¹ v1 Ka li ningo ite Lahitok Lobanga ningi tur manyu i ric ki jifita cihicihi kunenge fad kuna lahi co nan ite elefar, ki ting cia Lahitok Lobanga ningi ite kai lo misihi fad to kof. ² O fwonu cia kuno igatiti fad kenite kuningi manyu ki lihita ko ite ka li ningo ite Lahitok Lobanga ningi. ³ I ngoni cia ite ko gum kang hatua manyu i ngoni ko gum oleng. ⁴ O ngon cia gum iyo tee kuna li tomoni ite, iyo manatak, kacau, kirieho ko tee kulo kera ko sang to twoli kuningi fad. Aduhuhin ko akuhuhin ko toboha kuna li ngolare ite kofwo kulo mugati o ngoni cia ko gum. ⁵ Aduhuhin ko akuhuhin ko toboha kuna li ngolare ite kofwo kulo mugati o ngoni cia ko gum. ⁶ I ngoni cia ite ko gum ka li fworo, ko gum ka li yituno. ⁷ I co cia Lahitok ite i lanyu merok kuna lo woju ki iti remo ite. O fwonu cia icieng diho ite to ngati lobito ati i sarari to ketemoni ningi ngatihin mietare. ⁸ I co cia Lahitok gum iyo derona kuningi manyu iyo sangite pili kuna lo tir kac kuningi. Ki co cia Lahitok Lobanga ningi ite gum iyo kof na lohi cwara Inyi ite. ⁹ Ki iti golihi cia Lahitok ite ara cio kunenge kuna i nyuji iya na lo cihare Inyi diho ite to ki butia ka li ric ite cihicihi kulo Lahitok Lobanga ningi manyu i lot to ningo Inyi. ¹⁰ Oto cia cio kulo kof fad o deu o joo ki lolongi ite to karana lo Lahitok manyu ki bangi ite. ¹¹ Ki co cia Lahitok ite bara na hitok iyo tee kuna li tomoni ite, iyo kacau ko kirieho kulo sang kuningi ko manatak kuningi to kof lafa li buti Inyi diho lohitwaha kuningi lo ki cwara ite. ¹² O nga cia Lahitok kai lotubare lo imariti kunenge lo culuno kuju iyo kof ningi furat ko ki cwara gum iyo ticitici kulo kac kuningi fad. I kurohi cia ite iyo misihi beciek ati ida i kuru iyo lobo. ¹³ Ki iti rak cia Lahito kite ara kue ida ara kalicik. Ka li ric ite cihicihi kulo Lahitok Lobanga ningi kuna lahi cwara nan ite elefar manyu i gol ki jifita icieng, ito cia ite i wasihi ngonun kai ida ara fotiri. ¹⁴ Ke gere oleng to lobo iyo kuno cihicihi lahi co nan ite elefar; iya iteten kode iya ikajong ki jifaru lobangahin kude ake lo fworo ki wora icieng. ¹⁵ Ati ka lida ite i ningo Lahitok Lobanga ningi, ida i jif kuno cihicihi ko isingiti lahi cwara nan ite elefar, o fwonu cia kuno ificiti fad diho ite manyu ki iti horu ite. ¹⁶ Ki ficiori cia ite to kang hatua, ki ficiori to oleng. ¹⁷ I ficiori cia aduhuhin kuningi ko kingolihin kulo kofwo. ¹⁸ I ficiori cia tee kuna li tomoni ite, manatak, kacau ko kirieho kulo sang kuningi. ¹⁹ I ficiori cia fworo ko yituno ningi. ²⁰ Ki juhahi cia Lahitok ite ificiti, dataru ko iriengiti iyo sangite pili kuna li tir ite to kac kuningi many i keroro ite manyu i runy ki mura to rohojun na li tiyi ite lo ngerihino Inyi. ²¹ Ki juhahi cia Lahitok ite jiohijiohi many ki keru ite to kof na li fworo ite ki taluno. ²² Ki bok cia Lahitok ite to mwaita kuna i rohori iya amii ko idute ko nohun lo kenite, ko ulan ko nohun na i gol ko kakum, ki furek na li iti mura kenite na cia lohi juhahino ite many i keroro. ²³ O ri cia kai na lo ngon kueci kuningi iya mwalati to golun ko kof to kejuha kuningi iya biliet. ²⁴ Iti lulue cia Lahitok kuju to kof ningi ara fur na cia lo lotu to kai kenite kuningi many i keroro. ²⁵ I co cia Lahitok merok kuningi ki lanyu ite. I fwonu cia ite diho icieng to ngati lobito ati i sara to ketemoni neicieng