¹ Ojo Lahitok diho Moses, ² "Totenya ko ilulung lo Israel fad orihohi icieng ijo, ' Itinyu tonyio anyu nan Lahitok Lobanga ningi. ' ³ Ojir tungani tolobito tolobito obang iyang nenge ko apa nenge, manyu ojir ibang Sabit nei. Nan Lahitok Lobanga ningi. ⁴ Kefwo iyo Lopidingahin kode kikukuma lobangahin kulo bilieta ifwo kiwora icieng. Nan Lahitok Lobanga ningi. ⁵ Kalifotohino kiciorita lo kimoraru diho Lahitok, iciorihi iyo kikoi na lojir iruhuni ara faji nino. ⁶ Ojir onyai lafar lifotohinore isi inyi kode lobito far nenge, lobo na lotong many far lo uni ojir ocurari. ⁷ Kolonyai lobo to far lo uni lida onyu manyu ida cia iruhuni. ⁸ Tungani na lonyia otong cia na tenya kue nenge tonyio lipale inyi tohi na inyu na lifotohini diho Lahitok ojir na tungani odumari to kiji lo cio kunenge. ⁹ Kalidengo ite daha lo kof ningi, kedeng many kalelehin kulo mana kode kebabau ko logalioti kulo dengo ningi. ¹⁰ Kenyiahat dya vinore nino kakeny are kode kode kinunumo ngak kuna lodoi kof. Ingohiti kuna iyo kakilwahak, kakidahak ko misiok kuna lokoya. Nan Lahitok Lobanga ningi. ¹¹ Ke koko, ke taler, ke iti nononga kenite. ¹² Ke butia to talerun to karana nei, ito iti kaj karana lo Lobanga nino. Nan Lahitok. ¹³ Ke iti mumun loryehat nino kode iruje tohi nenge. Ke tek mucara lo tungani na litii tic nino ko kiwanyi. ¹⁴ Ke fic katuhoni kode ke fik kitihita ketemoni lo kangodoni ati to bang Lobanga nino. Nan Lahitok. ¹⁵ Ke iti gere ngoto lo tenya; ke kor kakilwahani kode ke i sisi kabarani, ati to ngot tenya lo loryehat nino ara na iriworo. ¹⁶ Ke lorita kiji lo cio kulo kalingi monga karaneco kuneicieng, ke tii lobo tohi li yauno wei iyo loryehat nino. Nan Lahitok. ¹⁷ Ke beru rece nino to tau. To rihohi loryehat nino tenya kue nenge ojir isi ida ingar loguce nenge ko inyi. ¹⁸ Ke leno kode kitifitina lobo to kiji lo cio kunino, ati imaru loryehat nino iya ken nino. Nan Lahitok. ¹⁹ Ito ric cihicihi kunei, "Ke iti koba sang kuna longoni gelegele. Ke iti bulahi koditi lo kinyiemo are iyo mana lobito. Ke cief kyela na li kadi to usihin are kuna longoni gelegele." ²⁰ Kaliyau lobo tungani kito karioni na lara opii na orumu loter lobo tungani ake ati na lo rihe ida li iti lahi kode liciori laharu nenge. Ojir iciori kitigema na i cam. Ati ida o tumiti ki fadaru icieng tonyio o rihe ida iti lahi inyi. ²¹ Ati ojir na tungani i yauno mongo lo ker agwala lo kema lohiricore ara kiciorita lo loguce diho Lahitok. ²² O jir kadwarani o pul inyi tona mongo lo ker lara kiciorita lo loguce to ketemoni lo Lahitok to kipal na li tii inyi oto cia o launi na kipal nenge. ²³ Kalifwo ite nu kof ito hati iti bulahi ciani na lo dahati ngak kunenge, iti dwara re ngak kunenge to karihin uni o jir ngak kulo na ciani iti dwari o jir ida o nyai. ²⁴ Iyo kari lo ongon ara cia ngak kunenge kuna inyuji, kiciorita lo maja diho Lahitok. ²⁵ Ati to kari lo miet i tum ite daha ngak kunenge. To ene kikoi o sodo cia dengo ningi. Nan Lahitok. ²⁶ Ke nyia lobo tyang na lo rihe o ngon ko okoto. Ke iti mohu kiyeha kode boho lo kamuha. ²⁷ Ke git fovi to kalelehin lo kueci kuningi kode ke ngut kueci kulo musula kuningi. ²⁸ Ke ngot kenite to kicira lo tungani na i wei kode fiha kingudo kenite kuningi. Nan Lahitok. ²⁹ Ke iti fajie kito nino karioni to kicwara inyi ara mulaya oto cia kof i belo ara lo kimulaya manyu i fut ko tic na i bot. ³⁰ Ito ric Sabit nei manyu iti ngon ko bangun iyo faji nei na Inyu. Nan Lahitok. ³¹ Ke fwo iyo ibwonok kode i taharu kalalamitak oto cia icieng ki iti bot ite. Nan Lahitok. ³² To woju to ketemoni lo ngoroyok i totoro bangun diho lohitwaha manyu to bang Lobanga nino. Nan Lahitok. ³³ Ko lo manya misiohoni ko ite kof ningi, ke tii inyi ara na i rohoi. ³⁴ Misiohoni na lo manya kiji ningi o jir i wori o ri ko tungani na lotomonohini inyia, i maruti inyi iya na li marunore ite kenite kuningi tonyio ira afa ite misiok to kof lo Ijipt. Nan Lahitok Lobanga ningi. ³⁵ Ke tiyore kitemihin kulo ki iti mumuna ka li tema karitan, kiryoci kode kifut. ³⁶ I tiyoreti kitemihin kuna lara kulo dede ko kitemi lo kiryoci na lara lo dede, kitemi lo ngamang na lara lo dede, ko kitemi lo ngoroni na lara lo dede. Nan Lahitok Lobanga ningi na lahiyauno ite to kof lo Ijipt. ³⁷ Ito ric tenyitenyi kunei ko cihicihi kunei manyu i jifata icieng. Nan Lahitok.