¹ O joo Lahitok diho Moses to kai lo donge lo Sinai, ² "To tenya ko cio kulo Israel tijio diho icieng, ' Ka li rute ite nu kof lahi cwara nan ite, o jir manyu kof to ken i kwer Sabit diho Lahitok. ³ To karihin ile ito yi kinyiemo kuningi manyu to karihin ile i bubusoto vinorehin kuningi manyu ito dengu daha nenge. ⁴ Ati to kari lo mietangon o jir kof o rumu sabit lo kiyoma nenge, Sabit diho Lahitok. Ke yi kinyiemo kuningi kode i bubus vinorehin kuningi. ⁵ Ke deng daha ciefat kuna lo buju ake kode i dieu vino kulo vinore nino na lida i kukumi. O jir kof o rumu kari lo kiyoma. ⁶ Tohi na lo doru to kof to ene kari lo Sabit i tongo cia ara daha diho tee - iyo isi to ken nino iyo karwaani nino retoni, iyo karwaani nino ngorwani ko tungani na li tiyo lejeleje ko misiok kuna lo manya kiji ningi, ⁷ ko diho sang kuningi ko tyangi kulo mwang to kof ningi. Tohi na lo doru to kof i tum ite daha. ⁸ I kene sabiti mietare kulo karihin - karihin mietare kakeny mietare o jir kuna sabiti mietare kulo karihin o fwonu ara karihin keek ongon ko mietangon. ⁹ Ito hati i cio o kuti turena to fajihit fad to far lo tomon lo ofa lo mietare iyo far lo pulo, ito kut turena to kof ningi fad. ¹⁰ Iti nyujoto kari lo keek miet manyu ito rihohiti laharu iyo cio kulo kof fad. I tongo cia ara Jubili diho ite, o jir lobito lobito o yite iyo kof lo kaji neicieng manyu lobito lobito iyo imanit nenge. ¹¹ O jir kari lo keek miet ara Jubili diho ite, ke yi kinyiemo manyu ke dengu tohi na lo doru to kof kode dia ngak kulo vinore na lida i kukumi. ¹² Tonyio i tongo kof ara Jubili o nyu diho ite, ito dahati tohi na li yauni to mwang rierie. ¹³ Iyo ene kari lo Jubili o jir tungani lobito lobito o yite kalenge iyo tohi na lara nenge. ¹⁴ Ka li iti lotohi isi kof iyo lobo tungani lo kof ningi kode i nyiangu lobo diho inyi, ke iti mumunaru. ¹⁵ O jir i nyiangu kof diho tungani lo kof ningi i tetemahi ko wel lo karihin kulo Jubili, o jir manyu inyi ki iti lotohi isi i tutumohi ko karihin kuna ngi dengunore isi daha to na kof. ¹⁶ Ko lo borengi karihin o jir manyu wel o sodo, ojo manyu karihin i kuting o jir manyu wel iti ri. Tonyio tohi na li iti loto inyi diho isi ara bolojun lo daha na ngi dengu isi to na kof. ¹⁷ Ke iti mumun kenite ati o jir ite i bang Lobanga. Nan Lahitok Lobanga ningi. ¹⁸ I jifata tenyitenyi kunei manyu iti geny iyo ningo cihicihi kunei ito cia ite i manya to kisiliban manyu ara na i jir kof. ¹⁹ Oto cia kof o doru ngak kunenge manyu i daha cia ite i moneho manyu i manya to kisiliban. ²⁰ I tum ite ki tifia i joo, ' nyio hati cia ki daha ohoi to kari lo mietare ka lida ohoi ki remo kode ki iti bul kinyiemo? ' ²¹ A culu cia nan gum iyo kari lo ile na li cio kof o doru daha na ngo tum to karihin uni. ²² Ka li fwonu ite remo iyo kari lo mietauni i daha cia ite ngamang ongoro manyu i wasihi cia ite daha icieng many ngamang kulo kari lo mietangon o rumu. ²³ O jir kof ida iti lotori tur tonyio ara kof nei manyu ira ite kamanyak ko karwaak kunei. ²⁴ To kof fad na li tehita ite ara ningi o jir ite i tiyo to laharu lo kof. ²⁵ Ka li kilwaha lobo tungani lo kof ningi oto hati iti lote lobo kof nenge o jir lokajimonye na i nyiha noo o lotu iti lak tohi na li iti lote lokajimonye. ²⁶ Ojo manyu ko lo ru inyi ko tungani na ngi iti lahahi inyi oto hati manyu inyi lo rumu bara manyu o tehita sangite kuna lo tum kitilaha, ²⁷ o jir inyi o de wel lo na kof many to na li iti lotorore inyi, i nyiahahi otonge iyo na tungani li iti lotohi inyi, o tum dong inyi yitoro iyo kof nenge. ²⁸ Ati ka lida inyi o rumu robia kuna ngi nyiahahi inyi iyo inyi, o jir na kof i tongo ara lo na kanyiangani many kari lo Jubili o yitorore hati inyi iyo kof nenge. ²⁹ Ka li iti lote tungani kaji na lo ngon kang na lo lia to lohitir, o rihe inyi o ngon ko golun lo kitilaha to kari lobito lo lohi