ngatihin mietare ito cia ite ira tohi lo bangun iyo okabwehin kulo kof fad. ²⁶ Ara cia kenite kuningi daha lo kweny fad ko tyangi kuna i ngereha na lo ru ko tungani na ngi iti bang icieng. ²⁷ Ki bok cia Lahitok ite to lofunoho kuna lo ri ko kulo kof lo Ijipt ko loturugulehin, korongan kuna iyesi ko yifa lo kenite na lida o furie. ²⁸ Ki bok cia Lahitok ite to mininga, ngodo ko kipalaru lo kue. ²⁹ To kil lo far i bunyita cia ite iya tungani na i ngodo to lokimuyuk. Ira cia ite cio kuna lida i tenu iyo sangite fad kuna li tiyo ite, to faritin ko faritin ira cia ite cio kuna lohi songarehin manyu o rujoti sangite to kac kuningi na lo ru ko tungani na lohi lwak. ³⁰ I suf cia isi karioni i wak yema o lotu lobo tungani ake i niefe o loo o getore. I fak cia isi kaji ati ida i manya katua. Iti bul cia isi vinore ati ida i mang ko ngak kunenge. ³¹ O ngoti cia mongo nino to ketemoni nino ati ida cia isi i mang tyang nenge ko lobo sidi. O rujori cia sigiria nino to golun ida i nyiahuni. I ciori cia kera kunino iyo meroni ati o ru tungani li talu icieng. ³² I ciori cia tee rei ko tee kariok kuningi lobo misi ake manyu manyu o niamaha mute konyieha kuningi deya kikoi faritin ko faritin ki lanyu ko tingo kana to niama. ³³ O fwonu cia cio kuna lida ite i yen o nyia daha na li remu ite ati o ru lobo tohi lohi ciori isi na lo ake ko ki iti gema faritin fad. ³⁴ Ki iti bang mute ite sangite kuna li deya ite. ³⁵ O bok cia Lahitok kunga ko kejuha kuningi to lofunoho kuna i meji lida o tum furioro, kuna lo rub ken nino many to katua lo kejuha many kiji lo kue. ³⁶ Ki fuhe cia Lahitok ite ko kabu ningi na li nyumu ite iya misi na lida ite kode lohitwaha afa kuningi o yen. I fwo cia ite i wor lobangahin kulo keyek kode morutok to ijia. ³⁷ Ara cia ite tohi na li iti banga, lo kisongare ko kwenitare to kiji lo cio pili kuna lohi fuhe Lahitok ite ijia. ³⁸ I yii cia ite kinyiemo kuna i borengi manatak kuningi ati i dengu daha lobo sidi tonyio o fwonu cia iterebuk o keru daha to manatak. ³⁹ I rem cia ite vinorehin iti bul ati ida i mat vino kode i dieu ngak kunenge i nyia tonyio i rumu kuru lo keru icieng. ⁴⁰ I ngoni cia ite ko cianito kulo olif o rub kof ningi ati ida cia ite i tiyore ngoroni tonyio o rurworo cia ngak kulo olif. ⁴¹ I ngoni cia ite ko tee rei ko kariok ati ida cia ite i tek icieng tonyio i niefari mute icieng. ⁴² O keru cia ijuhiti kulo iterebuk cianitok ko manatak kulo kof ningi. ⁴³ O fwonu cia misiok kuna lo manya kiji ningi o tingoro kai o boroho ki lany ite ati i fwonu cia ite i sidiha bebe. ⁴⁴ Ki kurohi cia icieng ite ati ida cia ite i kurohi icieng. O fwonu cia icieng ara kue ite ira kalicik. ⁴⁵ O fwonu cia kuno ificiti fad kenite kuningi. Ki iti rwang cia icieng ite many ki iti horu ite many i keroro tonyio i beru ite ningo Lahitok Lobanga ningi ida i ric ki jifita isingiti ko cihicihi kuna lohi co Inyi ite. ⁴⁶ I tongo cia icieng ara kitotorita kulo kipany diho ite ko lotataha kuningi to faritin fad. ⁴⁷ Tonyio ida afa ite i wor Lahitok Lobanga ningi to kwama ko kwerun lo taulo to faritin kulo bara ningi, ⁴⁸ tona to kinga ko kure, to okilwahaje na hitok ko kidak na i me i wor cia ite merok kuna lo culu Lahitok diho ite. O fihahi cia inyi ayok lo biliet muruto kuningi many ki keru ite. ⁴⁹ I yauno cia Lahitok misihi kuna lo fwonu ki