¹ To oŋitek huno eyak sayyo odyotoi nya tehiji wati ebwanak hul inyobye’to ihwa owoni adi omuk ettiyanak hul inyobye’to ihiji hatai. Isi hulya hul itulunyai ettiyenita hosi itipalyere laati. Ihari isi Eleittok linya inyyaŋu’to isi, bwo ottu adi naye jihosi kokwak. ² Bwo ijifatye adi omuk laati arryai esomiti hosi bwo fe omyanai adi laati ekoi ono nelahode te eram hosi. ³ Adayai isi bwo ottifyai isi ipocouniere erre hatai ta nekyanita huno enyobita. Aŋot nya Hollum isi many beryen bwo ottu adi naye hosi ahode. ⁴ Nyo obeŋ nya Hollum omehino jyo anjelohyen hul iyyauni’to, ati ibirok inyi isi ihima bwo ottunani isi iwure an iryok’to bebe many oloŋ ono aŋoco. ⁵ Bwo fe obeŋ nya inyi omehino jyo laati hunya beryen ninya ifahu inyi ebulyo hari jyo hul otimoi’to Hollum, ati italahu inyi Noa ettiyanani olo abisan iko omuk laati hattarik. ⁶ Oŋot inyi etatturyo jyo amisihi Sodoma iko Gomora ette isi rahan anwara bwo fe arai isi etamijani jyo laati hul ihari’to Hollum. ⁷ Italahu nya inyi Loto ahabisani nyo odyaha ataji honyi te esomiti huno arrohojak. ⁸ Oŋitek daŋ odyaha ataji abisani lya bebe al amanya inyi ihiji hosi nyo igonyu inyi bwo itayiru ehanita hosi hun orrohoji’to. ⁹ Tania bwo fe omijak Hobu bwo oremik inyi italahuniere laati hul omijani’to Hollum t’ehiji esusuta. Omijak inyi bwo fe ittunaniere hul obeŋi’to obisi ta abahyo many iholoŋ ono aŋoco. ¹⁰ Ati obolo abahyo jyo hya hul adahai te ewahiti hun itarrohojyerek ahwattek hosi bwo omyanai elaballok. Iŋereji isi bwo itabahasye isi ekyanita, bwo obeŋi isi abaŋi imoryere edwariti hutte dou. ¹¹ Ati anjelohyen hul agalihini’to isi ta adwaran iko ta agolon, obeŋi bu isi itisyahai laati hya ihosyere Hobu. ¹² Ati arai laati hulo ihwa acaŋi hun obeŋi’to iko egigilo hun isiuni ette laati inefuna ette ’tohoro. Omorye laati hulya erre hun otimoi isi, tania te ehanita hosi hun orrohoji’to oyei adi isi. ¹³ Onyurani adi isi arrohoji te ehanita hosi hun orrohoji’to. Omunoi isi ibalari asai bwo irumari ta afanni. Arai isi ihwa aforoi iko atoŋosa nyo omunoi isi inyobyere itai al oŋiye isi ikatai. ¹⁴ Awahi oŋite hosi esomiti bwo obeŋi isi oyuhoi iyyautari. Itiryetuni isi laati hul ilihi’to bwo omohini atajya hosi adaya. Arai isi laati hul osiruni jyo ajore Hollum. ¹⁵ Idyaharai isi ekoi on oyyu ette isyabara addi, nyo ijifatye isi ekoi ono Balama lonyi Beora ol omuno’to agurusi hun ifwotu inyi ta arrohoji honyi. ¹⁶ Ati isiŋyo asigirya inyi ta arrohoji honyi ninya ikyanari asigirya jihonyi te etuk ono atulo itihyere esita ono ebwanani lya. ¹⁷ Arai laati hulo ihwa otilihi hun oyohoji’to bwo fe arai isi ihwa eriri hun oniŋye’to ahuco oyyami, bwo ottunani edumele an iryok’to ’tir ’tir tesi. ¹⁸ Ihutuhi isi ta nekyanita hun obolori’to hun itadararik isi ette isi inyyak itiryetuna laati te esomiti; isi laati hul hetehi irisuna addi t’ehiji leyyak. ¹⁹ Ocoroni jihosi ahohina, ati arai isi ta ahwattek hosi apiti hulo arrohoji, nyo ara atulo apit jyo erre hun agalihini’to inyi. ²⁰ Nyo al ofuhoi laati addi to ’rohojita huno afau ta amijana ono Hobu Yesu Kristo Etalahani hohoi, bwo ihalu inyyahi eyyata inefuna isi ette galihina isi, orroho adi bebe esidi hosi agalik etteri hosi. ²¹ Oyyu dwo jyo laati hulo agalik al obeŋi nya isi omijani ekoi ono abisan, kuyya ihalu hosi mijana, acaharai isi ette busana efahita hun odwari’to hunya isyori jihosi. ²² Idwoŋi jihosi ihwa nekyana wati on ojo, “Acaharo eŋok jyo aseta honyi,” bwo fe, “Acaharo adi abatak on olibo’to itadaha ibalaŋatyere.”