¹ Tona Bezalel, Oholiab ko cio kagingak fad kuna licio Lahitok kigingi ko kirunga lo yenun koditi lo kitiyo ticitici kulo duho faji na inyu ojir itii tic iya na locihare Lahitok Moses token. ² Tinyia ilolongu Moses Bazalel ko Oholiab ko cio kagingak fad kuna licio Lahitok kirunga manyu kuna liruk fwonuno kitiyo tic. ³ Ifotu icieng sangite fad kuna licio Israel lo kitiyo tic lo duho faji na inyu to kac kulo Moses. Manyu osodoro cio kiyaunita kiciorita to kiruk kiwanyi ko kiwanyi. ⁴ Tona ongerihi kagingak fad tic na lorumu icieng itiyo lo duho faji na inyu. ⁵ Ko jimitan iyo Moses, “liyauno cio sangite ogal kuna lowahiti to duho lo faji na inyu na locik Lahitok ojo ojir itii. ⁶ Tinyia icio Moses cik manyu iyari tenya nenge katwa lo kem fad: Kecio lobo tungani retoni kode ngorwani orihe odumu lobo tohi ara kiciorita lo faji na inyu. Tona itihi cio sodoro kiyauno sangite ari, ⁷ tonyio tohi na lotehita kaduhok orumu lobolo ogal na lowahiti lo keruno tic. ⁸ Cio fad kuna igingiha to kiji lo katiyok ko kikukuma kema lomanyare ko kyela kigeniti tomon kulo usihin kuna ifurangi, imalangi ko kuna idoriari kuna likadi, ko cerubihin ikadahini kenite to kac kuna lomohoro. ⁹ Oriworo afa kyela kigeniti fad karitun neicieng yadi tomon ko ongon manyu lalatun yadi are. ¹⁰ Odumuni kyelani kigeniti miet imorihini ara lobi- imorihini manyu kuna kude miet iya na. ¹¹ Oto icieng ikukumahini konyeha kulo jararahin kuna ifurangi kutuk lo kyela kigeni lo lohicungi iyo Lobito itubit, itii manyu jii iyo itubit lo are. ¹² Ikukumahi manyu icieng konyeha kulo jararahin keek miet iyo kyela kigenit na lara lohicungi iyo itubit lo Lobito itii manyu jii iyo itubit lo are ara na lisirani konyeha kulo jararahin iyo kuna itubiti. ¹³ Oto ko kikukumunoti jararahin kulo dahab keek miet imorunorihin kuna itubiti are fad ojir kema lomanyare olotu imoruno fad ara Lobito. ¹⁴ Ikukumu icieng kyela kigeniti to fofi kulo kiri ara kimuhi lo kwe lo kema lomanyare kuna lotum tomon ko Lobito. ¹⁵ Icieng kuna kyela kigeniti tomon ko Lobito fad ara kuna iriworo kuna lara karitun neicieng yadi tomon ko miet ko lalatun yadi are to kyela Lobito lobit. ¹⁶ Imorahi icieng kyela kigeniti miet ara itubitlobito ko kuna kude ile manyu ara itubit lo are. ¹⁷ Oto icieng ikukumu konyeha kulo jararahin keek niet iyo kutuk lo kyela kigenit lo lohicungi iyo itubit lo Lobito manyu itii iyo kyela iribi lo lohicungi lo nu itubit bito. ¹⁸ Ikukumu manyu icieng jarara kulo mwala keek miet ojir imoru kema lomanyare ara Lobito. ¹⁹ Tinyia ikukum icieng kimuhi lo kema lomanyare to fofi kulo mongi kulo kera kuna libuyi to renge na ido manyu to kai lona, icadduhini kiyeni na isisik na lonota otoc. ²⁰ Ikukum icieng gurihin kulo kema lomanyare kuna ibiri to bau lo ciani lyerati. ²¹ Ara afa karitun lo guri Lobito Lobito futi tomon ko miet lalatun nenge futi are. ²² Ko riho are kuna lopar isirani. Ikukum icieng guri kulo kema lomanyare itiriri fad jii. ²³ Ikukum icieng guri keek are ngati lo orof lo kema lomanyare. ²⁴ Manyu ikukum icieng todohin keek ongon kuna lofihi fotiricio kuneicieng tedohin are fotiri lo guri Lobito Lobito fotiri lo rihoti Lobito. ²⁵ To ngati lo kai lo kai lo kema lomanyare manyu ofihi guri keek are, ²⁶ ko tedohin keek ongon. are fotiri lo guri Lobito. ²⁷ Ikukumahi manyu icieng guri ile ngati lo lodoyore lo kolong lo kema lomanyare, ²⁸ Manyu ikukumahini guri are iyo rukun lohicungi lo kema lomanyare. ²⁹ Iyo kuno rukuni are oryeha orumu guri many to kof many kai manyu itirutohini iyo oguliti Lobito itii icieng are fad ara na iriworo. ³⁰ Tona ara afa guri mietauni ko tedohin tomon ko ile- are fotiri lo guri Lobito. ³¹ Ikukumu manyu icieng riho to bau lo ciani lyerati- miet iyo guri kulo Lobito ngati lo kema lomanyare, ³² miet manyu iyo Lobito ngati, ko miet iyo guri kuna longoni ngati lo lodoyore lo kolong iya lohicungi lo kema lomanyare. ³³ Ikukum icieng riho kulo kiji kuna lopar many to lohiciahi many lohicungi. ³⁴ odwany icieng guri to dahab manyu ikukumuni oguli kulo dahab kuna linief riho odwany manyu icieng riho to dahab. ³⁵ Ikukumu manyu icieng kyela kigenit to usi na ifurang, na imalang ko na idorie ko kyela iribi na likadi na likadahini cerubihin ija to tic lo kagingak. ³⁶ Ikukumu icieng guri ongon to bau lo ciani lyerati manyu odwanyi to dahab. Ikukumu icieng kigolihin kuneicieng ko kikukumuno tedohin kuneicieng. ³⁷ To agwala lo kema ikukumu icieng kyela kigenit to usi na ifurang, na imalang ko na idori ko kyela iribi na liked katibibilani, ³⁸ manyu ikukumahini guri miet ko kigolita kuneicieng. Odwany icieng kweci kul guri ko riho kuneicieng to dahab manyu ikukumahini tedohin kuneicieng tomon to mwalati.