1 Oto kadwarani lahitok itifi inyi ojo, “ara kuno tenyi tenyi lohidororihin isi tenyi tenyi kulo dede?” 2 Diho ene kitifia inyiahahi inyi ojo, “recera ko monyeri kuniyang kining nan! Lobanga lodeya itibotu afa ken nenge diho monye liyang Abraham orihe inyi ongon Mesopotamia orihe inyi ida lomanya Aran. 3 Ojo Lobanga diho inyi, “tongerihi kof nino ko cio kunino, ilo kof na lahitotorohi ca nan isi”. 4 Oto inyi ongerihi kof lo Kalidaia ko lotuno manyu Aran. To kifwongi lo wei lo monye, oculu Lobanga inyi ene kof jijia limanyare ite. 5 Ida afa inyi icio diho Abraham faji ene kileng lonyonare lo keju. Ati ocik Lobanga diho inyi ojo inyi mute ko lotataha kunenge lofwonu oluny ene kof ko kileng lorihe kito oru diho Abraham to kuna faritin. 6 Oteny Lobanga diho inyi ojo; “ara mute lotataha kunino karatitak iyo kof na lida ara neicieng manyu ara opihin manyu itigemi to karihin mia ongon. 7 Ati acio mute nan boho diho kof na litigem icieng ara opihin manyu to kifwongi ofwonu mute icieng tonu kof ofwonu kiwor nan iyo ene faji. 8 Oto ko kicwara Abraham ciharu lo kilira olotu Abraham ara monye lo Isaak olotu ilir inyi to kifwongi lo faritin mietauni kulo otomone nenge. To kifwongi olotu Isaak ara monye lo Jakob olotu Jakob ara monye lo fafaico tomon ko are. 9 To okaine lo kuna fafaico ken lo rece neicieng Josep ofwonu itilotori inyi ara opi kof lo Ejipt. Ati ongon orumu Lobanga ko inyi. 10 Manyu olwak inyi diho kidak nenge fad. Icio inyi Josep genyun manyu icio kisisio lo Parao kabu lo Ejipt, na lolotu ofik inyi ara kalanyunoni lo Ejipt ko kang lo okabwe nenge fad. 11 Oto kinga ourohino Ejipt ko kof lo Kanaan fad iyauno kidak na hitok manyu ida fafaico kuniyang orumu daha. 12 Koloning Jakob ojo ongoni ngamang Ejipt, oto ocule fafaico kuniyang lotita lo lobito. 13 To lotita lo are, orihohi Josep recera kunenge jimitan ara inyi Josep manyu ico Parao oyen cio kuloho Josep. 14 to kifwongi ocule Josep tenya lo kilolonguno monye ko kalenge fad cio keek mietare ko miet. 15 Oto Jakob ko loro iya kof lo Ejipt faji lafa loweihi inyi ko fafaico kuniyang fad. 16 Iyauni kenite kuneicieng ofwonu onuhahini Sekem faji lo kwecerehin lafa linyangu Abraham diho tee kulo Amor to robia 17 Kolonyihu faritin kuna litifutare Lobanga ciha nenge diho Abraham, oto wel lo cio to Ejipt osodoro bebe. 18 18 Oto lobo kabu na lida oyen Josep olotu olanyu kof lo Ejipt. 19 itii inyi cio kuniyang to kisasuo orihohi icieng ojo ojir ibirorita tee idoleha kuneicieng ojir ida owari. 20 Kuna faritin otomonunorihin Moses na lodeuni odwaru to ketemoni lo Lobanga otemi rica inyi to ofahin uni kaji lo monye. 21 Ko lofihahini inyi oleng kutuk lo kare, olotu kito karioni lo Parao iyaru inyi olo ifit inyi ara kito nenge token. 22 2 Itiyeni Moses to genyun lo kof lo Ejipt fad manyu ara inyi retoni na igol iyo tenya ko tic nenge. 23 Kologoru karihin kulo Moses keek ongon, olo inyi waja cio kunenge Israel kuna kude, 24 oto odeu lobo bito itiyo Ejiptoni ara na irohoi, olo inyi kisisio ko kifadaru na Ejiptoni. 25 Iiyo orumu Moses ojo odeu ca cio kunenge jimitan kicio Lobanga inyi ara lo lwaha icieng ati ida icieng iniang. 26 Kiwanyi nenge olotu orumu Israel are obaha olo inyi owak tafa ko kitiyomo icieng, oto ojo diho icieng, “lwak, ira ite recera nyio ibaha ite ake ake?” 27 Oto lobito na lolumo kaletoni ocule Moses ko jimitan diho inyi, “Ngai lohifik isi ara kangotoni lo tenya kiji niyang? 28 Iwak isi kifadaru nan iya langole Ejiptoni lifade isi?” 29 Koloning Moses ene tenya ko kifejaru iya kof lo Median olo manya ijia ara katongoni otomonu tee are tijia. 30 Kolokeru karihin keek ongon, oboto malaika diho Moses to tim na longon cura to kuny na lonyiha ko donge lo Sinai. 