¹ Oboto Lahitok iyo Abraham to cianitore lo Mamre orumu inyi itongo agwala lo kema nenge to nohun lo far. ² Oting Abraham kwe kai ko deuno cio uni owoita onyiha. Kolodeu inyi icieng, oto oruharu to agwala lo kema nenge kitirico icieng ko gungon kof ketemoni neicieng. ³ Oto ojo, “Kalarumu nan kisisio lo komom nino Lahitok nei, keringe igal karwaani nino. ⁴ Ingohi iyauni kode kifi kuting ilalare ite kejuha kuningi iyoma hati fotiri lone ciani. ⁵ Ingohi ahicio nan ite lobo tohi lo daha inyia irumunore golun ifwore iya na lifwonu ite kolo karwaani nino, inyiahahi icieng inyi ojo “Ojir noo, itiyo iya na litenyare isi.’’ ⁶ Abraham ko ruharu iya katwa lo kema iyo Sarah ko rihohino inyi ojo, “Todumu ratil uni kulo kofwo kuna itinyaha, ingol, ifun kude mugatihin.’’ ⁷ Oto ko kifejaru lodahare lo sang ko loro nyumuno kacie na longarihi ko kicwara karwaani nenge olo oruk kikukuma. ⁸ Oto Abraham iyauno Opopo, lei mucahar ko tyang lona kace likukumi otirohi ketemoni neicieng. Kolodaha icieng owoita inyi tang, fotiri lo ciani. ⁹ Itifi icieng inyi ojo, “Aji ongon ngorwani nino Sarah? Ojo inyi ongon katwa lo kema.’’ ¹⁰ Oto Lobito to kiji neicieng ojo, “Aitu cia nan iyo isi to kuno faritin nu kari orumu ngorwani nino Sarah itinaha kito retoni.’’ Tona orumu Sarah oningo to katwa lo kema na longon ngati lo korwong nenge. ¹¹ Orumu tona oho Abraham ko Sarah longoroyoni noo manyu orumu Sarah logal karihin kulo tomonun. ¹² Oto Sarah okweni ake ake iiyo ojo, “Langun laniama nan manyu longoroyon lahitok nei orihe cia nan arumu kwama lo kitongo? “ ¹³ Tona ojo Lahitok iyo Abraham, “Nyio okweni Sarah ojo manyu, “Atum cia nan tomonuno kito ati nan langoroyon?” ¹⁴ Ongon lobotohi logol olanyu Lobanga? Aitu cia nan to faritin kuna lacik nan nu kari manyu otomonu cia Sarah kito.’’ ¹⁵ Obang Sarah oto ko talerun ojo, “Ida nan lakweni; Ati ojo inyi, “Ibo likweni isi.’’ ¹⁶ Kolowoju kuna cio lowahiti fworo, oto odeyati orof iya ngati lo Sodom manyu iniamahi Abraham icieng. ¹⁷ Oto Lahitok ojo, “Ngamen ha ba nan iyo Abraham tohi na lawak nan kitiyo? ¹⁸ Olotu Anraham rahun Misi na hitok igol manyu Misihi to kof fad orumu cia kigatahino lo gum ara iyo inyi. ¹⁹ Tonyio lanyumu nan inyi ojir itotorohi tee kunenge ko cio kulo kalenge to omot nenge lo rica kikoi lo Lahitok iyo kitiyo tohi na ijir ojir Lahitok icio itiihino iyo A braham tohi na locik inyi.'' ²⁰ Tinyia ojo Lahitok, “Obolo kicira iyo Sodom ko Gomorah noo manyu kipal neicieng ibot bebe ²¹ na licio nan aloro deya kolobolo kipal neicieng iya na laningore kicira nenge iyo nan. Kalida, ayen cia nan. ²² Ibelo kuna cio ofwori iya ngati lo Sodom ati otong Abraham woita ketemoni lo Lahitok. ²³ Oto Abraham olo iyo inyi ojo, “Ikeru cia isi cio kuna ijiri ara Lobito ko kuna irohori? ²⁴ Adi ba ngongoni cio keek miet kuna ijiri katwa lo na kang? Ikeru cia isi na kang ida ilau to kuna cio keek miet longoni katwa nenge? ²⁵ Oloma iyo isi kitiyo jii, keruno cio kuna ijiri ko kuna irohori. Ingohi to loma iyo isi! Ida re kangotoni lo tenya lo kof fad itiyo na ijir?” ²⁶ Ojo Lahitok, “Kalarumu nan cio kuna keek miet Sodom, alau cia nan na faji to icieng.’’ ²⁷ Oto Abraham otenya ari ojo, “Jijia iya na latigol nan tau tenya ko Lahitok kileng lara nan fur ko ingula, ²⁸ adi ba ngikuting cio kajirak to miet iyo keek miet? Ikeru cia isi kang fad to rujon lo kuna cio miet?” Ojo inyi, “kalarumu nan cio keek ongon ko miet ijia, ida cia nan akeru kang.’’ ²⁹ Oteny Abaham iyo inyi ari ojo, “Adi ba ngongon cio kuna ijiri keek ongon tijia?” Ojo inyi, to kuna keek ongon ida cia nan atii.’’ ³⁰ Tona ojo inyi, “Kecio hati Lahitok ilongo, ati kicio nan atenya. Adi ba ngorumuno keek uni keken ijia?” Inyiahahi inyi ojo, “Ida cia nan atii kalarumu nan keek uni ijia.’’ ³¹ Ojo Abraham, “Jijia iya na logolore tau nei tenya ko Lahitok, adi ba ngorumuno keek are keken ijia?” Ojo inyi, “To kuna keek are ida cia nan akeru kang.’’ ³² Tona ojo inyi, “Kecio Lahitok ilongo ati ingohi atenya kakeny Lobito ari, Adi ba ngorumuno tomon ijia?” Inyiahahi inyi ojo, “To kuna tomon ifa cia nan akeru kang.’’ ³³ Kolokeru Lahitok tenya ko Abraham oto ko loro, oite many Abraham kalenge.