ²³ Ette inyi iloŋuna oseŋer arrihai ette jaran jihosi, Saa hottoŋwan ta attari iyarai oseŋer esiha arrihai iko hul owoni iko akusani atomwana hattarik iko omuk esiha arrihai hul owoni iko afyara. Oŋida isi iyarai Paulo many Cesarea. ²⁴ Bwo fe oŋida isi iyaŋunie akusani hun anyalami ikafari Paulo jyo mandir Filice. ²⁵ Ette inyi igyoro awaraga jyo Filice ojo. ²⁶ Ani Klaudio Lisia, egyoro ni jyo mandir hohoi Filice, efonyo ni iye bebe. ²⁷ Inefuni nya Yudea atulo olo bwo fe ojori isi ettoho inyi ati attu ni iko oseŋer hoŋ itahoruniere inyi nyo amijak nya ni jyo ara inyi olo Roma. ²⁸ Ati attifya nya ni errositi hosi bwo fe eyaŋuno ni inyi ihosyere lokiko hosi. ²⁹ Ihwania anyurak ni arrasani isi inyi to omuk erre huno efahita hosi ati obeŋ obo arrasak inyi obo eram an itasiru aye kuyya ababus. ³⁰ Ihalu iramani jihoŋ omuk laati hul awahi ’tohoro inyi tania efak ni inyi jihoi bwo efak ni arrasak honyi hefwahi ’rosyo inyi ihosyere hoi. ³¹ Tania ifak eleittok oseŋer hya iko Paulo ta arwe ette isi fwatan ette iyaro inyi many imiji Antipatra. ³² Nya motye acaharai omuk oseŋer ikorokon bwo adahai hul owoni iko akusani hosi iko Paulo. ³³ Ninya lafanyi isi Cesarea isyori isi awaraga jyo mandir bwo iyaŋunie isi Paulo ihosyere honyi. ³⁴ Ihenio inyi awaraga ette ifiyo amiji ba Paulo. Itaniŋu inyi jo ottu inyi to Silisia ette inyi jaran, ³⁵ Amijo adi ni eram hoi al afanyi arrasak hoi. Bwo ifak inyi Paulo itoŋori ikorokon ono Erode bwo irrirryai oseŋer inyi.