¹ To usihin kuna ifurangi, imalangi ko kuna idoriari, ikukumu icieng kyelani kuna litibibili kuna litiyorehin kirwaa kema lomanyare na Inyu. Orifahi manyu icieng kyelani kuna inyuji iyo Aaron iya na locihare Lahitok Moses. ² Ikukumu icieng kol lo kyela, iyo dahab ko usi na ifurang, na imalang ko na idorie ko iyo kyela iribi na loiri. ³ Idongu icieng tadahin kulo dahab kuna igereweha ko kilirati ara kofi kuna litibibilarehin usi na ifurang, na imalang ko na idorie ko kyela iribi na loiri tic lo kac kulo cio kagingak. ⁴ Ikukumu icieng kitiherita kulo okokoho kulo kol lo kyela kuna litiniefahini iyo rukuni kunenge are ojir otorahinorehin. ⁵ Ori gas lo komoc nenge na likukumi to kigingi iya inyi - ara lobito ko kol lo kyela manyu ikukumi to dahab ko to usi na ifurang, na imalang ko na idorie ko to kyela iribi na loiri iya na locihare Lahitok Moses. ⁶ Otod icieng fotiricio lo kuna morutok oniks to dahab manyu igerohini kenite kuneicieng karanacio kulo tee kulo Israel. ⁷ Oto hati ikolohini icieng iyo kitiherita kulo okokoho kulo kol lo kyela ara morutok kitiiunita kulo tee kulo Israel iya na locihare Lahitok Moses. ⁸ Ikukumu icieng ogogor lo locolo na lara tic lo katibibilani na igingi. Ikukum icieng inyi to dahab, usi na ifurang, na imalang ko na idorie ko to kyela iribi na loiri. ⁹ Ara orumu inyi na litulo are ara lalatun ko karitan nenge fad tadati lo kana lobito lobito. ¹⁰ Oto hati itiparahini morutok kuna longoni gelegele idufiti ongon ken lo ogogor lo locolo. Iyo idufit ketemoni, ongon afa karnelian, krisolit ko beril; ¹¹ Iyo idufit lo are ara tarkuois, lapis la zuli ko emirald; ¹² Iyo idufit lo uni ara jakint, aget ko amasist; ¹³ iyo idufit lo ongon ara topas, oniks, ko jaspar. Itiparahini icieng iyo tedohin kulo dahab. ¹⁴ Ara orumu kuna morutok tomon ko are na longon lobito lobito ko karanacio kulo tee kulo Israel lobito lobito okorodohini karana lo lobito imanit lo Israel. ¹⁵ Ikukumu icieng tongosi kulo dahab na ilihinya kulo ogogor lo locolo kuna lori iya kofi. ¹⁶ Ikukumu icieng tedohin kulo dahab are ko oguli kulo dahab are ikolohini oguli rukuni kulo ogogor lo locolo. ¹⁷ Ikolohi icieng tongosi kulo dahab iyo oguli kuna longoni rukuni lo ogogor lo locolo, ¹⁸ manyu angati lo lohicungihin kulo tongosi iyo kuna tedohin are iyo okokoho kulo kol lo kyela to ngati lo ketemoni. ¹⁹ Ikukumu icieng oguli kulo dahab are ikolohini iyo kunakude rukuni kulo ogogor lo locolo to ngati lo katua onyiha ko kol lo kyela. ²⁰ Oto hati ikukumuni kunakude oguli kulo dahab are ikolohini fotiri lo ogogor lo locolo ketemoni lo kol lo kyela onyiha ko lorifare kai lo gas lo kyela lo kol lo kyela. ²¹ Otorahi icieng oguli kulo ogogor lo locolo iyo oguli kulo kol lo kyela to kofite na ifurang orihohinorehin inyi iyo gas lo kyela ojir ogogor lo locolo ida okoraru iyo kol lo kyela, iya na locihare Lahitok Moses. ²² Ikukumuni kanyi lo kol lo kyela to kyela na ifurang tic lo kakadani, ²³ ko lohiburahinore kiji lo kanyi na lori iya faji lo murut ko lohileleri irit ene faji lo murut ojir ida ocira. ²⁴ Ikad icieng katurahak to usi na ifurang, na imalang ko na idorie itiric kutuk lo kanyi to orof. ²⁵ Ko kikukumahinoti igoloho to dahab na ilihinya ikolohini iyo kutuk lo kanyi itididilahini kijihin kulo kuna katurahak iric. ²⁶ Itilililahino igoloho ko katurahak kutuk lo kanyi na lirwaarehin iya na locihare Lahitok Moses. ²⁷ To Aaron ko tee kunenge orifahi icieng kanyihin kuna litibibili to kyela iribi - tic lo kakadani ²⁸ ko turubuc lo kyela iribi ko turubuci kuna sidiha ko curuwal kulo kyela iribi na litibibili. ²⁹ Ikukumi kingotit na ijoro to kyela iribi na likadi to usi na ifurang, na imalang ko na idorie tic lo tungani katibibilani iya na locihare Lahitok Moses. ³⁰ Ikukumu icieng sahan kiherit na inyu to dahab na ilihinya oto hati igerohini kiji nenge ara na lokorodohini ojo, ' Onyu Diho Lahitok .'' ³¹ Oto hati otorahini kofite na ifurang keju nenge otorahinorehin iyo kokom lo turubuc iya na locihare Lahitok. ³² Tona okeruni tic lo lomanyare na Inyu kode kema lohiricore. Itii cio kulo Israel sangite pili iya na locihare Lahitok Moses. ³³ Oto hati iyauni sangite kulo kema lomanyare iyo Moses, kema ko sangite kunenge fad; guri, tedohin, riho, oguli, kigolihin, kofi, kyela kigenit ko bilieta kiguri kunenge fad, ³⁴ kyela lo fofi kulo mongi kulo kera na libuyi to renge na ido ko kiyene na isisik ko kyela kigeniti; ³⁵ Sanduk lo cik ko keyek kitingiti kunenge ko kimuhit lo lohitongore lo kisa; ³⁶ Meja ko sangite kunenge fad ko mugati lo ngonun lo Lahitok; ³⁷ lomo lo dahab na ilihinya ko parun lo lomohin kunenge ko sangite kunenge fad ko ngoroni lo oliv lo kinoha; ³⁸ ciali lo iheru na likukumuni to dahab, ngoroni kitwei, iheru na likaruti na iur ko kyela kigenit lo kema na Inyu; ³⁹ ciali mwalati ko keikei nenge mwalati, keyek kitingiti kunenge ko sangite kunenge fad ko besen ko kitiwoita nenge fad. ⁴⁰ Kyela kigeniti kulo sita ko guri ko tedohin kunenge, ko kyela kigeniti kulo lokoli, kofi ko bilieta kiguriti kulo sita, sangite pili kulo lomanyare na Inyu kode kema lohiricore; ⁴¹ ko kyelani kuna likadi kulo kiciefita irwaarehin lomanyare na Inyu, kyelani kulo Aaron kadwarani ko kulo tee kunenge kuna litiyorehin ara kadwarak. ⁴² Litii cio kulo Israel tic fad na locik Lahitok Moses. ⁴³ Oher Moses tic neicieng odeu ojo litii icieng iya na locihare Lahitok, oto Moses ko kigatahino icieng.