iti remo ite to faji na i loma, to lohicungi lo kof, iya logiga na lo dohino kof, misi na lida ite i yen tenya neicieng, ⁵⁰ misi na i ngere na lida o rima ngoroyok kode o deya tee to mehino. ⁵¹ O keru cia icieng tee kulo sang kuningi ko daha lo manatak kuningi many i keroro ite. Ida cia icieng iti tongohi ite kude ngamang, vino ngejuk kode ngoroni lo olif kode kacau kode kirieho kulo sang kuningi many i mura kof ningi. ⁵² I rit cia icieng kangite kulo kof ningi fad many o uroro kuna kiwatahin kulo lohitir li geno ite kof. I rit cia icieng kangite fad kuna lo ngon na kof lohi cwara Lahitok Lobanga ningi ite. ⁵³ To kidak na cia lohi co merok kuningi ite to kuna faritin kulo kirita, i kony cia ite tyang lo tee kuningi; tyang lo tee rei ko tee kariok kuna lohi co Lahitok Lobanga ningi ite. ⁵⁴ Kileng tungani na i bolo na li worati ida cia kisa i nief iyo rece nenge kode ngorwani nenge na li maru inyi kode otonge kulo tee kunenge, ⁵⁵ manyu ida cia i co icieng lobo tyang lo tee kunenge na lo konya inyi. Ara cia na tohi na lo tehita inyi keken to kidak na li co merok kuningi ite to faritin kulo kirita lo kangite kuningi fad. ⁵⁶ Kileng ngorwani na i rie, i dwaru manyu i tima to kiji ningi na i tima ida o wak kileng tiro kof to keju - iti liwa cia retoni nenge na li maru inyi ko kito nenge retoni kode ngorwani ⁵⁷ to mudong ko kito na lo tomonu inyi. Tonyio to kidak na lo ngonore inyi, o wak konya icieng lo-lit to kidak na cia lohi co merok kuningi ite to faritin kuna li ritare icieng kangite kuningi. ⁵⁸ Ka lida ite i ric ki jifita tenyitenyi kulo ene cik kuna li gero iyo ene buk, manyu ida i rima ene karana i nyu lo Lahitok Lobanga ningi - ⁵⁹ o culu cia Lahitok mwaita kuna li iti banga kenite kuningi ko lotataha kuningi johijohi kuna i goli manyu kuna i goli, ko mwaita kuna i rohori manyu kuna lo sio. ⁶⁰ I yauno cia diho ite mwaita kulo kof lo Ijipt fad kulafa li bangi ite, oto o fwonu o gorohi kenite kuningi. ⁶¹ I yauno manyu cia Lahitok diho ite mwaita ko johijohi kuna lida koditi neicieng i gero iyo ene buk lo cik, many i keroro ite. ⁶² Ite kuna i borengi iya kangier kulo kai i fwonu cia i tong kude kuting, tonyio ida ite i ning Lahitok Lobanga ningi. ⁶³ Iya na lo kwamare Lahitok ki iti bara ko ki iti borengo ite, o kwama manyu cia Inyi ki iti mura ko keruno ite. Ki rutori cia ite to nu kof li fworo ite ki taluno. ⁶⁴ Oto cia Lahitok ki iti sarahi ite kiji lo misihi many to angati lo lohicungi lo kof many lobito ngati. To inyia i wor cia ite lobangahin kude ake, lobangahin kulo keyek ko morutok kuna lida ite kode lohitwaha kuningi i yen. ⁶⁵ To kiji lo kunu misihi ida cia ite i rumu lobo kisiliban o ru ko faji lohiyomare lo kejuha kuningi. To ijia ki co cia Lahitok ite tau lo ki udo, konyieha kulo kodomo ko tau lo corahino warun. ⁶⁶ I war cia ite ara kuna lo yihaha taulo, na li fut ko bangun karue ko far na lida i geno warun ningi. ⁶⁷ To kiwanyi i joo cia ite, "Ngara hati kurou!" manyu to kurou i joo cia ite, "Ngara hati kiwanyi!" to bangun na mute li fut taulo kuningi manyu to tohi na mute lo deya konyieha kuningi. ⁶⁸ Ki cule cia Lahitok ite to baburi iya Ijipt iyo owele lafa la joo nan o jir ite ida i yitohi. Ijia i fwo cia ite iti lotohi kenite kuningi iyo merok kuningi ara opiihin rei ko ngorwo ati o ru lobo tungani lohi nyiang.