iti lorore nenge, to kuna faritin o tum inyi ki iti laha kaji nenge. ³⁰ Ka lida iti lahi langun lo keru kari lobito, na kaji to kang na lo lia to lohitir ko rahun lo kanyiangani ko lotataha kunenge tur ida o tumiti ki nyiaharu to kari lo Jubili. ³¹ Ati kajihit kuna lo ngoni kangite kuna lida o lia o ri iya kof na i wat o tumiti ki iti laha icieng kode ki nyiahahino to kari lo Jubili. ³² O ngon cio kulo imanit lo Levi ko golun lo kitilaha kajihit kuneicieng to kangite kuna lara kuneicieng. ³³ Tona ara sangite kulo cio kulo imanit lo Levi kuna lo tumiti ki iti laha - inyi jimitan kajihit kuna li iti lote icieng to kang na lara neicieng manyu o tumiti ki nyiaharu iyo kari lo Jubili tonyio kajihit kulo cio kulo imanit lo Levi kuna lo ngon kangite kuneicieng, icieng lara sangite kuneicieng to kiji lo cio kulo Israel. ³⁴ Ati lodahare lo sang na li rit kangite kuneicieng ida ara lo kitiloto, ara kof neicieng tur. ³⁵ Ka li kilwaha lobo tungani lo kof ningi ida o tum lwaha ken nenge to kiji ningi, ito lwak inyi iya na ngi lwahare misiohoni kamanyani kode katimanyani o jir inyi o sodoro warun kiji ningi. ³⁶ Ke dumu lobo murucan to ken nenge ati to bang Lobanga nino o jir tungani lo kof ningi o sodoro warun kiji ningi. ³⁷ O jir ite ida i kurohi inyi robia ko murucan kode iti lotohi inyi daha ko magoba. ³⁸ Nan Lahitok Lobanga ningi na lahi yauno ite to kof lo Ijipt lo ki cwara ite kof lo kanaan manyu lo rahun nan Lobanga ningi. ³⁹ Ka li kilwaha lobo tungani lo kof ningi oto hati ki iti lotohi isi ken nenge, ke cio inyi i tiyo iya opii. ⁴⁰ O jir i tiyore inyi iya tungani na li tiyo mucara kode katimanyani kiji ningi, o jir inyi i tiyo diho isi many kari lo Jubili. ⁴¹ Tinyia o jir inyi o lahahini ko tee kunenge manyu o jir inyi o yite iyo imanit nenge manyu iyo kof lo fafaicio kunenge. ⁴² Tonyio ara cio kulo Israel karwaak kunei kuna la yauno nan to kof lo Ijipt o jir icieng ida iti lotori ara opii. ⁴³ Ke lanyu icieng to kimoc ati to bang Lobanga. ⁴⁴ O jir opiihin kuningi rei ko ngorwo o fwonu iyo kofikofi kuna lohi korio ko ite, i tum ite ki nyianguno opiihin diho icieng. ⁴⁵ I tum manyu ite ki nyianga cio kuna lo manya to kude faritin kuting kiji ningi ko cio kulo imaniti kuneicieng kuna lo tomonohini kiji ningi o fwonu ara sangite kuningi. ⁴⁶ I tum isi ki cwara icieng diho tee kunino ara sangite kuneicieng lolunyot manyu i tum ki iti raha icieng opiihin to warun neicieng fad, ati o jir isi ida i lanyu Israelani kaletoni nino to kimoc. ⁴⁷ Ko lo lotu misiohoni kode kamanyani kiji ningi o bara oto hati lobo tungani lo kof ningi ikilwaha iti lote hati ken nenge iyo misiohoni na lo ngon kiji ningi kode iyo lobo tungani to imanit lo na misiohoni, ⁴⁸ o rihe inyi o ngon ko golun lo kitilahuno ken nenge to kifwongi lo kitilotoro inyi ken nenge. O tum lobo lokajimonye ki iti lahuno inyi. ⁴⁹ O tum mamanyi nenge kode iyanyi kode lobo tungani lo okoto nenge to kiji lo cio kunenge ki iti lahuno inyi. Kode ko lo bara inyi, o tum inyi iti lahu ken nenge. ⁵⁰ O jir inyi ko kanyiangani nenge i ken faritin many to na li iti lotorore inyi ken nenge many kari lo Jubili. O jir wel lo kitilaha nenge o ri ko wel na lo dumarihin tungani na li tiyo mucara to kuna karihin. ⁵¹ Ko lo tong karihin o borengi, o jir inyi o dum kitilaha nenge to robia kuna i borengi lo kuna li nyiangarehin inyi. ⁵² Ka li kutingi karihin kuna lo tong o lorore kari lo Jubili, o jir inyi i gigil na o dum laharu nenge i tutumohi. ⁵³ O jir inyi i tiyorehin iya tungani na li tiyo mucara to kuna faritin fad, o jir manyu ite i deya jimitan ida kanyiangani nenge o lanyu inyi to kimoc. ⁵⁴ Kileng ngida iti lahi inyi to kuno kikoihin, o jir inyi ko tee kunenge o lahahini kari lo Jubili: ⁵⁵ tonyio ara Israel karwaak kunei. Ara icieng karwaak kunei kuna la yauno nan to kof lo Ijipt. Nan Lahitok.