¹ Langun losodoro borengun lo cio to kof manyu otomonuni tee kariok ² odeu tee kilahaji kulo Lobanga jimitan odwaruha tee kariok kulo cio icahi nyumo kuna lowak icieng yema to kiji neicieng. ³ Oto Lahitok Lobanga ko jimitan, “Ida Okorif nei otum kisiran ko cio tur, tonyio ara icieng kuna lotum weyaru ojir dong karihin kuneicieng icung mia Lobito ko keek are”. ⁴ Orumu cio kulo Neplim ongoni kof kuna faritin manyu to kifwongi kalitongo tee kulo Lobanga ko tee kariok kulo cio, manyu otomonuni tee ko icieng, ara afa kuna tee kuneicieng kangerejak kulo berien, cio kuna lokwati. ⁵ Odeu Lobanga rohojun lo cio to kof manyu odeu jimitan ara kodomo lo tau lo tungani rohojun jia to tik tik. ⁶ Oto tau lo Lobanga ome bebe to duhohino cio ene kof oto tau nenge ome noo. ⁷ Lobanga ko jimitan, “Akeru cia nan cio kulafa laduk nan to komom lo kof, cio ko tiangi ko sangite kuna lokudita to kof ko kweny kulo kai tonyio ome tau nei to duho icieng ene kof. ⁸ Ati orumu Noa kisisio to ketemoni lo Lobanga. ⁹ Ara ene lorejore lo Noa. Ara afa Noa tungani na ibir na loru ko kipal to kiji lo cio kulo karihin kunenge manyu ilihita orumu inyi ko Lobanga. ¹⁰ Ongon orumu Noa ko tee rei uni, Seml Kam ko Japet. ¹¹ Dong orumu kof lipalaru to ketemoni lo Lobanga ifut ko ticitici kulo kifada. ¹² Odeu Lobanga koditi na lipalarore kof tonyio orumu cio fad lipale kikohin kuneicieng. ¹³ Oto Lobanga ojo iyo Noa, “Aticungo nan warita kulo cio pili tonyio ifut kof ko kipal to icieng. Akeruno nan icieng ara Lobito to kof. ¹⁴ Tona, ifaha tigol to keyek kuna igoli manyu tokor kudulehin katwa manyu todwany katwa ko korwong fad to odok. ¹⁵ Ara ene koditi na ngifahare isi; ojir karitan lo tigol ara futi 450. Lalatun nenge ara futi 75 ko woita nenge iya kai ara futi. ¹⁶ Ifaha kai nenge manyu ingohi lohitir nenge ongon faji lobo iwat sidi to kai. Tofik agwala ketemoni nenge manyu ikor katwa ifetiti uni; orof, kiji ko kai. ¹⁷ Tonyio aculuno nan kifi isod ene kof lo keruno sangite pili kuna longoni kof, sangite pili kuna iwiritaha. Okeru cia sangite pili to kof. ¹⁸ Ati afik cia nan ciharu nitole ko isi irute cia isi katwa lo tigol ko ngorwani nino ko tee kunino, ko ngorwo kulo tee kunino. ¹⁹ Ojir isi iyauno katwa lo tigol sangite kuna iwari ko tyangi ko kweny ta are ta are retoni ko botor ojir kiwar kosi. ²⁰ Koditi lo kweny fad tare, tyangi tare ko sangite kuna lokudita to kof ofwonu cia iyo isi lo kitiwara icieng. ²¹ Ojir isi iyaru dahi dahi fad kuna lotum ite ko icieng. ²² Itii Noa sangite pili iya na locihare Lobanga inyi.