¹ Tona ida Sarai ngorwani lo Abraam otomonu kode tee tonyi ati orumu inyi ongon ko lobo katiyoni nenge Ijiptoni lo baraHagar. ² Dong ojo Sarai iyo Abraam, “lohingony Lahitok nan otomone. Ilo togeto ko katiyoni nei ngohicio ha ba Lobanga tee ara iyo inyi.’’ Iruk Abraam tenya lo Sarai ³ dong langun litong Abraam kof lo Kanaan karihin tomon, odumu ngorwani nenge Sarai katiyoni nenge Hagar na lara Ijiptoni icorihi iyo retoni nenge ara ngorwani. ⁴ Itong inyi ko inyi itifong. Langun loyen Hagar jimitan lafonga inyi iciak kitikaja ngoto kang. ⁵ Oto Sarai ojo iyo Abraam, “Isi litehita tenya lo kidak na larumu nan. Afik nan katiyoni nei kana nino ojo loyen ojo lafonga inyi ene dong litikaja nan. Ingohi Lobanga tongot tenya kiji nei ko isi. ⁶ Ojo Abraam iyo inyi, “ongon katiyoni nino kackunino, itiyo iyo inyi iya na locam to inyi.’’ Oto Sarai ko kitigema Hagar many ife to ketemoni nenge. ⁷ Orumu Malaika lo Lahitok Hagar onyiha ko ipulak lo kifi to kuny, ara na ipulak na longon kikoi na loloro Sur. ⁸ Ojo Malaika iyo inyi, “Hagar katiyoni lo Sarai, ilotu isi taji manyu iloro aji?” Inyiahahi inyi ojo, “afeita nan iyo nahitok nei Sarai.’’ ⁹ Oteny Malaika lo Lahitok iyo inyi ojo, “Toite iyo nahitok nino manyu icwara ningo iyo inyi.’’ ¹⁰ Osodoro Malaika tenya iyo inyi ojo, “Acio mute nan lotataha kunino oborengi ida ikenuno.’’ ¹¹ Ojo manyu Malaika lo Lahitok iyo inyi, “Ifonga jijia isi manyu itomonu cia kito retoni itibarahi cia isi inyi karana Ismail tonyio Loning Lahitok mehino nino ¹² owar mute inyi iya Sigiria lo mwang oliware mute inyi cio fad manyu cio fad oliware inyi ko recera fad.’’ ¹³ Icio inyi ene karana iyo Lahitok na lotenya ko inyi. “Ira isi Lobanga na lo deya nan” tonyio ojo inyi, “ladeu dong nan inyi na lodeya nan.’’ ¹⁴ Inyi na lobarare na ipulak lo kifi Beer Lahai Roi orihe ongon kiji lo Kades ko Bered. ¹⁵ Dong otomonohi Hagar Abraam kito retoni, itibarahi Abraam kito na lotomonu inyi ko Hagar Ismail. ¹⁶ Orumu karihin kulo Abraam lara keek mietauni lo ile na kari lotomonunorehin Ismail.