¹ Ogoru kuna malaikahin are Sodom kurou, manyu orumu Lot itongo lokoli lona kang. Kolodeu inyi icieng olo itiric icieng,ogung otir komom kof ketemoni neicieng. ² Ojo iyo icieng kulahitoha kunei, ibeloti ifwonu kaji lo karwaani ningi. Itum ite ilal kejuha kuningi, iget ifworore ketemoni kiwanyi berien. Ojo icieng ida kigeto ohoi par. ³ Ati ifud inyi to golun many iruk icieng fworo ko inyi kaji nenge, ikukumahi inyi icieng daha, ofun mugatihin kuna loru ibula onyia icieng. ⁴ 4 Orihe icieng ida lofwo geto, ofwonu cio rei to fajihit pili kulo kang lo Sodom, kilahaji ko ngoroyok fad iriti kaji lo Lot. ⁵ Ilolongoti Lot ojo, aji kuladi cio lofwonu iyo isi? Iyauno oleng kiwak ohoi getore icieng. ⁶ 6Olo Lot sita kitirico icieng igenihi agwala to kifwongi nenge ⁷ manyu ojo iyo icieng, “ida morot kunei ketii ene tohi ibot. ⁸ Tode angon nan ko tee kariok are kuna lorihe ida itongo ko rei. Ingohi a yauno nan icieng oleng iyo ite, itum ite itii iyo icieng tohi na liwak ite. Ati ketii lobo tohi iyo kuno cio lofwonu icieng iyo rica lo kaji nei. ⁹ Inyiahahi icieng Lot ojo, “Ingada to ketemoni niyang. Olotu afa elerok ara kamanyani ene kof niyang jijia libel ken ara kangotoni lo tenya! Kitii ciao hoi ken nino ilany na ngohitii iyo icieng. Osodoro icieng ko cula Lot manyu ofwori ara na lowahiti gila agwala. ¹⁰ Ati ipihe kunu cio to kaji Lot iya katwa lo ko kigenihino agwala. ¹¹ Oto ko kitingodoroti kuna cio to oleng fad kilahaji ko ngoroyok ojir ida odeuni agwala. ¹² Ojo kuna cio are iyo Lot, ingon isi ko cio kude ene, komon kode tee rei kode kariok, kode kude cio keken lara kunino to katwa lo ene kang? Todume icieng ten, ¹³ tonyio kifworo ohoi keroro ene faji. Kicira na logoru iyo Lahitok tone faji obolo noo manyu kiculu inyi ohoi lo keroro inyi. ¹⁴ Tona olo lot oleng tenya ko komon kunenge kuna orumu loter tee kariok kunenge ara kulo yemaru. Ojo inyi iyo icieng. Itoruharoti ifwo tone faji tonyio okeroro Lahitok ene kang. Ati ofik komon kunenge ojo isonga ba inyi. ¹⁵ Langun lowanguno kof, ifud malaikahin Lot ojo, toruk! Yaru ngorwani nino ko kuno tee kariok kunino are longoni ene tonyio ikeroro cia ite kalolotu kidak iyo ene kang. ¹⁶ Orihe inyi irungo, inief kuna cio kana nenge ko lo ngorwani nenge ko kulo tee kariok kunenge ko rihoroti inyi to na ijir oleng to katwa lo kang tonyio inief mehino Lobanga to icieng. ¹⁷ Deu deu langun liyauni icieng oleng to katwa lo kang, ojo Lobito tungani iyo icieng, “Ifejaroti warita kuningi. Kengolo, manyu kewoita lobo faji ten to oleng! Ifejata iya dongecio ida ikeroro.” ¹⁸ Ati ojo Lot iyo icieng, Ida kulahitoha kunei, lwak! ¹⁹ Lorumu karwaani ningi kisisio to ketemoni ningi lwahuno warun nei. Ati ida nan atum kifejaru many dongecio, kitihoru cia ene rohojun nan awei. ²⁰ Tode ongon kang na inyiha ene na ngafe nan ijia, manyu isidi ingohiafe nan ijia-isidi manyu inyi noo afe nan ijia alo awar. ²¹ Ojo inyi iyo Lot, “Ojir acio cia nan isi ene kilifa manyu. Ida cia nan akeru na kang litenya isi. ²² Ati ifeja ijia deu deu tonyio ida cia nan atii lobo tohi many kaligoru isi ijia ''Inyi licio na kang obara Zoar. ²³ 23 To tik na logorunore Lot Zoar orumu kolong longor kof. ²⁴ Tinyia iticau Lobanga terek lo Salfa na inok iyo kangite kulo Sodom ko Gomorah na lolotu to kai iyo Lobanga. ²⁵ Tona okeru inyi kuna kangite ko oleng fad, okeru cio fad kuna longoni kuna kangite ko cianitok ko nyari fad na longon na kof. ²⁶ Ati ongolo ngorwani lo Lot ko lulworo ara wiriti lo balang ²⁷ Kiwanyi berien far na lijifita, owoju Abraham olo longole faji lowoitare inyi ketemoni lo Lahitok. ²⁸ Ko deya iya ngati lo Sodom ko Gomorah ko oleng fad ko deuno furo na irioci ofuru to kof iya furo lo liti. ²⁹ Dong kolokeru Lobanga kangite kulo oleng iiu inyi Abraham oto ko lwahuno Lot iyo kidak na lokeru kangite kulo oleng idi afa lomanyare Lot. ³⁰ Ongerihi Lot ko tee kariok kunenge Zoar ko fworo manya dongecio tonyio orumu inyi obang manya Zoar. Omanya inyi ko tee kunenge kunom. ³¹ Lobo far, ojo kito nenge na hitok iyo na sidi, “Longoroyon apa niyang manyu oru rei ten na ngohicio ohoi tee iya na longonore kof fad. ³² Ngacwarata apa niyang omat vino ojir kigeto ko inyi kitihuju kaliyang ara iyo apa niyang.’’ ³³ Na karwe itimat icieng apa neicieng vino olo kito nenge na hitok ogeto ko apa nenge. Ida inyi oyen tik na logetore inyi kode na lowojunore inyi. ³⁴ Kiwanyi nenge, ojo na kito hitok iyo na sidi, “Adi karwe lageto nan ko apa nei. Ngatimatata inyi vino ari ene karwe ojir isi ilo igeto ko inyi ojir kitihu kaji niyang ara iyo apa niyang. ³⁵ Oto icieng itimat apa neicieng vino ari na karwe oto na kito nenge sidi olo ogeto ko apa nenge. Ari ida inyi oyen tik na logetore inyi kode na lowojunore inyi. ³⁶ Tona, ifonga tee kariok kulo Lot are fad ko apa neicieng. ³⁷ Otomonu kito nenge na hitok kito retoni itabarahi ojo Moab; inyi lara monye lo cio kulo Moab kulo ene far. ³⁸ Otomonu manyu na sidi kito retoni itibarahi ojo Ben-Ami; inyi lara monye lo cio kulo Amon kulo ene far.