¹ jii okeru Lobanga duho kai ko kof ko sangite fad kuna longoni iyo bolojun neicieng. ² To far lo mietare orumu Lobanga lokeru tic na lorumu inyi itiyo fad. ito inyi iyoma to far lo mietare iyo tic nenge. ³ oto Lobanga icio gum iyo far lo mietare itinyu manyu tonyio iyo na far iyoma inyi iyo tic lo duho na lorumu inyi itiyo. ⁴ ara ene tenya lo kai ko kof iya lafa loduhohinorehin, koloduk afa Lahitok Lobanga kof ko kai ⁵ orumu orihe lobo ciani ida lobuju manyu orihe lobo dwani oru to kof tonyio orumu Lahitok Lobanga orihe ida icio kuju ocaa kof, manyu orihe lobo tungani na ngoremo kof oru ⁶ ati isodu kifi to katua lo kof ocaf kof fad. ⁷ oduhu Lahitok Lobanga tungani iyo lokulufi lo kof ko wirihino kumeco kunenge ofu lo warun oto tungani ko rahun tohi na iwar. ⁸ tona itibulahi Lahitok Lobanga mana Eden ngati lo Okangere olotu ofik na tungani loduk inyi ijia. ⁹ manyu itibuju Lahitok Lobanga cianitok ikoditi gele gele to kof cianitok kuna idwaruha to deya manyu olemi to daha. Manyu ofihahi kiji lo mana ciani lo warun ko ciani lo yenun rohojun ko jiran. ¹⁰ itihita afa kare na litirobia mana to Eden na lolotu okora ara karecio kunahitoha ongon. ¹¹ 11 obara lo ketemoni Pison na lilor kof lo Afila fad faji na longon dab ¹² ojir dab lona kof manyu ongon ciani na longi ngak kuna ijiri manyu ko moru na lilolongoti ojo Onik ongon manyu ijia. ¹³ Obara kare lo are Gihon, itihita inyi ilor kof lo Kus fad. ¹⁴ obara kare lo uni Tigris, itihe inyi iya ngati lo Okangere lo kof lo Asur. Manyu obara kare lo ongon Yuparets. ¹⁵ Oto Lobanga odumu tungani ofik mana lo Eden lo remo ko kitinyujo mana. ¹⁶ Manyu ocik Lahitok Lobanga tungani ojo, “itum isi daha ngak lo cianitok pili kuna longon manahatua, ¹⁷ ati kenya ngak lo ciani lo yenun tohi na ijir ko na irohoi, tonyio kalinyia isi ito cia isi iwei. ¹⁸ 18 Ojo Lahitok Lobanga, “ida ojir to tungani kitongo ake. akukum cia nan kalwahani na locam tonyi” ¹⁹ Tinya oduk Lahitok Lobanga tyangi kulo kof fad ko kweny kulo kai iyauno ketemoni lo tungani lo deya kitibara nenge manyu karana na litibarahi tungani tyang kode kwenyite iwasihi ara karana nenge na. Ati diho Adam oru kalwahani na ngocam tonyi. ²⁰ Oto tungani itibar sang fad, kweny kulo kai ko tyangi kulo mwang. Ati to Adam, oru lobo locam to rahun kalwahani nenge. ²¹ Oto Lobanga icio tungani ogetoro jio kuna igoli ko logetoro inyi oto Lobanga ko dumuno mariti nenge Lobito ko kitifuta faji lona mariti to tiang. ²² Oto Lobanga ko duhuno ngorwani to na mariti lodumu inyi to ken lo tungani oto iyauno iyo inyi ²³ Ojo tungani retoni, “ara dong ene koite lo koi kunei ko tiang lo tyang lo ken nei i lolong cio inyi ojo ngorwani tonyio odumuni inyi to ken lo retoni.” ²⁴ Tone tenya ongerihi kito retoni monye ko ngotenge oto imoraroti ko ngorwani nenge oto icieng ko fwonuno rahun ken Lobito. ²⁵ Itongo orumu retoni ko ngorwani nenge longature ati oru riri lonyia icieng.