¹ O joo Lahitok diho Moses, ² "I yauno Aron ko tee kunenge, kyelani kuneicieng, ngoroni kitweita, mongo lo kiciorita lo kipal, mongi kulo kera are ko akuhu na lo ngoni mugati kuna lida i karuti to ibula katua, ³ ito hati i tubu ilulung fad lokoli lo kema lohiricore." ⁴ I tiyi Moses iya na lo cihare Lahitok inyi manyu o tubuno ilulung lokoli lo kema lohiricore. ⁵ O joo Moses diho ilulung, " ara ene tohi na lo cik Lahitok o joo o jir i tiyi." ⁶ Oto Moses ko ki yauno Aron ko tee kunenge ketemoni i lal icieng to kifi. ⁷ O pucahi inyi kanyi diho Aron ko torahino kitodita komoc nenge ko ki iti ciefohino inyi kyela na i joro ko ki burahino inyi kol lo kyela. Inyi ko torahino kol lo kyela ken nenge to gas lo kyela na li kadi iti bibili to kigingi. ⁸ O fik inyi ogogor lo locolo ken nenge ko fiha Urim ko Sumim iyo ogogor lo locolo. ⁹ Oto ko pucahino turubuc kue lo Aron ko ranyahino na sahan lo dahab kitikangani na i nyu komom lo turubuc iya na lo cihare Lahitok Moses. ¹⁰ Tinyia o dumu Moses ngoroni kitweita, ko twa lomanyare ko sangite fad kuna lo ngoni katua, tona ko ki iti nyujo icieng. ¹¹ O rwacahi inyi ngoroni lobo iyo ciali kakeny mietare. O twe inyi ciali ko sangite kunenge fad ko besen ko kitiwoita nenge lo ki iti nyujo icieng. ¹² I juhohi inyi ngoroni lobo kue lo Aron lo twa inyi ko lo ki iti nyujo inyi. ¹³ Oto inyi ko ki yauno tee kulo Aron ketemoni ko pucahino kanyihin kenite kuneicieng ko torahino kitoditi komoci kuneicieng ko torahino tambarahin kulo kueci iya na lo cihare Lahitok Moses. ¹⁴ Oto inyi ko ki fotohino mongo manyu o fik Aron ko tee kunenge kac kue nenge. ¹⁵ O ngot Moses mongo o dumu okoto kunenge kude o dutu to kafiele nenge o twehi iyo muriaha kulo ciali fad lo ki iti nyujo ciali. I juhohi inyi otonge kulo okoto fotiri lo ciali. To na iti nyu inyi ciali manyu o pul. ¹⁶ O dumu manyu Moses somia lo katua lo kocehe fad na lo raf munya ko talangur are fad ko somia neicieng ko curahino ciali. ¹⁷ Ati mongo ko cioni nenge ko tyang ko monyi kunenge fad o curahi inyi oleng to kem iya na lo cihare Lahitok. ¹⁸ O dumu dong inyi mongo lo ker na lara kiciorita locurat o fik Aron ko tee kunenge kac kue nenge. ¹⁹ Oto Moses o ngot mongo lo ker o rwacahi okoto nenge ngatihin kulo ciali fad. ²⁰ I ngongot inyi na mongo lo ker ko curahino kue ko tyang ko somia. ²¹ I lal inyi sangite kulo kocehe ko meselek to kifi ko curahino mongo lo ker fad ciali ara kiciorita locurat na li iti kwama uron nenge, kiciorita na li fotohini diho Lahitok to kima iya na lo cihare Lahitok Moses. ²² O dumu dong inyi mongo lo ker lobito na lara lo kikwera o fik Aron ko tee kunenge kac kue nenge. ²³ O ngot Moses na mongo lo ker o dumu okoto nenge o dutohi tadati lo kiyok lo Aron ngati lo iteten, kafiele nahitok lo kana iteten ko kafiele nahitok lo keju iteten. ²⁴ I yauno manyu Moses tee kulo Aron ketemoni ko dutohino okoto lo na mongo lo ker tadatihin kulo kiyoha kuneicieng iteteni, kafiela kunahitoha kulo kac iteteni ko kafiela y kulo kejuha iteteni kuneicieng. Ko rwacahino okoto ngatihin kulo ciali fad. ²⁵ O dumu inyi somia; tima ko somia lo katua lo kocehe fad na lo raf munya, talangur are fad ko somia na lo raf icieng ko bongbong iteten. ²⁶ Oto hati o dumu mugati iyo akuhu lo mugati kuna lo ru ibula na lo ngon ketemoni lo Lahitok, o dumu mugati ko lobito na lo yeri to ngoroni ko lobito na i gerewe o fik kai lo somia ko bongbong iteten. ²⁷ O fik kuna fad kac kulo Aron ko tee kunenge iti lor icieng to ketemoni lo Lahitok ara kiciorita lo kitilora. ²⁸ Oto Moses ko dumuno kuna sangite to kac kuneicieng o curahi ciali kai lo kiciorita locurat ara kiciorita lo kikwera na li iti kwama uron nenge, kiciorita na li fotohini Lahitok to kima. ²⁹ O dumu manyu locolo kicait lo Moses iyo mongo lo ker lo kikwera iti lor to ketemoni lo Lahitok ara kiciorita lo kitilora iya na lo cihare Lahitok Moses. ³⁰ Moses ko dumuno lobo iyo ngoroni kitweita ko lobo okoto to ciali o rwacahi ken lo Aron ko kyelani kunenge ko kenite kulo tee kunenge ko kyelani kuneicieng. To na iti nyu inyi Aron ko kyelani kunenge ko tee kunenge ko kyelani kuneicieng. ³¹ Oto Moses ko jimitan diho Aron ko tee kunenge, "Iti yerihi na tyang to lokoli lo kema lohiricore i nyia tijia ko mugati to akuhu lo kiciorita lo kikwera iya na la cihare nan a joo, 'O jir Aron ko tee kunenge o nyia ' ³² ito hati i cure otonge lo tyang ko mugati. ³³ Ke fwo to agwala lo kema lohiricore many o ru faritin mietare kulo kikwera ningi, tonyio i yaru cia kikwera ningi faritin mietare. ³⁴ Ene tohi li tiyi enefar ara na lo cik Lahitok ara lo pulore ite. ³⁵ O jir ite i tongo agwala lo kema lohiricore faritin mietare karue ko far manyu i tiyi tohi na lo wak Lahitok o jir ida i wei, tonyio tohi na lo cihi nan inyi na. " ³⁶ Tona i tiyi Aron ko tee kunenge sangite fad kuna lo cik Lahitok Moses.