¹ To kiteri ofik Lobanga kai ko kof ² orioriongo afa kof itongo arusarus oru saye longon imuk lokimuyuk kiluko oto hati okorif lo Lobanga oraf kue lo kifi. ³ Oto Lobanga ojo, “Ingohi wangun tongon” wangun ko ngonun. ⁴ oto Lobanga odeu jimitan ojir wangun, inyi ko kora wangun ko mutohun. ⁵ Ilolong Lobanga wangun ojo “far” ojo mutohun ojo, “karue”: oto kurou ongon, o wangu manyu kiwanyi ara na far lo lobito. ⁶ Oto Lobanga ojo “ingohi ilwe tongon na lokor kifi ko kifi ⁷ Lobanga ko fiha ilwe na lokor kifi kuna longon kai lo ilwe ko kuna longon kof oto itiihino jii, ⁸ ilolong Lobanga ilwe ojo “kai”. oto olotu kurou, owangu manyu kiwanyi ara na far lo are. ⁹ Oto Lobanga ojo ingohi kifi kuna longon fotiri lo kai itubaru faji Lobito manyu ingohi kof na itou toboto”, oto itiihino jii. ¹⁰ ilolong Lobanga na faji itou ojo “kof” manyu kifi kuna litubaru ilolong ojo “nami” oto Lobanga odeu ojo ojir. ¹¹ Tinyia ojo Lobanga, “ingohi nyiari tobu to kof, ko cianitok kuna longi kireja to ikoditi kuneicieng ko keyek kuna longi ngak kuna longoni kireja katua to ikoditi kuneicieng gele–gele.” itiihino jii. ¹² itibuju kof nyiari ko cianitok kuna longon ko kireja to ikoditi kuneicieng ko keyek kuna longi ngak ko kireja to katua to ikoditi kuneicieng gele gele. odeu Lobanga ojo ojir. ¹³ olotu kurou manyu owangu kiwanyi ara na far lo uni. ¹⁴ Oto Lobanga ojo, “ingohi sangite kuna linwaha ongon iyo ilwe lo kai ojir okor karue ko far manyu ara kitotorita lo kora lo kari ko ofahin ko kibebelo lo kof ¹⁵ manyu ojir icieng ara wangun na longon iyo ilwe lo kai na licwara wangun kof. itiihino jii. ¹⁶ ofik Lobanga sangite kuna linwaha are kuna hitoha, nahitok nenge na linwaha far ko na sidi nenge na linwaha karue. icieng kolong ko ofa, ikukumahi manyu inyi kanger . ¹⁷ Ofik Lobanga icieng iyo ilwe lo kai ojir inwaha kof, ¹⁸ ojir inwaha karue ko far, ojir okor karue ko far. oto Lobanga odeu ojo ojir. ¹⁹ olotu kurou owangu manyu kiwanyi , ara na far lo ongon. ²⁰ 20 oto Lobanga ojo, “ingohi kifi itad, sangite kuna iwari manyu ingohi kweny tofuho iyo ilwe lo kai to kue lo kof isabitati kiji lo ilwe lo kai ko kof. ²¹ tona ofik Lobanga sangite kuna iboroho kuna lowar katua lo kifi ko kuna kude kuna iborengi beciek to ikoditi kuneicieng gele gele ko kweny ko sangite fad kuna ifuhoho to ikoditi kuneicieng gele gele. oto Lobanga odeu ojo ojir. ²² 22 oto Lobanga icio icieng gum ojo, “itopit itadoro ifut katua lo kifi kulo nami, icwara manyu kweny ifut kof.” ²³ olotu kurou ongon owangu manyu kiwanyi ara na far lo miet. ²⁴ Oto Lobanga ojo, “ingohi kof itad sangite kuna iwari to ikoditi kuneicieng; tyangi ko sangite kuna lokudita kof to ikoditi kuneicieng ko tyangi kuna irieji ko kuna ingereha kulo mwang to ikoditi kuneicieng. itiihino jii. ²⁵ ofik Lobanga tyangi kulo mwang to ikoditi kuneicieng, ko sang to ikoditi kuneicieng ko sangite fad kuna lokudita to kof to ikoditi kuneicieng. oto Lobanga odeu ojo ojir. ²⁶ Tinyia ojo Lobanga, ina ngatiduk cio kitiririhi kohoi iya kitiririta niyang, ojir icieng olanyu kayam kulo nam ko kweny kulo kai ko sang, ko kof fad ko sangite pili kuna lokudita to kof.” ²⁷ tona oduk Lobanga tungani itiririhi konyi, iyo ririjon lo Lobanga oduk Inyi inyi. oduk inyi icieng retoni ko ngorwani. ²⁸ icio Lobanga icieng gum oto ojo, “Itopit iborengi ifutata kof ilanyu. itilanyu kayam kulo katua lo nam ko kweny kulo kai ko sangite pili kuna lokudita to kof. ²⁹ tinyia ojo Lobanga, “ahicio nan isi cianitok fad kuna longoni ko kireja ko keyek fad kuna longi ngak kuna longoni kireja katua, itongo ca icieng diho isi ara daha. ³⁰ ojo diho tyangi kulo kof fad ko kweny kulo kai ko sangite fad kuna lokudita to kof – sangite pili kuna lowirita – acio nan nyiari kuna inyoriha ara daha diho icieng, manyu olotu ori jii. ³¹ odeu Lobanga sangite fad kuna kuna lofik inyi orumu ojiri noo. olotu kurou ongon owang manyu kiwanyi ara na far lo ile.