¹ Nan Paul jayo lo Kristo Yesu to wahun lo Lobanga na longon to ciharu lo warun na longon iyo Kristo Yesu. ² Diho Timoti kito nein a lamaru noo, Ingohi kisa ko kibaya ko kisiliban iyo Lobanga Apa ko Kristo Yesu Lahitok niyang kingon kosi. ³ akwama nan Lobanga na larwa nan to tau na inyu karwe ko far iya lafa lirwaare monyeri kunei manyu abuhunita isi iyo kilifa nei. ⁴ Iya na labuhunitare nan kifi kulo konyeha kunino ageria nan deya isi ojir kwama nei ifut. ⁵ Lohitiiu nan ene tenya kiruk nino na lara lo dede nafa longon iyo tata nino Lois ko iyo iyang nino Yunis na layen nan otoc jimitan ongon manyu iyo isi. ⁶ Tona tenya ahirihohi nan isi ikunya kicwara lo Lobanga na longon warun nino lafa lofihahinore kac kwe nino. ⁷ Tonyio ida Lobanga kicio ohoi okorif lo bangun ati okorif lo golun, lo kimaruno ko rica lo ken ⁸ Dong keco riri kiniefa isi to kicwara Saden to Lahitok niyang kode to nan mabusoni nenge. Ati kingar ko nan rumuno kidak to layomit na ijir to golun lo Lobanga. ⁹ na lohilwahu ohoi manyu kelolongu iyo warun na inyu ida ara to lobo tohi lohitii ohoi ati to wahun nenge ko kisa nenge ake. Kiciori ohoi ene kisa to Kristo Yesu many orihe lohiciahi lo kof. ¹⁰ ati litibotuni jijia to lotuno lo kalwahani niyang Kristo Yesu na lokeru wei tmanyu iyauno warun ko rujon lo wei ara iyo layomit na inyu. ¹¹ Manyu tone layomit inyu kinyumu nan lo rahun ifak, jayo ko katiyenani. ¹² Inyi na tenya na licio nan arumu kidak iya ene larumunore , oto hati ida riri kinyia nan tonyio ayen nan inyi na laruk nan manyu ageno jimitan otum cia inyi rica tohi na lacio nan kana nenge to nu far. ¹³ Tohi na lining isi to kutuk nei toricahi ara kikoi lo kitiyena na ibir to kiruk ko kimaruno iyo Kristo Yesu. ¹⁴ Toric kicwara lofirat lafa lofihi kana nino, toric inyi to golun lo Okorif na Inyu na longon katwa niyang. ¹⁵ Iyen isi jimitan cio pili kulo kof lo Asia lohingohini nan kokileng Paigelus ko Emogines. ¹⁶ Ingohi Lobanga itotorohi kibaya iyo kaji lo Onesiporas tonyio kilwahitita inyi nan manyu ida riri onyia inyi to tora nei. ¹⁷ Ilany kuna fad lafar kolongon inyi ene Roma kitak orumu inyi nan to kigingi many kirumu nan. ¹⁸ Ingohi Lahitok icio inyi kibaya iyo Lobanga tonu far. Iyen isi otoc kikohin beciek kuna lohilwahare inyi nan to Epeso.