¹ Oto Lobanga ko rihohino Noa ojo, “Torute katwa lo tigol isi ko cio kulo kaji nino fad tonyio arumu nan isi ira tungani na ibir iyo ene kofiangiti. ² Yaru koditi kulo tyangi kuna inyuji to mietare, retoni ko botor nenge ko tyangi kuna lida omyuji are retoni ko botor nenge ³ manyu kweny kuna inyuji mietare retoni ko ngorwani lo ricuno koditi neicieng to kof fad. ⁴ To faritin mietare kuna lofwonuno, aculu cia nan kuju kof na locia to faritin keek ongon ko karwehin keek ongon ato cia nan afic sangite kuna iwari kulafa lafik nan ko fad”. ⁵ Otubahi Noa kitiyo sangite fad iya na locihare Lahitok Lobanga inyi. ⁶ Orumu Noa longon ko karihin kulo obolore nenge mia ile na lolotunore kifi isod kof. ⁷ Noa ko tee kilahaji kunenge ko ngorwani nenge ko ngorwo kulo tee kunenge ko rutoro katwa lo tigol lo furare inyi kifi isod. ⁸ Ofwonu tyangi kuna ijiri ko kuna idwari, ko kweny ko sangite kuna lokudita fad tare, tare ⁹ retoni ko ngorwani iyo Noa orutori katwa lo tigol iya na orumu locihare Lobanga. ¹⁰ To korwong lo faritin myetare ibul kifi isod kof. ¹¹ Iyo kari lo mia ile lo warun lo Noa, iyo far lo tomon ko mietare lo ofa lo are otwajuno kifi to katwa lo kof manyu ongaja lokolihin kulo kifi kulo kai. ¹² Oto kuju ocia to faritin keek ongon ko karwehin keek ongon. ¹³ Tona far token orute Noa ko tee kilahaji kunenge Sem, Kam ko Japet ko ngorwani nenge ko ngorwo kulo tee kunenge karwa lo tigol. ¹⁴ Ofwo icieng ko tyangi kulo mwang pili to koditihin kunneicieng ko sang pili to koditihin kuneicieng, sangite kuna lokudita to kof pili to koditihin kuneicieng, ko kweny pili to koditihin kuneicieng ko sangite kuna ifuhoho fad to koditi kuneicieng. ¹⁵ Ofwonu sangite pili kuna iwari iyo Noa orutori katwa lo tigol. ¹⁶ Tyangi fad kuna lorutoro ara retoni ko botor lo sangite kuna iwari fad iya na locihare Lobanga Noa. Oto Lobanga ko kigyenohino agwala lo tigol. ¹⁷ To faritin keek ongon osodoro kifi kifut kof, manyu iya na losodore kifi oto oting tigol kai to kof. ¹⁸ Ifut kifi many osodoro noo to kof manyu ikwanga tigol yo kai lo kifi. ¹⁹ Osodoro kifi kifut bebe many odile dongeco kuna hitoha to kof fad. ²⁰ Osodoro kifi kifut many odile dongeco to futihin kuna logal keek are. ²¹ Okeroro sangite kuna iwari to kof pili, kweny, sang, tyangi kulo mwang, sangite kuna ifuhoho fad ko cio fad. ²² Sangite pili kuna longon ko wirita lo warun kumeco kuna lorumu ongon tode lo kof ko weyaru fad. ²³ Sangite kuna iwari to kwe lo kof ko keroro fad, cio, tyangi ko sangite kuna lokudita kof ko kweny ofiaari to kof fad. Otong Noa ko kuna longoni ko inyi katwa lo tigol. ²⁴ Ifut kifi kof to faritin mia Lobito ko keek miet.