¹ Ihwania illarak hoŋ, te eram ono attuna Hobu hohoi Yesu Kristo iko ta attubanio hohoi irwaŋaniere ikonyi, emojo hohoi jihatai jo, ² oŋida itai ibyaŋata itagirriŋyete ta egigilita hatai, kuyya bu ilafuhoti jo ara ana oloŋ ono Hobu. Kuyya ikyana obo atulo jo itahutak Oloyiri inyi oloŋ ono Hobu, kuyya bu ifwotu awaraga tohohoi, heruhoto. ³ Helaha obo atulo inyobyo itai to obo ekoi, nyo obeŋ adi oloŋ ania ottu many ipalarik omuk laati jyo neruk hosi addi, bwo many oleyere atulo olo eyyau, inyi lya ol olo’to ihima. ⁴ Inyi alya al itahabuyo’to ahwan honyi agalik ajohin daŋ iko Hollum, bwo iha inyi erre daŋ hun itahabuye laati. Itoŋo inyi ihaji Hollum itahutaniere jo ara inyi Hollum ta ahwan honyi. ⁵ Ibyaŋata tai igiluna erre huna hunya eramak ni jihatai to ninya awanari ni ikatai? ⁶ Ihwania imijana tai anyo an itik inyi, jo oŋida inyi oleyo ta asaa honyi. ⁷ Nyo ihwania igyama arrohoji an idimani, ati itik etihoni arrohoji ania many iyari etihoni addi. ⁸ Bwo iholoŋ ania oleyo adi lya al iha’to efahita. Ottoho adi Hobu Yesu inyi to oyyami hutuk honyi bwo itattur adi Hobu inyi ta aleyo honyi. ⁹ Ottu adi lya al iha’to efahita rahan ahegyamani olo Sitan bwo fe oleye adi edwariti honyi daŋ hun obolori’to, iko etamijanita, iko ellillihita hun inyobye’to, ¹⁰ bwo fe oleye adi arrohojita daŋ iko enyobita daŋ jyo hya hul ofwoi’to ihima. Ofwoi isi ihima nyo obeŋi nya isi ifwotuni nelahode inyuraniere etalahuna. ¹¹ Te eram ana ifak Hollum jihosi epali jo oŋida isi iruhi agesemi ¹² an iyaŋuniere isi iŋoco. Isi hya hul obeŋi’to iruhi nelahode ati omunoi isi eyyata daŋ. ¹³ Ati illarak hohoi hul omuno Hollum, oŋida hohoi edulo esyoryo ahumo jyo Hollum tetai. Nyo many t’etteri onyimu Hollum itai inyuraniere etalahuna to Oloyiri ol Olibo al ittaŋu’to itai bwo fe ta neruk hatai jyo nelahode. ¹⁴ Te eram ana iloŋo inyi itai ta asayyo hun oyiji hun ettiyenio hohoi inyuraniere akwatan ono Hobu hohoi Yesu Kristo. ¹⁵ Tania illarak, owotyati on ogol bwo iniefatyete emohiti hunya ettiyenio hohoi jihatai, ara dwo bu te ekyanita kuyya bu te egyerita. ¹⁶ Amojo ni jio Yesu Kristo, Lamonye hohoi ta ahuan honyi iko Hollum Monye hohoi hullo obuori atajia hosi hohoi, hulle isiarani 'to jihohoi abijon tajia iko eyihina onno oyyu 'to te nelik tajia; ¹⁷ Ihwania ijara Hobu hohoi Yesu Kristo ta ahwan honyi iko Hollum Monye hohoi itilihye itai. Inyi Hollum ol omuno’to hohoi bwo isyarak jihohoi etilihyo on odulo’to fur iko neyihina ta amehino. Ijara inyi itagol itai te ekyanita iko te egyamita daŋ hun oyiji’to.