31 Kolodeu inyi ene kima oto ipany bebe, kolonyiharu inyi lo kingengela otoc, oning inyi ogoro lo Lahitok na lojo, 32 “nan Lobanga lo fafaico kuningi, Lobanga lo Abraham, Isaak ko Jakob” ihihirita Moses ko bangun ida oteha deya. 33 Oto Lahitok ojo diho inyi, “topuce kamuha kunino tonyio ene faji liwoitare isi ara faji na inyu. 34 Ladeu nan kidak lo cio kunei to kof lo Ejipt. Laning nan kitudita neicieng inyi ene laculuno nan lo lotuno laha icieng. Jija ou ahicularu nan isi ijia Ejipt”. 35 Inyi ene Moses bito lafa loberu icieng imetahini ojo, “ngai lohifik isi ara kangotoni lo tenya kiji niyang?” Ocule Lobanga inyi to ken ara kalanyunoni ko kalahunoni neicieng to malaika na loboto diho inyi tona tim lo cura. 36 Orihuno icieng oleng to Ejipt manyu itii ticitici kuna litirima ko kitotorita kulo tanguhin becek to kof lo Ejipt ko to nam na ido, ko karihin keek ongon katwa lo kuny. 37 Inyi Moses lobito na lorihohi cio kulo Israel ojo, “oculu mute Lobanga kamocani na lori iya nan diho ite to kiji lo cio kuningi. 38 Ongon afa inyi lotubare to kuny ko lafa malaika lotenya ko inyi to donge lo Sinai ko fafaico kuniyang manyu ifotu inyi tenya lo warun na longerihi diho ohoi. 39 Ati oberu fafaico kuniyang ningo tenya nenge. Oberuni inyi manyu to katwa lo taulo kuneicieng ibeloti iya Ejipt. 40 Orihohini diho Aron ojo kikukumahi ohoi lobanga na lohirihe ohoi. Tonyio ene tungani Moses lohiyauno ohoi to Ejipt ida ohoi kiyen tohi na litiihino diho inyi! 41 Ara afa far na likukumunore icieng kitiririt lo kace. Iyauno icieng icoriti kuneicieng diho inyi na kitiririt neicieng okwamati tohi na likukumu icieng to kac kuneicieng. 42 Ati ibelo Lobanga olahi icieng kiwora sangite kulo kai. Iruhohino ene to tohi na ligero iyo book lo kamocani, Iyauno afa ite diho nan kikumiti ko kicoriti kuningi, To karihin keek ongon to kuny kaji lo Israel 43 Liting ite tivine lo molek kai ko kangeriti lo Lobanga ningi Repan Tona ahicule ca nan ite manyu korwong lo Babilon. 44 Ongon afa fafaico kuniyang ko kema lo ciha lo Saden katwa lo kuny. Ikukumi inyi iya na litotorohinore Lobanga Moses to donge. 45 Kalifotuni kema , iyauno monyeri kuniyang ara lobito ko Josua ene kof lifuharore Lobanga misiok to ketemoni neicieng. Itongo afa ene kof many diho faritin kulo David 46 na lorumu gum diho Lobanga na many lilifa ojo ojir orumu lohitongore akukumahi diho Lobanga lo Jakob. 47 Ati Solomon afa lolotu oduk kaji lo Lobanga. 48 Ati kileng ngara jii inyi na longon kai noo ida itongo katwa lo kaji na lifahi to kac iya na afa lotenyare kamocani ojo, 49 Ara kai seger lo okabwe nei, ojo Lahitok jii ara kof lohitenore lo kejuha kunei Koditi lo ani kaji iduhohi ite diho nan? Kode aji ca ongon lohiyomare nei? 50 Ida re kana nei loduk kuno sangite fad? 51 Ite cio kuna igoli muruto, kuna lida taulo iliraru manyu otuhoho kiyoha: iri ite ko fafaico kuningi, itiremo ite Okorif na Inyu. 52 Ongon afa lobo kamocani lida fafaico kuningi itigem? Ifadari ko kulafa limoca lotuno lo kabirani. Manyu ifwonu ite itob ko kifadaru inyi. 53 Ite kulafa lirumu cik lo Lobanga lafa liyauno malaika ati ida ijif”. 54 Koloningiti ene tenya oto ilongojitati na lokonyi kala rid to inyi. 55 Ati Steven na lifut ko Okorif na Inyu, ilom kai ko deuno deyo lo Lobanga ko Yesu owoita to ngati lo iteten lo Lobanga Apa. 56 Ko jimitan diho icieng, “Itode adeya nan kai ongaja ko kito lo tungani owoita to ngati lo iteten lo Lobanga”. 57 Tona ko tuhoti kiyoha kuneicieng igorori to ogoroho kuna ikwati icieng fad ko kiburahinoti inyi 58 ipihori inyi oleng to kanghatwa ko kiciaha caha inyi to morutok. Oto sadeni kuna locaha inyi ofik kyelani kuneicieng kejuha kulo lobo lokilahaji lobara Saul. 59 Kolocahati inyi, ilifa Steven ojo, “Lahitok Yesu ifotu okorif nei”. 60 Oto ko gungon ko kicira ojo, “Lahitok kefik ene kipal kenite kuneicieng”. Langun lojo jii ko weyaru.