¹ Ojo Lahitok diho Moses, ² "Tocik cio kulo Israel ingohi iyauni ngoroni na ilib na lipiuni iyo nyige kulo oliv ara lo kima ojir lomohin iwasihi nohun lohisidik. ³ To oleng lo kyela kigenit na limuk sanduk lo cik to katua lo kema lohiricore, ojir Aron ikukuma lomohin ketemoni lo Lahitok many to kurou many kiwanyi, lohisidik. Ojir ene ara itidwar to kofiang kuna lofwonuno. ⁴ Lomohin kuna lotedo iyo kiniefita lo dahab na ilihinya na longon ketemoni lo Lahitok ojir ikukumati lohisidik. ⁵ To dumu kofwo kuna itinyaha ifun mugati tomon ko are, iyo mugati lobito lobito ojir iyaru kofwo lokiriehin are. ⁶ Itiparahi icieng kai lo meja lo dahab na longon ketemoni lo Lahitok idufiti are, ile iyo idufit lobito. ⁷ Iyo idufit fad tofihahi iheru na itinya ara kitiiunita ara faji lo mugati ojir ara kiciorita na lifotohini Lahitok to kima. ⁸ Ojir koditi lo ene mugati itiparahitati ketemoni lo Lahitok iya na to Sabiti fad ara faji lo cio kulo Israel ara ciharu lo tur. ⁹ Ara icieng kulo Aron ko tee kunenge, kuna lojir odahati to faji na Inyu tonyio ara na angati lo kicait lo daha neicieng na Inyu noo, ko kiciorita na lifotohini Lahitok to kima. ¹⁰ Tinyia lobo kito retoni lara iyang nenge Israelani ara apa nenge Ijiptoni ko loro iya kiji lo tee kulo Israel, tinyia iciak baha ngonun katua lo kem kiji nenge ko Israelani. ¹¹ Omor na kito lona ngorwani karana lo Lobanga to kificio, oto iyauni inyi diho Moses (Obara orumu iyang nenge Selomis kito lo Dibri lo imanit lo Dan). ¹² Otorahini inyi itilarehin ningo wahun lo Lahitok na ngorihohi icieng. ¹³ Tinyia ojo Lahitok diho Moses, ¹⁴ " Iyaroti na kamoroni oleng to kem. Ojir cio pili kuna loning inyi ofik kac kuneicieng kue nenge oto hati ilulung fad ocak inyi to morutok. ¹⁵ Tijio iyo cio kulo Israel, 'kolific lobo tungani Lobanga nenge, ongon cia na kue nenge. ¹⁶ Tungani na lomor karana lo Lahitok ojir ifadari. Ojir ilulung fad ocak inyi to morutok, kode Israelani kode misiohoni na lomor karana lo Lobanga ojir ifadari. ¹⁷ Kolodume tungani warun lo tungani kaletoni ojir manyu inyi ifadari. ¹⁸ Kalifade tungani tyang lo lobo tungani (Kiteng, kine, ker, sigiria, lonaga kkb) ojir odum warun to warun. ¹⁹ Kaliriafu tungani loryehat nenge ojir nu tohi litii inyi iyo kaletoni, itii manyu diho inyi; ²⁰ gila to gila, konyek to konyek, kale to kale. Iya na liriafunore inyi kaletoni ojir manyu itii diho inyi jii. ²¹ Tungani na lifade tyang ojir odum ati tungani na lifade tungani ojir ifadari. ²² ojir cik ara na iriworo iyo monyeri kulo kof ko iyo misiok kuna lomanya kiji neicieng. Nan Lahitok Lobanga ningi.' ²³ Oto Moses ko tenya ko cio kulo Israel iyaru icieng na kamoroni oleng to kem ko cahati inyi. Itii cio kulo Israel iya na locihare Lahitok Moses.