¹ Ikukumu Bezalel sanduk lo cik to bau lo ciani lyerati na lara karitun nenge futi ongon lalatun nenge futi are ko woita nenge futi are. ² Odwany inyi oleng ko katwa fad to dahab na ilihinya ko fihahino lohileleri to dahab iric kutuk nenge. ³ Ikukumu inyi oguli kulo dahab ongon itiriehahi ko kejuha kunenge, oguli are angati oguli manyu are Lobito ngati. ⁴ Oto inyi ogatu keyek are kitingihin iyo bau lo ciani lyerati odwany kenite to dahab. ⁵ Oto inyi itirutohi kuna keyek kiting iyo oguli kuna longoni marihin kulo sanduk otingorihin. ⁶ Ikukumu inyi kimuhi lo seger lo kisa karitun nenge futi ongon ko lalatun nenge futi are. ⁷ Oto hati ikukumu cerubi are iyo dahab na lidonguni iyo lohicungihin kulo kimuhi. ⁸ Ofik inyi cerub Lobito Lobito angati lo kimuhi ko Lobito manyu angati idongu icieng ara Lobito ko kimuhi. ⁹ Otingo fuho kulo cerubi iya kai imuk kimuhi. Otong cerubi iya kiji na litirici deya iya kiji lo kimuhi. ¹⁰ Ikukumu icieng meja to bau lo ciani lyerati na longon karitun nenge futi uni lalatun nenge futi Lobito ko nusu ko woita nenge futi are. ¹¹ Oto icieng odwany ken nenge to dahab na ilihinya ko fiha lohileleri lo dahab kalelehin irit. ¹² Ofik manyu icieng itaditi nenge na lotum rijon ko ladati lo kana ko fihahino manyu lohileleri lo dahab iyo itadi. ¹³ Oculu manyu icieng oguli ongon ofihahini iyo rukuni kunenge oryeha ko lodufa lo kejuha. ¹⁴ Ofihi oguli onyiha ko lohileleri ojir itirutohinorehin keyek kitingita kulo meja. ¹⁵ Ogatuni keyek kiting kulo meja iyo bau lo ciani iyerati manyu odwanyi to dahab. ¹⁶ Manyu ikukumuni sangite kulo meja to dahab na ililinya, sahani kunenge, beseni ko ilebuha ko motiong kuna lijuhorihin kiciorita imatiti. ¹⁷ Ikukumu icieng lomo to dahab na ilinya, idongu icieng fotiri, kiniefi, tanitani manyu ikukumahi kubayahin kuna lori iya katurahak, bene ko lohimosi ara Lobito ko lomo fad. ¹⁸ Ocar tanitanihin ara na lopar ile to kalelehin kulo kiniefi lo lomo uni angati, uni manyu Lobito ngati. ¹⁹ Kubayahin kuna lori iya katurahak kulo iyau bene ko iturit kuneicieng uni ongoni iyo Lobito tani tani, uni manyu iyo lobo. Ara iya na to tani tanihin fad ile kuna locaru iyo kiniefi lo lomo. ²⁰ Manyu iyo kiniefi lo lomo, ongoni kubayahin ongon kuna lori iya katurahak kulo iyau ko bene ko iturit kuneicieng. ²¹ Ongon kubaya Lobito locarare lo tanitanihin ketemok, kubaya Lobito locarare lo tanitanihin kulo are ko kubaya manyu Lobito locarare lo tanitanihin kulo uni tanitanihin ile fad. ²² Kubayahin ko tanitanihin ojir ara Lobito ko kiniefi lo lomo ara na lidonguni to dahab na ilinya ²³ Ikukumu icieng lomohin kunenge mietare ara Lobito ko kingutita kulo kofi kunenge ko sahani kunenge fad to dahab na ilinya. ²⁴ Ikukumu icieng lomo ko sangite kulo tic nenge fad to dahab na ilinya na lotum kirioci ratil mia Lobito. ²⁵ Ikukumu icieng ciali lo iheru iyo bau lo ciani lyerati. Oriri afa inyi ara karitun nenge futi Lobito ko nusu lalatun manyu nenge futi Lobito ko nusu ara woita nenge futi uni ko muriaha kunenge kuna lara Lobito ko inyi. ²⁶ Odwanyi kwe nenge ko ken nenge fad ko muriaha to dahab na ilinya manyu ofihi lohileleri kalele nenge iric. ²⁷ Ikukumu icieng oguli ongon ofihahini onyiha ko lohileleri are angati ko are manyu Lobito ngati ojir itirutorihin keyek kitingihin kunenge. ²⁸ Ogatuni keyek kitingihin iyo bau lo ciani lyerati manyu odwanyi kenite to dahab na ilihinya. ²⁹ Ikukumu manyu icieng ngoroni kitwei na iur ko iheru na likaniti na litii katiurok kagingak.