¹ Itai hul amuno ni, ara ana awaraga etarrihi an egyoro ni jihatai, bwo fe tesi daŋ itagiluta ni egigilita hatai hun obeŋi iko epali, ² jo oŋida itai igotyete nekyanita hunya ikyanai eyak sayyo hul olibori’to bwo fe oŋida itai igotyete efahita huno Hobu Etalahani hohoi hunya isyori jihatai ta lefahat hatai. ³ Ati ahosyere omijana jo te esidi fau ofwonni adi amorok hul omorye erre daŋ, hul adahai te ewahiti huno ahwattek hosi, ⁴ bwo fe ojori isi jo, Tani attuna honyi ninya ocoroni? Nyo to ye ono hohonyok hohoi harasai erre daŋ ihwa inya beryen ara dwo bu many t’etteri fau orrijori erre daŋ.'' ⁵ Nyo obeŋi isi igigiloi te eram ana jo, oyyeuni nya edou ta nekyana Hollum bwo fe oyyeuni afau tehiji hari bwo oyyeuni inyi to hari. ⁶ Ette ebulyo hari imuhonia afau ette erre daŋ ye. ⁷ Bwo fe ta nekyana Hollum ottunak inyi edou iko afau hun owoni ihwania te eema. Ottunak inyi isi many iholoŋ ono aŋoco iko attohyo wati hul otimoi’to Hollum. ⁸ Ati itai hul amuno ni, hegwoti eram ana jo, te egigilo ono Hobu ara oloŋ abotye ihwa aŋasi alif abotye, bwo fe arai aŋasi alif abotye ihwa oloŋ abotye. ⁹ Obeŋ Hobu illiŋya ihaniere erre hun ocorok inyi ihwa illiŋyai laati, ati obolo adihan honyi jihatai nyo obeŋ inyi awak obo atulo hotoye ati awak inyi laati daŋ heloitohi atajya hosi. ¹⁰ Ati ottu adi oloŋ ono Hobu ihwa olohoho. To oloŋ ania oŋulyamanie adi edohwo te etiri on obolo. Ilwajarai adi bwo fe erre hutte dou bwo oswaharo adi afau iko erre daŋ. ¹¹ Tania ihwa emijak hohoi jo ilwajarai adi erre daŋ, hamanyati ihwa aati hul olibori’to bwo fe omijani Hollum. ¹² Itilatyete ta awahan on obolo’to ta attuna ono oloŋ Hollum, nyo to oloŋ ania ilwajarai adi edohwo te eema bwo fe itaŋoloyom adi eema on onok’to bebe erre daŋ. ¹³ Ati ta neyihina etila hohoi edou aŋejuk iko afau aŋejuk hun olibori fur ihwo ocoroni nya. ¹⁴ Tania itai hul amuno ni, ihwa itilatyete tai ta neyihina erre hunia oŋida itai ihumata manya te nelik tajya jo al ottu inyi onyurak adi inyi itai awati hul obeŋi iko aforoi, kuyya bu epali. ¹⁵ Bwo omijana jo, ta adihan on obolo ono Hobu hohoi italahunie aati, ihwa igyoro nya illa hohoi Paulo jihatai to ofyoro hun isyori jihonyi. Inyi illa hohoi al emuno hohoi bebe. ¹⁶ Igyorok inyi erre hunia iwaragat honyi daŋ. Ogoli omuk erre hun igyoro inyi itaniŋuniere, bwo iloiti atimok iko epalak erre huna ihwa iloiti isi egyerita daŋ tania orroho adi jihosi. ¹⁷ Ati itai hul amuno ni, ihwa imijana nya itai erre hunia, ihumata ŋadi ettiyanak hul inyobye’to itipali itai bwo isyabara adi itai te ekoi on olufa’to. ¹⁸ Ati oboboloroti ta amehino iko ta amijana Hobu Yesu Kristo Etalahani hohoi. Ijara akwatan hatawana jihonyi ihwania tulaŋ. Isi hunia.