¹ To far lo mietauni i lolongu Moses Aron ko tee kunenge ko lohitwaha kulo Israel. ² O rihohi inyi Aron o joo, "To dumu kace mongo lo kiciorita lo kipal nino ko mongo lo ker lo kiciorita locurat nino. O jir icieng fad o ru madati, i yauno ketemoni lo Lahitok. ³ Ito hati i rihohi cio kulo Israel i joo, ' Ito dumu kore lo kiciorita lo kipal ito hati manyu i dumu kace ko kito lo ker kuna lara kari lobito o jir icieng fad o ru ko madati ara kiciorita locurat, ⁴ ko mongo ko mongo lo ker ara kiciorita lo kimoraru kulo ki fotohino diho Lahitok ara lobito ko kiciorita kuna lara ngamang i karuto to ngoroni. Tonyio o boto cia Lahitok diho ite elefar. ⁵ I yaru icieng kuna sangite lo cik Moses ketemoni lo kema lohiricore manyu o fwonu ilulung fad o nyihuni o woitati ketemoni lo Lahitok. ⁶ Tinyia o joo Moses, "Ara ene tohi na lo cik Lahitok o joo o jir ite i tiyi, o jir deyo lo Lahitok o botore diho ite. ⁷ O joo Moses diho Aron, "Ou ciali i fotohi kiciorita lo kipal nino ko kicwara locurat nino o jir i pul ken nino ko cio; i fotohi kiciorita na lara lo cio o jir i pul icieng iya na lo cihare Lahitok. ⁸ Tona o lotu Aron ciali o ngot kace ara kiciorita lo kipal lo ken nenge. ⁹ I yauno tee kunenge okoto diho inyi oto inyi i dutohi kafiele iyo okoto o twehi muriaha kulo ciali, otonge lo okoto fad i juhohi inyi fotiri lo ciali. ¹⁰ To ciali o curahi inyi somia, talangur ko kirafi lo munya lo na kiciorita lo kipal iya na lo cik Lahitok Moses; ¹¹ tyang ko cioni nenge o cure inyi to oleng lo kem. ¹² Oto inyi ko ngoto kiciorita locurat. I ciorihi tee kunenge inyi okoto, o rwacahi inyi ngatihin kulo ciali fad. ¹³ I cio icieng inyi kiciorita locurat to fajihit to lobito to lobito ara lobito ko kue o curahi inyi fad ciali. ¹⁴ I lal inyi sangite kulo kocehe ko meselek to kifi o fik kai lo kiciorita locurat o curahi fad ciali. ¹⁵ Oto Aron i yauno kiciorita na lara lo cio. O dumu inyi kine na lara kiciorita lo kipal lo cio ko ngoto ko ki fotohino ara kiciorita lo kipal iya lo adi lo ketemoni. ¹⁶ I yauno inyi kiciorita locurat i fotohi iya na lo ciharehin. ¹⁷ O dumu manyu inyi kiciorita na lara ngamang o ngonyu i fut kana o curahi ciali o sodohi iyo kiciorita locurat lo kiwanyi. ¹⁸ O ngot inyi mongo ko mongo lo ker ara kiciorita lo kimoraru lo cio. I fotohi tee kunenge inyi okoto, o rwacahi inyi ngatihin kulo ciali fad. ¹⁹ Ati fajihit kuna i firi kulo mongo ko kulo mongo lo ker; tima, irafuhin kulo somia, talangur ko kirafi lo munya. ²⁰ i cadohohi icieng iyo locolo manyu o curahi Aron somia ciali. ²¹ Iti lorahi Aron locolo ko bongbong iteten ketemoni lo Lahitok ara kiciorita lo kitilora iya na lo cihare Moses. ²² Tinyia o ting Aron kac iya ngati lo cio ko ki gatahino icieng. Manyu langun li fotohi inyi kiciorita lo kipal, kiciorita locurat, ko kiciorita lo kimoraru, i culuno inyi. ²³ O fwo dong oho Moses ko Aron katua lo kema lohiricore. Ojo icieng o rutu oleng, i gatahi icieng cio manyu o boto deyo lo Lobanga diho cio fad. ²⁴ O lotu kima to ketemoni lo Lahitok ko keruno curaru kiciorita locurat ko fajihit kuna i firi kuno lo ngoni ciali. Manyu ka lo deu cio fad na kima, ko ki gororo to kwama ko urohinoti kof lorubuhe.