¹ Tona ojo Lahitok diho Moses, ² "Ifahahi lomanyare lohiricore far lo lobito iyo ofa lo lobito. ³ Tofik sanduk lo cik katua nenge manyu igenohi na sanduk to kyela kigenit. ⁴ Iyauno meja manyu ifik kai nenge tohi na locam to ngonun kai. Ito hati iyauno lomo ikukumahi lomohin kunenge. ⁵ Tofik ciali dahab lo iheru ketemoni lo sanduk lo cik ito hati ifik kyela kigenit agwala lo kema lomanyare. ⁶ Tofik ciali kicurita lo icioriti ketemoni lo agwala lo lomanyare, kema lohiricore. ⁷ Tofik besen kiji lo kema lohiricore ko ciali lo cura lo icioriti, tofik kifi katua nenge. ⁸ Togurohi sita irit ito hati ifik kyela kigenit lo lokoli. ⁹ Todumu ngoroni kitwei, totwe kema lomanyare ko sangite fad kuna longoni katua. Itinyujo inyi ko sangite kunenge fad oto cia inyi onyu. ¹⁰ Tinyia totwe ciali kicurita lo icioriti ko sangite kunenge fad, itinyujo ciali oto cia onyu noo. ¹¹ Totwe besen ko kiwoitita nenge manyu itinyujo icieng. ¹² Iyauno Aaron ko tee kunenge agwala lo kema lohiricore manyu ilala icieng to kifi. ¹³ Tinyia iticiefo Aaron to kyelani kuna inyuji, totwe inyi manyu itinyujo ojir inyi kirwaa nan ara kadwarani. ¹⁴ Iyauno tee kunenge iticief icieng to kanyihin. ¹⁵ Totwe icieng iya na litware apa neicieng ojir icieng kirwaa nan ara kadwarak. Itongo twa neicieng ara lo dwarun na litongo ara neicieng iyo kofiang kuneicieng fad. ¹⁶ Itii Moses sangite fad iya na locihare Lahitok. ¹⁷ Tona ifahahini kema lomanyare far lo lobito ofa lo lobito iyo kari lo are. ¹⁸ Kalifahahi Moses kema lomanyare, ofik inyi tedohin fajihit kuneicieng ko dufahino guri ko kikokolohino riho manyu itiwoitahi wirihin. ¹⁹ Oto ko fetahino kema kai lo lomanyare ko fiha kimuhihin kai lo kema iya na locihare Lahitok inyi. ²⁰ Odumu inyi morutok kuna ligerohini cik ofik katua lo sanduk lo cik ko kisudahino keyek kitingi iyo oguli to marihin kulo sanduk ko fiha kitongi lo kisa kai nenge. ²¹ Oto ko kiyauno sanduk lo cik katua lo kema lomanyare ko kitihohino kyela kigenita, igenore sanduk lo cik iya na locihare Lahitok inyi. ²² Ofik Moses meja katua lo kema lohiricore ngati lo kai lo kema lomanyare oleng lo kyela kigenit ²³ ko kicadohohino mugati kai nenge ketemoni lo Lahitok iya na lorihohinore Lahitok inyi. ²⁴ Ofik inyi kiniefi lo lomo katua lo kema lomanyare isiran ko meja iya ngati lo orof lo kema lohiricore ²⁵ ko kitiparahino lomohin ketemoni lo Lahitok iya na locihare Lahitok inyi. ²⁶ Ofik Moses ciali lo dahab ketemoni lo kyela kigenit to katua lo kema lomanyare ²⁷ ko curahino iheru kai nenge iya na locihare Lahitok inyi. ²⁸ Oto ko fihahino kyela kigenit agwala lo kema lomanyare. ²⁹ Otorihi inyi ciali kicurita lo icioriti onyiha ko agwala lo kema lomanyare lohiricore ko curahino kai nenge icioriti kuna lara sang ko icioriti kulo ngamang iya na locihare Lahitok inyi. ³⁰ Ofik inyi besen kiji lo kema lohiricore ko ciali lo cura icioriti ko kijuhohino kifi katua kuna ngilalarehin. ³¹ oto Moses ko Aaron ko tee kunenge ilalare kac ko kejuha kuneicieng. ³² Ilalare icieng kalorutoroti kema lohiricore kode kolofworoti iyo ciali lo cura icioriti iya na locihare Lahitok Moses. ³³ Tinyia ifahahi Moses kiwata lo sita irit kema lomanyare ko ciali ko fiha kyela kigenit lokoli lo sita. Tona okeru Moses tic fad. ³⁴ Tinyia imuhe idis kema lohiricore, manyu ifute kimedek lo Lahitok kema lomanyare. ³⁵ Ida Moses otum rutoro kema lohiricore tonyio limuhe idis kema manyu ifut kimedek lo Lahitok kema lomanyare. ³⁶ Iyo lotita lo cio kulo Israel fad, kolotingoro idis to kai lo kema lomanyare, owoju manyu icieng ojiok, ³⁷ ati kalida idis otingoro, ida manyu icieng ojiok many far na lotingorore idis. ³⁸ Tona ongon afa idis lo Lahitok kai lo lomanyare to far manyu ongon kima katua lona idis karue to ketemoni lo cio kulo Israel fad iyo lotita neicieng fad.