¹ Awak ni oŋida itai edihu ikoŋ al ekyana ni ekyanita hun ofyahaji kai. Odihuna yo. ² Nyo ahain ni tetai ta ahaini ono Hollum, nyo acorok nya ni itai jyo habi abotye, jo oŋida ani esyo itai jyo Kristo ihwa odwoti on olibo’to. ³ Ati abaŋ ni, nyo ihwa inyobyo nya amunu Eva te elofere honyi, ŋadi inyi orihoro egigilita hatai addi jyo namuno on olibo’to an imunoti tai Kristo ta atajya hatai daŋ. ⁴ Nyo kuyya ottu obo atulo ittiyeniere Yesu ol olufa jyo lya al ettiyenio hohoi, idihuna tai inyi. Kuyya ifwotuna tai oloyiri ol olufa jyo inya ifwotuna tai, oyyu ana jihatai. Kuyya iruhoto tai asayyo hun olufaji jyo hunya iruhoto tai, awahi atajya hatai ana bwo fe. ⁵ Egigilo ni abeŋ ni amuta jyo lefahat hulya hul obolori’to. ⁶ Dwadi ettallik ni ekyana on oyyu, obeŋ amijana hoŋ omuta. Etahutak hohoi ana jihatai te ekota daŋ iko te erre daŋ. ⁷ Epal ni al etafyaha ni ahwan hoŋ bwo etabolo ni itai te ettiyenio hoŋ jihatai asayyo huno Hollum ta abyaŋan idumit? ⁸ Ahoru ni ebariti iklesyahyen omuk nyo efwotu ni agurusi hosi igyamari jihatai. ⁹ Bwo fe ninya awanari ni ikatai ololocaŋ abeŋ nya ni efiyo omuk erre jyo obo atulo, nyo isyori illarak hul ofwonni’to to Masedonia erre hun awak ni. Abeŋ nya ni efiyo omuk erre jihatai, bwo fe abeŋ adi ni efiyo itai. ¹⁰ Ihwa owon nelahode ono Kristo itwa hoŋ, ahode omijani adi aati daŋ hutta fau Akaya eram ana. ¹¹ To nyo? Nyo abeŋ ni amuno itai? Omijak Hollum jo amuno ni itai. ¹² Bwo fe erre hun ehanio ni, adulo adi ni ihanio itihyere hya hul itadarai ta ajaran hosi jo, egyama isi ihwa hohoi. ¹³ Arai laati hya efahat hul inyobye’to iko egyamak hul inyobye’to, nyo ojori isi era isi lefahat hulo Kristo. ¹⁴ Ebeŋ hohoi ellilliha ta ania, nyo Sitan ta ahwan honyi olwo ihwa anjelo olo afaŋan. ¹⁵ Tania obyaŋara eram ono ellilliha kuyya inyobye legyamak honyi ojori, era isi ahegyamak hulo ayiji. Osiru adi jihosi aŋoco te ehanita hosi. ¹⁶ Enyyak ni ikyana, helaha obo igigilo jo esita ni, ati kuyya igigiloti tai ihwania odihuna ani kai jo oŋida ani etadara kai. ¹⁷ Erre hun ekyana ni abeŋ ni ekyana te etaleyeuna ono Hobu, ati ekyana ni te etadara ihwa olofyaha. ¹⁸ Nyo itadarai laati arryai te erre huno ahwattek, ekyana bwo fe ni te etadara. ¹⁹ Igigiloti tai jo itai aloferejok ati itaniŋuna tai jo hya hul isitaji’to. ²⁰ Nyo kuyya ihanak obo itai apiti idihuna tai, kuyya ohoru inyi asaŋ hatai, kuyya inyobyo inyi itai, kuyya itadara inyi ta ahwan honyi, kuyya anaŋyo inyi omomite hatai, idihuna tai daŋ. ²¹ Ekyana ni te eloriri nyo ara ihwa elik nya hohoi. Ati al oremik obo atulo iŋere te erre omuk aremik bwo fe ni iŋere ati ekyana ni ihwa olosita. ²² Arai isi laati Ebrei? Ani bwo fe. Arai isi ahulo Israele? Ani bwo fe. Arai isi hutto woyo ba Abramo? Ani bwo fe. ²³ Arai isi legyamak Kristo? Ani bwo fe al agalik isi, ati ekyana ni ihwa olosita. Agalik ni isi bwo fe te egyamita arryai, te efitita ibabus enyyahita arryai, te ebahiti arryai, bwo ilyaha naye jihoŋ enyyahita arryai. ²⁴ Enyyahita miet efwotu ni ebahiti atomwana hunihoi hohottoŋwan ta alyoto Yudea. ²⁵ Enyyahita hunihoi abahye laati ani te elluhi. Enyyahi abotye irwoŋye isi ani ta amorwoi. Enyyahita hunihoi awon ni ibabur al isyak inyi amorwo ette dyoro itwa hari. To oloŋ abotye iko arwe daŋ iyaro afolyahita hari ani ihari. ²⁶ Enyyahita arryai adaha ni ihiji hirre hun oyeyeri’to. Ayeyeri to haryak, ayeyeri to hahalak, ayeyeri to wati hoŋ, ayeyeri to paganohyen, ayeyeri imiji, ayeyeri imur, ayeyeri ihiji hari on obolo’to, bwo fe ayeyeri ihiji wati hul inyobye’to. ²⁷ To oŋitek arryai egyama ni bebe iko ettigemyo on obolo. Ta arwejin arryai abeŋ ni ajoto. Adaha ni iko ahure bwo eboti hari, ta aferuna gaga, bwo fe ta acoro iko ta abyaŋan boŋojin. ²⁸ Owoni erre huna daŋ ilet, ati agalik ana, owon jihoŋ etahawwayo ono eklesyahyen oŋitek daŋ. ²⁹ Kuyya ilik obo, abeŋ ni elik bwo fe? Kuyya okwaharo obo, abeŋ ni ejiriŋa bebe? ³⁰ Kuyya oŋida ani etadara, etadara adi ni te elihita hoŋ. ³¹ Hollum al ara Monye Hobu hohoi Yesu al itahuye tulaŋ, omijak inyi abeŋ ni agesem. ³² Imiji Damasko owon eleittok olo hobu Areta al irrirrya amiji Damasko inefuniere ani, ³³ Ati itusuruni illarak ani ta agufa te ettulit lohitir, ette ni fuho to miji.