¹ Ani Paulo iko Silivano ojo Timoteo, egyorok hohoi jyo eklesya otto miji Tesalonika, on owon’to jyo Hollum Monye iko Hobu Yesu Kristo. Ijara amehino hatawana jihatai iko nelik tajya. ² Edulo hohoi esyoryo ahumo jyo Hollum tetai daŋ, bwo eleco hohoi afureta hatai ta amojo hohoi. ³ Ihosyere Hollum Monye hohoi edulo hohoi agiluta egyama hatai ono neruk, bwo ehanita hatai huno amuno, iko neyihina hatai on odulo’to fur jyo Yesu Kristo Hobu hohoi. ⁴ Illarak hul omuno Hollum, emijak hohoi jo onyimu inyi itai. ⁵ Obeŋi nya asayyo hun oyiji’to hunya ettiyenio hohoi afanyi jihatai ta nekyanita hama, ati afanyi isi jihatai ta adwaran iko to Oloyiri ol Olibo iko ta amijana ahode. Imijana tai aŋai egyama hohoi tetai ihiji hatai. ⁶ Bwo ijifatyete tai hohoi iko Hobu nyo ifwotuna tai ettiyenita ta namuno on ottu’to jyo Oloyiri ol Olibo, dwadi ofwonni ettigemita hun obolori. ⁷ Tania irata tai ahetamijanak jyo eruhok daŋ hulo Masedonia iko hulo Akaya. ⁸ Nyo tetai ohu nekyana ono Hobu many jyo Masedonia iko Akaya. Obyaŋara imisihi hunia hama, ati ohu eram ono neruk hatai jyo Hollum imasik daŋ. Tania ebeŋ hohoi ekyana omuk erre tetai. ⁹ Nyo isi ta ahwattek hosi itahutani isi aŋai ifwotuna tai hohoi, bwo aŋai ibusana tai arrijorihyen ittata yito jyo Hollum, igyamari jyo Hollum leswoni iko lahode. ¹⁰ Bwo itilatyete tai attuna ono Lonyi honyi t’edou, linya itubuhu inyi to ye, inyi Yesu al italahu’to hohoi to jore on ottu adi.