¹ Enyyak hohoi itteryo itakwat afureta hohoi? Oŋida hohoi eyaŋuno awaragat jihatai kuyya bu emoju omuk tetai, ihwa ihanie laati omuk? ² Irata tai awaraga hohoi an igyoroni itajya hohoi on omijani laati daŋ bwo fe ihenie isi daŋ. ³ Bwo fe itahutana tai jo irata tai awaraga ono Kristo an eyaŋuno hohoi, on obeŋi igyoroni ta aari galam ati igyoroni to Oloyiri olo Hollum al isu’to. Obeŋi bwo fe ikyafani inyi imorwoi ati igyoroni inyi itajya wati. ⁴ Eyihi hohoi jo ara eram ana ahode to Kristo bwo ihosyere Hollum. ⁵ Ati ettallik hohoi ta ahwattek hohoi ihaniere obo ariŋ, ati ottu adwaran hohoi jyo Hollum. ⁶ Bwo fe isyo inyi agolon jihohoi irari ahettiyanak ono ecorit aŋejuk. Obyaŋara inyi efahi an igyoroni ati ara inyi ono Oloyiri. Nyo iyaŋuno efahi an igyoroni, naye; ati isyo Oloyiri nesu. ⁷ Ati efahita hun ikyafani imorwoi hun iyaŋunie naye, ofwonni nya isi ta akwatan, bwo obeŋi laati Israele oremehini mijo omom Mose ta apipyahi honyi, ati atuhuno nya apipyahi ania. ⁸ Obeŋ adi egyama ono Oloyiri ottu ta akwatan an agalik? ⁹ Nyo kuyya owon akwatan jyo efahita hun iyaŋunie naye, ahode, agalik akwatan ono ecorit aŋejuk an iyaŋuno’to alibori. ¹⁰ Ahode ariŋ ninya owon’to iko akwatan, ottu ihwania wanan iko abyaŋan kwatan, nyo ta akwatan an agalik’to inyi. ¹¹ Nyo kuyya owon akwatan jyo ariŋ on otuhuno’to ahode ariŋ on odulo’to fur owon iko akwatan agalik. ¹² Ewon hohoi iko eyihina ania, tania eŋere hohoi ikyanari. ¹³ Ebeŋ hohoi era ihwa Mose al imuhok’to omom honyi jo oŋida laati Israele obeŋi igonyuni esidi ono akwatan an allaŋ’to. ¹⁴ Ati odwari atajya hosi nyo many iko ahana al ihenie isi Ecorit Amarwani arasa emuhi jihosi, nyo obeŋi isi omijani jo iduhu Kristo emuhi addi. ¹⁵ Afe, many iko ahana al ihenie isi awaraga ono Mose imuhoni atajya hosi. ¹⁶ Ati al iloit obo atulo ataji honyi jyo Hobu, iduhuni emuhi addi. ¹⁷ Ihwania ara Hobu alya Oloyiri, bwo jyo amaji an awanari Oloyiri olo Hobu owon ahohina. ¹⁸ Ati hohoi daŋ to omomite hun obeŋi imuhoi, etahutak hohoi akwatan ono Hobu ihwa amiraya. Bwo Hobu al ara’to Oloyiri iloico inyi hohoi oŋitek daŋ irari ihwo inyi.