¹ Oŋida ani etadara ati obeŋi adi omuk erre ofwonni yiji ta etadara hoŋ. Ati ekyana ni te erigya iko erre hun italeyo Hobu jihoŋ. ² Amijak ni obo atulo itwa Kristo bwo ihwania allaŋi aŋasi ’tomon haŋwan many te ninya akafarik inyi idou etahunihi; kuyya ara ta ahwan honyi kuyya obeŋ, abeŋ ni amijak ati Hollum omijak. ³ Bwo fe amijak ni atulo olo, kuyya ta ahwan honyi kuyya obyaŋara ta ahwan honyi an akafarik inyi idou imaji Hollum,d abeŋ ni amijak ati Hollum omijak. ⁴ Itaniŋu inyi erre hun obeŋi tulo oremik ikyanari. ⁵ Etahuyo adi ni te eram ania, ati ettallik ni itahuyo ahwan hoŋ arari te elihita hoŋ. ⁶ Ati kuyya awak ni itadara, abeŋ ni esita nyo ekyana ni nelahode. Ati abeŋ ni etadara ŋadi obo igigilo toni jo ayyu ni agalik ehanita hoŋ kuyya ekyanita hoŋ. ⁷ Ati isyori jihoŋ ekwai ihwan hoŋ jo oŋida ani abeŋ etadara te erre hun obolori’to hun italeyeuni jihoŋ. Ara ekwai ania efahata olo Sitan ittigemyere ani jo oŋida ani abeŋ etadara bebe. ⁸ Enyyahita hunihoi amojo ni jyo Hobu iyari ariŋ ania addi jihoŋ. ⁹ Ati ojo inyi jihoŋ, Oremik amehino hoŋ jihoi, nyo italeyehini adwaran hoŋ te elihita hoi. Tania amuno ni itadarari te elihita hoŋ, jo oŋida agolon ono Kristo odulo jihoŋ. ¹⁰ Tania te eram ono Kristo amuno ni te elihita, te edyahita, te erre hun ogoli’to, te ettigemita, iko te ejiriŋita, nyo al elik ni agol adi ni. ¹¹ Ekyana dwo ni ihwa olosita nyo ittadduhyete tai ani. Oyyu dwo al ikyanati tai on oyyu’to toni, nyo abeŋ ni amuta jyo lefahat hulya hul obolori’to, dwadi ara ni atulo asai. ¹² Nyo ehanio ni etamijanita ihiji hatai huno lefahata al ara’to ahode. Ehanio ni isi ta adihan, te edwariti, te elihita, iko te egyamita hun obolori’to. ¹³ Aŋai imutarata tai jyo eklesyahyen omuk arari ta abyaŋan hoŋ ittigemyo itai imojuniere agurusi? Obusana ani te epali hoŋ ana. ¹⁴ Imijyete, ara ana enyyahi etahunihi an ajo ni attu adi ni jihatai. Ati abeŋ adi ni ettigemyo itai imojuniere agurusi nyo abeŋ ni attifya ebariti hatai, ati attifya ni itai ta ahwattek hatai. Nyo obeŋi aduri ottunani erre jyo esyok hosi ati oŋida esyok ottunani jyo aduri. ¹⁵ Tania amuno ni isyoryere asaŋ hoŋ iko ahwan hoŋ to oloyirihyen hatai. Kuyya amuno ni itai agalik, ottu adi amuno hatai jihoŋ mutari? ¹⁶ Dwadi abeŋ ni ettigemyo itai imojuniere agurusi, ati ojori omuk jo, ara te enyobyo iko agesemi an apocouniere ni erre jihatai. ¹⁷ Apocou ni omuk ebariti ta laati hunya efak ni jihatai? ¹⁸ Efak nya ni Tito ilari jihatai iko illa abotye. Opocou Tito ebariti hatai? Obeŋ. Nyo egyama hohoi ta ataji abotye bwo fe orrijori ehanita hohoi. ¹⁹ Igigiloti tai jo ewwaha dwo ni elyeti hoŋ ihosyere hatai? Obeŋ, ati ekyana ni ihomom Hollum to Kristo. Itai hul amuno ni, ekyana ni erre daŋ itaboloryere itai. ²⁰ Nyo abaŋ ni ŋadi attu ni nyurana itai ihwa abeŋ ni awak, bwo itai inyurana ani ihwa ibyaŋata tai iwahata. Abaŋ ni ŋadi anyurak ni ihiji hatai aŋalafa, ahaini, ajore, abwanya, amwaŋa, arrosyo, etadara, iko abahyo. ²¹ Abaŋ ni ŋadi al acohuno ni itiloriri adi Hollum ani ihiji hatai, bwo attu ni jiriŋa ta laati omuk hunya iyyauni’to iko hul obeŋi’to iloiti atajya hosi addi jyo ebotita iko esomiti bwo arrohojita hunya ihanie isi.