¹ Ara kuno karanecio kulo tee kulo Israel kulafa lofwo iya Ijipt ko apa neicieng ko ngorwo ko tee kuneicieng. ² Reuben, Simeon, Levi ko Juda; ³ Kakar, Zebulun ko Benjamin; ⁴ Dan ko Naptali; Gad ko Aser; ⁵ Ara afa lotataha kulo Jakob fad keek mietare; orumu Josep longon Ijipt. ⁶ Tinyia ofwonu Josep ko recera ko na kofiangiti fad owei. ⁷ ati ofwonu Israel opit noo; otomonoro icieng bebe, osodoro wel neicing oborengi bebe many olotu kof ifut ara icieng. ⁸ Tinyia olotu kabu na lida Josep ara lobo tohi iyo inyi olanyu Ijipt. ⁹ Ojo inyi iyo cio kunenge, “Itode! lofwonu Israel loborengi iyo ohoi. ¹⁰ Ifwonu ngatiyoreti icieng to genyun, kalida ara jii oto cia osodoroti pitan oborengi, na kololotu jore kov niyang otumiti kimora ko merok kuniyang kitiremo ohoi ko kifirioro tone kov”. ¹¹ Tona ofik icieng kulahitoha kulo tic lo kitigema icieng to tic panyar itiduk icieng taya lo Parao. ¹² Ati iya na litigimarihin icieng noo otomoniti manyu noo oborengi ipude kof oto cio kulo Ijipt obangi Israel bebe. ¹³ manyu itiyoti icieng to kisasuo. ¹⁴ Icio icieng warun neicieng ogol noo to tic na igol lo nyona lokulufi ko boho matafali ko ticitici kulo manatak; iyo tic na igol na litiyo icieng itiyore cio kulo Ijipt icieng to kisasuo ko kimoc. ¹⁵ Tinyia manyu orihohi kabu lo Ijipt katitomonok kulo ngorwo kulo Ibru na lobara Lobito Sipra ko Lobito Pua ojo, ¹⁶ “Kalilwaha ite ngorwo kulo Ibru kititomono ko kitara tee kolongon icieng iyo seger lo tomonun, ka lideu ite jimitan ara kito retoni, ifade inyi; ati kalara kito karioni ingohiti owar. ¹⁷ Ati orumu katitomonok obang Lobanga ida itii iya na locihare kabu lo Ijipt icieng ojo ojir itii; icio icieng tee rei owari. Ilolongu kabu lo Ijipt katitomonok itifi icieng ojo, “Nyio itii ite jii? Nyio ingerihi ite tee rei owari. ¹⁸ Ilolongu kabu lo Ijipt katitomonok itifi icieng ojo, “Nyio itii ite jii? Nyio ingerihi ite tee rei owari?” ¹⁹ Inyiahahi katitomonok Parao ojo, “Ida ngorwo kulo Ibru ori ko ngorwo kulo Ijipt; ilotiri icieng manyu otomoniti deu deu orihe katitomonok ida logoru.” ²⁰ Tona ibaya tau lo Lobanga iyo katitomonok manyu osodoro cio tomonun oborengi. ²¹ Tonyio obang katitomonok Lobanga, icio inyi icieng tee kuneicieng. ²² Tinya icio Parao ene ciha iyo cio kunenge fad ojo, “tee rei kulo Ibru fad kuna lotomoniti ojir ibirohini katwa lo nam Nail ati ingohiti tee kariok owari.”