1 O cik Moses ko lohitwaha kulo Israel cio o joo, "Ito ric kuno cihicihi fad lahi co nan ite elefar. 2 Langun li rang ite Jordan li rute nu kof lohi cwara Lahitok Lobanga ningi ite, i cidohiti kude morutok hitoha ito hati i daf ko ki ruta to ofuyo. 3 I gerohiti iyo kuna morutok tenyitenyi kulo ene cik fad, ka li range ite i fwo kof na lohi cwara Lahitok Lobanga ningi ite, kof na li tihitare lei ko otoro, iya na lo cihare Lahitok Lobanga lo lohitwaha kuningi ite. 4 Manyu langun li rang ite Jordan i cidohiti kuna morutok kai lo donge lo Ebal iya ene lahi cihare nan ite elefar manyu i daf icieng ito hati i rut to ofuyo. 5 Ito duhohi ciali iyo Lahitok Lobanga ningi ijia, ciali na lo duho to morutok. Ke kef icieng to lobo biliet. 6 Ito duk ciali iyo Lahitok Lobanga ningi to morutok kuna li balo oleng manyu i curahi kiciorita kai nenge diho Lahitok Lobanga ningi. 7 I fotohiti kiciorita kulo kimoraru ijia i daha manyu i kwama to ketemoni lo Lahitok Lobanga ningi. 8 Manyu o jir i ger otoc tenyitenyi kulo ene cik fad iyo kuna morutok li cidohi ite." 9 Oto Moses ko kadwarak kulo imanit lo Levi o rihohi cio kulo Israel fad o joo, "Ito buhoti cio kulo Israel, ito ning! Lira jijia ite cio kulo Lahitok Lobanga ningi. 10 Ito ning Lahitok Lobanga ningi manyu i jifata cihicihi ko kisingiti kunenge kuna lahi co nan ite elefar." 11 Inyi lafar bito o cik Moses cio o joo, 12 "Langun li rang ite Jordan o jir kuno imaniti o woita kai lo donge lo Gerazim ki gatahino cio gum; Simeon, Levi, Juda, Isakar, Josep ko Benjamin. 13 Manyu o jir kuno imaniti o woita kai lo donge lo Ebal lo tenya ificiti; Reuben, Gad, Aser, Zebulun, Dan ko Naptali. 14 O jir cio kulo imanit lo Levi i furahi cio kulo Israel to ogoro na i kwat o joo: 15 I ficiori lobo tungani lo duhu lopidinga - tohi na li iti dwara diho Lahitok, tohi na li kukumuni to kac kulo tungani i cidohi hati lo - lit. Oto cio fad o joo 'Amen!' 16 I ficiori tungani na lida o rima apa nenge ko iyang nenge. Oto cio fad o joo 'Amen!' 17 I ficiori tungani na li iti sual moru lo lohikori lo kof lo loryehat nenge. Oto cio fad o joo 'Amen.' 18 I ficiori tungani na li iti gere kangodoni to kikoi. Oto cio fad o joo 'Amen!' 19 I ficiori tungani na lo kud ngoto lo tenya lo misiohoni, kito okidak ko lafuserito. Oto cio fad o joo 'Amen!' 20 I ficiori tungani na li ruma ngorwani lo apa nenge tonyio ida o rima kigeti lo apa nenge. Oto cio fad o joo 'Amen!' 21 I ficiori tungani na li koba sang. Oto cio fad o joo 'Amen!' I ficiori tungani na li ruma kanece nenge; kito lo apa nenge kode kito lo iyang nenge. Oto cio fad o joo 'Amen!' 22 I ficiori tungani na li ruma kanece nenge; kito lo apa nenge kode kito lo iyang nenge. Oto cio fad o joo 'Amen! 23 I ficiori tungani na li ruma komoni nenge. Oto cio fad o joo 'Amen!' 24 I ficiori tungani na li fade loryehat nenge lo- lit. Oto cio fad o joo 'Amen!' 25 I ficiori tungani na li lifu robia o joo o jir i fadari tungani na lo ru ko kipal. Oto cio fad o joo 'Amen!' 26 I ficiori tungani na lida o ningo kuno tenyitenyi kulo cik ara na lo beru ki jifita. Oto cio fad o joo 'Amen!'