¹ Ati ongoni manyu afa kamocak kuna italeri kiji lo cio iya na many cie longonore katiyenak kuna italeri kiji ningi. Iciahi cia kiyauno itiyeniti kuna litisara manyu oberuni obolore lo Lahitok na linyiang icieng iyauno keroro deu deu iyo kenite kuneicieng. ² Ijif cia cio beciek kuna kikohin kuneicieng kulo riri manyu icio kikoi lo tenya lo dede itikaji. ³ To kingaru neicieng kitimumun cia kuno katiyenak italeri ite to tenyi tenyi kuna locifu icieng. Litila ngoto lo tenya neicieng icieng many berien manyu ida keroro neicieng ogetoro. ⁴ Tonyio kalida afa Lobanga ongerihi malaikahin kuna lipal ati ocule icieng kimatare ofihahi icieng mabusi kuna imutohi itilarihin ngoto lo tenya neicieng, ⁵ kalida afa inyi ingohi kof afa berien liyaunore kifi iyo cio kuna loberu Lobanga ati oric Noa katitimani lo tenya lo biran ko cio mietare kuna kude, ⁶ Kolokeru afa inyi kangite kulo Sodom ko Gomora, ocure many ara ingula ara kitotorita iyo cio kuna loberu Lobanga. ⁷ manyu kalolwahu afa inyi Lot tungani na ibir na litiudo tic lo kibot lo cio kuna lida oningo cik ⁸ tonyio na tungani ibir lomanya kiji neicieng orumunita kidak to faritin fad iyo okorif nenge to sangite kuna iboti kuna lodeya inyi ko kuna loningo ⁹ kolongon ene tenya jii inyi jimitan oyen Lobanga lwahunita cio kuna ijiri iyo itemiti ko kikukuma far lo kitigema lo cio kuna irohori manyu icio icieng kitigema ten to kof. ¹⁰ Ara ene dede bebe nenge to cio kuna lijifita wahita kuna irohori kulo kipal manyu itikajati obolore. Ogoli taulo kuneicieng manyu ifudati tenya neicieng manyu ida obangiti ko moro monyeri kulo deyo. ¹¹ Ati kokileng lilany malaikahin icieng to golun ko genyun ida omoroti kaliyauno kidoro kenite kuneicieng ketemoni lo Lahitok. ¹² Ati omoro kuno cio Lobanga to tenyi tenyi kuna lida kileng icieng oyen. Ori kuna cio iya tyangi kuna lida ogenyi kuna manyu lijifita koditi na lotomonunorehin icieng na lotomonuni icieng ara kulo kiniefa ko kifada manyu iya tyangi okeroro manyu mute icieng. ¹³ Odumi cia icieng to rohojun to rohojun na litii icieng. Ara kibuha neicieng lo kwama, kiyada ko kwenita to kiji lo far. Ara icieng kapapalak kulo kof ko kapapalak kulo jiran, opufati iyo kwama neicieng kolodahati ko ite karama. ¹⁴ Otahita konyeha kuneicieng ngorwo kulo kiya. Ida oniamati tahita kikohin kulo kitiyo kipal. Oloha icieng owici kulo kiniefa cio kuna lilorita kweci arus. Ara icieng cio kuna lilany iyo kingaru lo robia, manyu ara icieng kulo okoto na lificiori. ¹⁵ Longerihini kikoi na ibir logerari kijifita kikoi lo Balam kito lo Beor na limaru kidumita kulo kipal. ¹⁶ Ati iriengi inyi to kipal nenge, na lara sigiria, tiang na lida otenya oteny to ogoro lo tungani irieng kimininga lo kamocani. ¹⁷ Ara kuno cio karecio itibihin kuna loru kifi ko lokidihisa na lokuta kiyoma. Ikukumahini lokimuyuk na imutok to icieng. ¹⁸ Otenyati tenyi tenyi kuna hitoha kulo pufa itinonongarihin cio kuna lofuru to kiji lo cio kuna lomanya arus arus iyaru manyu icieng iyo ticitici kuna irohori kulo wahun lo kenite. ¹⁹ Ociharu icieng lo kicwara kuna cio manya lo lanyuno lo kenite kuneicieng ake ati icieng to kenite ara opihin kulo tohi na lipapala icieng tonyio ara tungani opi lo tohi na lolanyu ken nenge. ²⁰ Kolofur icieng iyo kipalaru lo kof to yenun Lahitok niyang Yesu Kristo oto hati ofwori ari iniefiti iyo kipalaru lo kof oto icieng ipalaru to lohicungi ilany afa ketemoni. ²¹ Orumu ngojir iyo icieng ngara afa ida oyeniti kikoi lo biran, ilany yenun oto hati ibelihi korwonga iyo cik na inyu nafa liciorihini icieng. ²² Otumohino iyo icing kitidafi na lojo, “Oite ikure kidiela tohi na losieu inyi” ko na lojo, “Iborok na lilala oitohi kifofoda iyo todohai”.