¹ Ihwania illarak hohoi te esidi, omojoti tohohoi jo oŋida nekyanita huno Hobu isarrahini kokwak bwo inyuraniere akwatan, ihwa ninya ihanierek isi ihiji hatai. ² Bwo fe omojoti jo oŋida hohoi itahoruni jyo apolorok bwo fe jyo laati hul igigiloi on orroho, nyo hobeŋi laati daŋ iruhi. ³ Ati odulo Hobu igigilo tetai bwo itagol adi inyi itai. Irrirrya adi inyi itai bwo fe jyo olorroho. ⁴ Eyihi hohoi jyo Hobu tetai ahode, jo ihaniete tai erre hunya eramak hohoi jihatai bwo ihaniete adi itai fur. ⁵ Ijara Hobu itadihoro atajya hatai jyo namuno ono Hollum bwo jyo nadihan ono Kristo. ⁶ Ihwania illarak hoŋ, eramak hohoi itai ta afure ono Hobu hohoi Yesu Kristo, igyalati ahwattek hatai addi jyo illarak daŋ hul iboyoji’to, hul obeŋi’to ijifatye emohiti iko ettiyenita hun ifwotuna tai jihohoi. ⁷ Ta ahwattek hatai imijana tai aŋai oŋida itai ijifatyete hohoi, nyo ebeŋ nya hohoi eboyo ihiji hatai. ⁸ Bwo fe ebeŋ nya hohoi eŋiyo emune ono obo atulo ta abyaŋan idumit, ati te egyamita iko te ehanita, egyama hohoi ta attari iko ta afanni jo oŋida hohoi ebeŋ ettigemyo obo tehiji hatai. ⁹ Ebeŋ hohoi ejo obeŋ adwaran jihohoi ifiyere ta aŋiyo, ati era hohoi ahetamijanak ihiji hatai, jo oŋida itai ijifatyete hohoi. ¹⁰ Nyo inya ewanari hohoi ikatai eramak hohoi itai jo, Al iha obo atulo egyama, helaha inyi oŋiyo. ¹¹ Nyo etaniŋu hohoi jo owoni omuk hul iboyoji’to, hul obeŋi luŋa igyamai obo egyama ati arai isi ahadyoforok wati. ¹² Eramak hohoi bwo esiŋyo hohoi hul arai’to ihwa hulo te elolya ta afure Hobu Yesu Kristo, jo oŋida isi igyamai ol okwai ette ŋiyo aŋiyo hosi. ¹³ Ati itai illarak hohoi, heyuhoti ihaniere on oyyu. ¹⁴ Kuyya owon obo atulo ol obeŋ’to oniŋyo nekyanita hohoi huno awaraga ana, imijyete atulo alya bwo herryahati ikonyi, jo oŋida inyi iloriri te ehanita honyi. ¹⁵ Hegigiloti jihonyi ihwa amyotononi ati isiŋyete inyi ihwa illatai. ¹⁶ Ijara Hobu olo nelik taji ta ahwan honyi isyo jihatai nelik tajya asahyen daŋ te ekota daŋ. Ijara Hobu hatawana jihatai daŋ. ¹⁷ Ani Paulo al egyoro efonya ana ta aani hoŋ, an ara’to etamijani iwaragat hoŋ daŋ. Ara ana egyoro hoŋ. ¹⁸ Ijara amehino ono Hobu hohoi Yesu Kristo hatawana jihatai daŋ.