¹ Morot kunei kuna lamaru, ara ene waraga nei lo are iyo ite. Ager nan icieng fad lo kitiiunita ite lo kibuha ara na ijir. ² Awak nan ite iiu tenyi tenyi kulafa loteny kamocak kuna inyuji afa berien ko ciha lafa licio Lahitok ko kalwahani niyang ara iyo jayona kuningi. ³ Ketemoni ojir ite iniang jimitan iyo faritin kulo lohicungi ofwonu mute kangalak ingalati manyu ijifitati wahita kunicieng kuna irohori. ⁴ Idimati cia jimitan aji ongon inyi ene lotuno afa locik inyi? Many afa loweyare monyeri kuniyang orihe sangite iwasihi many afa to lohiciahi lo kof. ⁵ Ati oluluhini ara lati jimitan many to lohiciahi oduho afa kai ko kof to tenya lo Lobanga to kenite kulo kifi manyu to kifi. ⁶ To kuna kifi manyu okerunorihin afa kof lo berien. ⁷ Tona tenya bito lo Lobanga ene kof lo jijia ko kai oricahini ara lo curare to kima, ikukumahini to far lo ngoto lo tenya ko keruno lo cio kuna lida oningo Lobanga. ⁸ Ati keluluoro ene tohi bito morot kuna lamaru; iyo Lobanga ori far Lobito iya karihin alif Lobito ari manyu karihin alif Lobito iya far Lobito. ⁹ Ida Lobanga odidi kitifuta ciharu nenge iya na libuhare kude didijon. Idonyo inyi tau to ite ida owak lobo to kiji ningi ori ati owak inyi cio fad ofwonu iyo kirwo lo kipal. ¹⁰ Ati olotu mute far lo Lobanga iya kakokoni. Orii mute kai to kigurita; okeruni mute sangite fad to kima manyu kof ko sangite fad kuna longoni olwa mute oleng. ¹¹ Naha kalokeruni mute sangite fad jii, ojir ite ira cio kuna lori aja? Ojir ite iwar warun lo nyujon ko rima Lobanga, ¹² iya na litilare ite far lo Lobanga manyu iruk lotuno nenge. Iyauno mute na far keruno lo kai to kima manyu ocular mute sangite to nohun. ¹³ Ati iyo to ciha nenge kitila ohoi kai ngejuk ko kof ngejuk, kang lo biran ¹⁴ Dong morot kuna lamaru, iya na litilare ite kuno tenyi tenyi, itotem to golun fad lo kitongo oru kipal oru lobo tenya irohoi lotenyati kenite kuningi kuningi manyu iyomo ko inyi. ¹⁵ Itofik kweci jimitan ara kidonyo lo tau lo Lobanga lwaha iya na ligerore manyu rece niyang Paul iyo ite to genyun na licio Lobanga inyi. ¹⁶ Igero inyi tona kikoi bito iyo waragahin kunenge fad manyu otenya to icieng kuna waragahin inyi na tenya bito. Ongon waragahin kunenge tolobo ko tenyi tenyi kuna logol yenun nenge, kuna lodumu cio kalunyiak itiyore lo kikoi na lida obehi iya na litiyorihin igeriti kuna kude lo keruno kenite kuneicieng. ¹⁷ Dong morot iya na liyenare ite jii, iririati kenite ojir ida kitigerari to talerun lo cio kuna lida ijifita cik kitiurori to faji ningi na ijir. ¹⁸ Ati itoboloroti iyo kisa ko genyun lo Lahitok ko kalwahani niyang Yesu Kristo. Ingohi deyo tongon iyo inyi jijia ko faritin fad. Amen.