¹ Ojo Paulo, Illarak hoŋ iko monyye hoŋ daŋ, itaniŋyete iko itayirata obo ekyana hoŋ ana. ² Ninya itaniŋuni isi inyi ikyana te ekyana Ebrei ette isi dwa liŋ liŋ. Attati inyi jaran: ³ Ani olo Yudea, amiji hohoi an isiunierek ani inyi Tarasa otto fau Silisia. Ettiyenu nya ni jo namiji ana, jyo ettiyanani Gamalio, efahita daŋ hun ogoli huno hohonyok hohoi. Bwo fe efiriwa nya ni te efahita huno Hollum ihwa itai. ⁴ Ettigemyo nya ni ejifak hulo Hobu dwadi many ottohyerek isi. Etifitak nya ni alyawa iko aŋorwo ibabus, ⁵ ihwa omijak ehumani ol obolo’to iko amarwak miji daŋ. Isyori nya isi awaraga jihoŋ liyari limiji Damasko lifitaniere hul owoni’to dia iko iyaŋuniere isi Yerusalem ibahyere. ⁶ Ati ninya lattu ni many liger Damasko, idwoŋ nya nafaŋan on obolo t’edou jihoŋ ta afanni. ⁷ Ette ni kwaharu lifau ette itaniŋuna ekyana on ojo, Saulo, Saulo, nyo ittigemyo iye ani? ⁸ Ettaraŋ nya ni ojo, ngai iye Hobu? Ojo inyi jihoŋ, Ani Yesu olo Nasaret al ittigemyo iye. ⁹ Igonyuni hunya ewon’to ikoŋ afaŋan ati obeŋi itaniŋuni ekyana an ikyanai jihoŋ. ¹⁰ Bwo ni ette inyyahina jihonyi ojo, Ehanio adi ni anyo, Hobu? Ojo inyi jihoŋ, Otte, ilo imiji Damasko bwo dia iramani adi jihoi nerre hun awak ni ihanio iye. ¹¹ Ati abeŋ nya ni aremik mijo nyo ta anico faŋan bebe tania orihoroi nya ani ta aani many limiji Damasko. ¹² Ottu obo atulo, afure honyi Anania, inyi atulo al ijifatyo’to efahita bwo fe ikikyanatye nya Yudea daŋ hutto miji jo oyyu inyi. ¹³ Owotya inyi liger hoŋ ette jaran, Saulo, illaŋ, omije. Bwo ta asaa ania amijo ni ette igonyuna inyi. ¹⁴ Ojo inyi jihoŋ, Onyimu Hollum olo hohonyok hohoi iye limijaniere nawahan honyi bwo fe ligonyuniere anyarani honyi iko litaniŋuniere netuk honyi. ¹⁵ Ati ira adi iye ahetamijanani honyi jyo aati daŋ te erre hun igonyu iye bwo fe iko hun itaniŋu iye. ¹⁶ Ihwania itila iye anyo? Otte, ifwotu batisimo bwo fe illillaunie eyyata hoi addi te eloŋo hoi afure honyi. ¹⁷ Ninya acaharu ni Yerusalem, amojo nya ni to obo oloŋ lihaji imojit eneittok, ¹⁸ ette ni igonyuna Hobu ta arigya al ikyana jihoŋ ojo, Obusak Yerusalem kokwak nyo obeŋi adi isi ifwotuni ekyanita hoi toni. ¹⁹ Ajo ati ni jihonyi, Hobu omijani isi ta ahwattek hosi jo eniafatyo nya ni aati daŋ hul iruhi’to jihoi ihasik imojiti daŋ ette bahyo isi ette itifitana isi libabus. ²⁰ Hara dwo bu ihwa ninya owouno nooto ono etamijanani hoi Setefano awotya nya ni dia bwo fe ette ni iruk jo ijara inyi hotottohorohi. ²¹ Ati ojo Hobu jihoŋ, Ilo ati, nyo efak adi ni iye alamarai bebe jyo paganohyen. ²² Itaniŋuni nya isi ekyanita honyi many ekyana ana attati isi iwuwoŋitai jojo, Ottohoro atulo alya, obeŋ inyi osiru iswori. ²³ Ati iwuwoŋitai isi bebe ette igwas aboŋojin hosi ette kur iko aboro ahide. ²⁴ Ifak eleittok olo oseŋer heteyaŋuniehe Paulo itwa korokon ikemyere inyi ta abahyo inyuraniere awoyo hiram an iwuwoŋitarik laati jihonyi. ²⁵ Ati al ifiti isi inyi to ofito, ojo Paulo jyo oseŋeritanani, Obeŋi itihi jihatai ibahyere atulo olo Roma hobeŋi oŋoti eram honyi? ²⁶ Al itaniŋu oseŋeritanani alya ana olo inyi jyo eleittok hosi ifiyere inyi ojo, Ihanio adi iye anyo jyo atulo olo? Ara dwadi olo Roma. ²⁷ Tania ottu eleittok jihonyi ette jaran, Iye olo Roma? Ojo Paulo, Afe. ²⁸ Ojo oseŋeritanani, Aduma nya ni agurusi arryai irari olo Roma, bwo Paulo ette jaran, Ati isiuni nya ani to Roma. ²⁹ Tania hinya daŋ ojori’to ekem inyi ette busana inyi kwak. Abaŋ bwo fe eleittok jo etifitak inyi atulo olo Roma. ³⁰ Ati nya motye awahi isi mijana errosit ono Yudea inyi attati eleittok houna inyi bwo ette iramana ehumak eleittaha iko lewwak hiram ittubaniere ahwattek hosi. Ette inyi iyaŋuno Paulo ette itawojihina lihosyere hosi.