¹ Ani Paulo inya iloŋuni ta awahan ono Hollum irari alefahata olo Yesu Kristo, iko Sosetena illa hohoi. ² Egyoro hohoi jyo eklesyav ono Hollum otto miji Korinto; jyo laati hul ittaŋani jyo Yesu Kristo bwo fe iloŋo inyi isi irari awati honyi, iko laati daŋ imasik daŋ hul iloŋoi ta afure ono Yesu Kristo Hobu hohoi iko Hobu hosi. ³ Ijara amehino hatawana jihatai iko nelik taji on ottu’to jyo Hollum Monye hohoi iko jyo Hobu Yesu Kristo. ⁴ Ajo ni humo jyo Hollum hoŋ oŋitek daŋ tetai ta amehino ono Hollum an isyori jihatai to Yesu Kristo, ⁵ nyo ofonik inyi jihatai ofyoro daŋ iko ekyanita ikyanari on oyyu. ⁶ Tania imijana tai ta atajya hatai jo ara eram ono Kristo ahode. ⁷ Bwo fe ibyaŋata tai ipwahitati omuk esyorita huno Hollum al itilati tai te etaleyehina ono Hobu hohoi Yesu Kristo. ⁸ Bwo fe itagolyo inyi itai many isidi, jo oŋida obeŋi onyurani epali jihatai iholoŋ ono Hobu hohoi Yesu Kristo. ⁹ Obeŋ Hollum itapwak ecoriti honyi jihatai bwo fe iloŋo nya inyi itai irryahiniere iko Lonyi honyi Yesu Kristo Hobu hohoi. ¹⁰ Elolya ni jihatai illarak hoŋ ta afure ono Hobu hohoi Yesu Kristo, jo oŋida itai ikyanati ta ataji abotye bwo fe oŋida obeŋ abwanya ihiji hatai. Oyyu kuyya inosoniete tai arabotye iko ataji abotye bwo fe te egigilo abotye. ¹¹ Nyo illarak hoŋ, iramani hutta haŋ ba Kloi jihoŋ jo owon aŋalafa ihiji hatai. ¹² Bwo ara ana eram an ekyana ni nyo ijatta tai daŋ ababo ojo, Ani ejifani olo Paulo, bwo obo ojo, Ani ejifani olo Apolo kuyya bu olo Kefa,w bwo obo ojo, Ani ejifani olo Kristo. ¹³ Owon abwanya jyo Kristo aŋaco? Isihoni nya Paulo tetai? Ibatisye itai ta afure Paulo? Obeŋ. ¹⁴ Ajo ni humo jyo Hollum nyo abeŋ ni ebatisyo omuk hulatai arari Krispo iko Gaio, ¹⁵ ŋadi obo ojo efwotu inyi batisimo ta afure hoŋ. ¹⁶ Bwo fe ebatisyo nya ni hutta haŋ ba Setefano ati egigilo ni abeŋ nya ni esyo batisimo jyo obo. ¹⁷ Obeŋ nya Kristo ani ifak ibatisyere ati ifak inyi ani ittittoyere asayyo hun oyiji, obyaŋara te ekyanita huno ofyoro ati ara ta adwaran ono naye Kristo ikruce. ¹⁸ Nyo arai asayyo huno naye Kristo ikruce etabuyaŋyo jyo laati hul ofwoi ihima, ati jihohoi hul italahuni ara inyi adwaran ono Hollum. ¹⁹ Ihwa igyoroni ojo, Etapwak ni olofyoro huno alofyorok Bwo fe etabeŋ ni amijana ono amijanak hirre.” ²⁰ Tali alofyorojoni? Tali legyoroni? Tali attifyani olo ofyoro huno nelahaji ana? Itisita Hollum ofyoro huno aati hutta fau ana. ²¹ Ihwa ocorok Hollum beryen, ittallihi aati hutta fau mijana Hollum to ofyoro hosi. Tania omuno Hollum italahuniere hul iruhi’to te ettiyenio on ojori laati ibuyaŋa. ²² Nyo ottifyai aati Yudea etamijanita bwo aati Grik ottifyai ofyoro ²³ ati ettittoyo hohoi eram Kristo inya isihoni, al ara ihwa amorwo an ikosotyarik Yudea, bwo ara neram honyi ihwa erre sita jyo Grik. ²⁴ Ati jyo hul iloŋuni, kuyya Yudea kuyya Grik, ara Kristo adwaran ono Hollum iko ofyoro honyi. ²⁵ Nyo dwadi igigiloi aati jo isita Hollum, agalik inyi ofyoro wati. Bwo fe dwadi igigiloi aati jo ilik Hollum, agalik inyi agolon wati. ²⁶ Illarak hoŋ igigiloti te eloŋuna hatai, nyo obeŋ Hollum iloŋo laati arryai hul ilofyoroji’to te erre hutta fau ana. Obeŋ inyi iloŋo laati arryai hul arai ahobwok. Obeŋ inyi iloŋo laati arryai hul arai eleittaha. ²⁷ Ati onyimu nya Hollum aati hul isitaji’to te erre huno afau ana itiloririjyere hul ilofyoroji’to. Onyimu Hollum bwo fe hul ilihi’to jyo afau ana itiloririjyere hul ogoli’to. ²⁸ Onyimu Hollum aati hul arai’to asai jyo afau ana bwo fe hul omyanai laati. Onyimu inyi bwo fe hul ofyahaji’to itatturyere hul ogoli’to. ²⁹ Tania ittallik obo atulo itadara ihosyere Hollum. ³⁰ Ati tenyi iwanata tai itwa Yesu Kristo, nyo ihanak Hollum inyi irari ofyoro hohoi iko abisan hohoi iko alibori hohoi ojo etalahuna hohoi, ³¹ ihwa igyoroni igyerita, “Alya al itadara’to ijara inyi itadara to Hobu.”