¹ Orumu ogeny afa munu ilany tyangi kulo mwang kulakude kuna loduk Lahitok Lobanga. Oto inyi ojo diho ngorwani , “Ojo re Lobanga kenyia ngak kulo cianitok kulo manahatua?” ² Ojo ngorwani diho munu, “kidaha ohoi ngak kulo cianitok kulo manahatua ³ ati ojo Lobanga Kenya ngak kulo ciani na longon kiji lo mana manyu ketir ojir ite ida iwei.” ⁴ Oto munu ojo diho ngorwani, “ida cia ite iwei. ⁵ Tonyio oyen Lobanga ojo kalinya cia ite, ongaja cia konyeha kuningi ifwonu iri iya Lobanga, iyen tohi na ijir ko na irohoi. ⁶ kalodeu ngorwani jimitan olem ngak lona ciani to daha manyu odwaru to deya, manyu icwara genyun ko yenun, oto ko dyeuno onya. Odumu manyu icio diho retoni nenge la lorumu ilihita konyi onyia manyu la. ⁷ Oto konyeha kuneicieng fad ko ngaja ko yenun jimitan kingoni icieng longature icieng ko dyeuno bene kulo bule imuhore kenite. ⁸ Koloning icieng Lahitok Lobanga olot katua lo mana langun lirobi kolong oto retoni ko ngorwani nenge ko kiduharu to ketemoni lo Lobanga kiji lo canitok kulo manahatua. ⁹ Ati ilolong Lahitok Lobanga tungani ojo, “aji ingon isi?” ¹⁰ Inyahahi inyi ojo, “Aning nan isi i lot manahatua ato nan ko bangun aduharu tonyio angon nan longature.” ¹¹ Oto itifi ojo, “Ngai lohirihohi isi ojo ingon isi longature? Linyia isi ngak lo langole ciani lacik nan ajo kenyia?” ¹² Ifotu tungani ojo, “Ngorwani ene lifik isi kilihita ko nan inyi lohicio nan ngak lona ciani anyia.” ¹³ Itifi Lahitok Lobanga ngorwani ojo, “Nyio itii isi jii?” Ojo ngorwani, “Munu lohitinonong nan licio nan anyia.” ¹⁴ Lahitok Lobanga ko jimitan diho munu, “Tona litiyore isi jii, kificiori isi to kiji lo sang ko tyangi kulo mwang fad! Iyeta cia isi ken to kocehe, manyu idaha cia isi fur faritin kulo warun nino fad.” ¹⁵ Manyu afik cia nan omerohoje kiji nino ko ngorwani ko kiji lo lotataha kunino ko kunenge. Obok cia inyi kue nino isi itok tutunye nenge.” ¹⁶ Ojo inyi diho ngorwani, “Asod cia nan kidak nino iyo tomonun; to mejun nahitok itomon cia isi tee, ongon cia wahun nino iyo retoni nino, manyu kilanyu cia inyi isi.” ¹⁷ Diho Adam ojo, “Tonyio ining isi tenya lo ngorwani nino inyia ngak lo ciani na lacik nan ajio kenyia; ificiori kof tosi, irumu cia isi daha to tic na ime to faritin kulo warun nino fad. ¹⁸ Itibuja cia kof kikwa ko ngaira diho isi, manyu idaha cia isi jationg kulo mwang. ¹⁹ To cora lo komom nino idaha cia isi daha nino many iyitorore kof lafa faji lohiduhunorehin isi, tonyio ira isi fur manyu iyite cia iyo fur. ²⁰ Itibarahi Adam ngorwani nenge ojo Eva tonyio ara inyi ngoto cio kuna iwari fad. ²¹ Ikukumu Lahitok Lobanga kyelani to cionitok iticiefore Adam ko ngorwani nenge. ²² Lahitok Lobanga ko jimitan, “Lori tungani kohoi, loyen tohi na ijir ko na irohoi. Jijia ojir ida kingerihi inyi ocule kana odieu ngak lo ciani lo warun onyia owarare tur. ²³ Oto Lahitok Lobanga ifuhe icieng to manahatua lo Eden olo remo kof lafa loduhunorehin inyi. ²⁴ Langun lifuhe inyi oto ofik Malaika na lotehita ngalem latubot lo kima na lilorita idi kone ngati lo Okangere lo mana lo Eden lo kiriria kikoi na loloro iyo ciani lo warun.