¹ O joo Lahitok diho Moses, ² "To teny diho cio kulo Israel to rihohi icieng i joo, ' Nan Lahitok Lobanga ningi. ³ Ke manya iya nu lo manyarehin to Ijipt idi afa li tongore ite, o jir ite ida i manya iya na lo manyarehin to kof lo kanaan idi lahi yaru nan ite. Ke jif koditi lo warun neicieng. ⁴ O jir ite i jif cik nitole manyu o jir i ningo tenyitenyi kunei fad. Nan Lahitok Lobanga ningi. ⁵ Ito ningoti tenyitenyi kunei manyu i jif cihicihi kunei, tonyio tungani na lo ric icieng o war cia to icieng. Nan Lahitok. ⁶ Ke cio lobo tungani o loo geto ko tungani na li kajio ko inyi. Nan Lahitok. ⁷ Ke iti kaj apa nino to loro getore iyang nino. Ara inyi iyang nino, ke getore inyi. ⁸ Ke getore ngorwani lo apa nino, ara na ki iti kaja apa nino. ⁹ Ke getore kanece nino; kode kito lo apa nino, kode kito lo iyang nino, kode o tomonohini inyia kang kode lobo faji ake. ¹⁰ Ke getore kito lo kito nino retoni kode kito lo kito nino ngorwani, ki iti kaja na koditi isi. ¹¹ Ke getore kito lo ngorwani lo apa nino na lo tomonohi apa nino, ara inyi kanece nino. ¹² Ke getore kanece lo apa nino, ara inyi tungani na i nyiha iyo apa nino - ijanyi nino. ¹³ Ke getore kanece lo iyang nino tonyio ara inyi tungani na i nyiha iyo iyang nino. ¹⁴ Ke iti kaj rece lo apa nino to loro iyo ngorwani nenge i tahita getore, ara inyi iyang nino. ¹⁵ Ke getore kokwa nino, ara inyi ngorwani lo kito nino. Ke loo getore inyi. ¹⁶ Ke getore ngorwani lo rece nino, ara na ki iti kaja rece nino. ¹⁷ Ke getore ngorwani ko kito nenge karioni. Ke getore kito lo kito nenge retoni kode kito lo kito nenge karioni, ara icieng cio kuna i nyihaha diho inyi. Ara na tic na i bot. ¹⁸ Ke dumu kanece lo ngorwani nino iti rak ara kaini lo ngorwani nino o rihe ngorwani nino o war. ¹⁹ Ke loo iyo ngorwani getore inyi o rihe o deya ofa. ²⁰ Ke getore ngorwani lo loryehat nino jimitan iti bot ken nino to inyi. ²¹ Ke pote lobo kito nino ara kiciorita diho Molek tonyio o jir isi ida i siri karana lo Lobanga nino. Nan Lahitok. ²² Ke getore retoni kaletoni iya ngorwani, i bot na. ²³ Ke getore tyang manyu iti bot ken nino to inyi. Ke cio ngorwani i cio ken nenge iyo tyang lo geto ko inyi, ara na imomol. ²⁴ Ke iti bot kenite kuningi to lobo bito iyo kuno kikoihin tonyio ara ene koditi na li iti botare kunu misiok la loro nan ki fuharu to ketemoni ningi kenite kuneicieng. ²⁵ Kileng kof li bot tona ati gem nan inyi to kipal nenge oto kof ko siearu kamanyak kulo katua nenge. ²⁶ Ati o jir ite i ning tenyitenyi kunei ko cihicihi kunei. Cio kuna lo tomonohini iyo ite ko misiok kuna lo manya kiji ningi o jir ida iti tiyi kuno ticitici i boti ²⁷ tonyio ara afa kuno sangite kuna li tiyo cio kulo na kof o rihe ite many o lotu kof i bot. ²⁸ Manyu ka li iti bot ite kof, ki siee cia ite oleng iya na lo siearare misiok kulafa li tem manya ijia diho ite. ²⁹ Tungani fad na li tiyi lobo iyo kuno ticitici i boti, o jir na tungani o dumari to kiji lo cio kunenge. ³⁰ Ito ric ifahiti kunei manyu ke jif lobo iyo kuno kitimohiti irohori afa li tiyo cio to ketemoni ningi, i fwonu manyu ke iti bot kenite kuningi ara lobito ko icieng. Nan Lahitok.