¹ Nan Saimon Petero karwaani ko jayo lo Yesu Kristo. Iyo cio kuna to biran lo Lobanga niyang ko kalwahani niyang Yesu Kristo lorumu kiruk na idwaru iya niyang. ² Ingohi kisa ko kisiliban ifut iyo ite to yenun lo Lobanga ko lo Yesu Lahitok niyang. ³ Licio golun nenge ohoi sangite fad kuna lewak ohoi to warun ko biran niyang to yenun niyang inyi na lilolongu ohoi to deyo ko jiran nenge. ⁴ Tone licio inyi ohoi ciharu nenge na hitok ojir ara iyo icieng ohoi kingar koditi nenge lo Lobanga manyu kifur iyo muraru lo kof na liyauno wahun na irohoi. ⁵ Tone tenya totem bebe sodohino jiran iyo kiruk nino, manyu iyo jiran tosodohi yenun, ⁶ manyu iyo yenun tosodohi rica lo ken, manyu iyo rica lo ken tosodohi dihan, manyu iyo dihan ⁷ tosodohi warun lo Lobanga, manyu iyo warun lo Lobanga tosodohi kibaya lo tau iyo recera, manyu iyo kibaya lo tau iyo recera tosodohi kimaruno. ⁸ Tonyio kalingon ite ko kuno sangite fad manyu osodoro ketemoni to warita kuningi, kilwak cia ite ida kilanyu kitiyo iyo yenun lo Lahitok niyang Yesu Kristo. ⁹ Ati tungani na lida otehita icieng, ongodo manyu ida odeya otoc manyu loluluoro jimitan kilalari afa inyi iyo warun na irohoi lo kipal. ¹⁰ Tona recera, igeriati bebe lo kitibotuno kilolongo ko nyumuno ningi. Tonyio kalitiyo ite kuno sangite ida ite itum uroro. ¹¹ Oto cia kifotuni ite iyo okabwe na ibara na losio tur lo Lahitok ko kalwahani niyang Yesu Kristo. ¹² Tona atiiunita mute nan ite kuno sangite kileng liyen ite manyu kileng ligurohino ite otoc iyo tenya lo dede na jijia litehita ite. ¹³ Aiiyo nan jimitan ojir kitikwenyunita kibuha ningi kolorihe nan angon iyo ene ken ene kof ¹⁴ tonyio ayen nan ajo lolelek nan angerihi ene kof iya lafa lerihohinore Lahitok niyang Yesu Kristo nan. ¹⁵ Atem cia nan to kikohin fad lo deya jimitan kileng mute ngaru nan itum ite iiunita kuno sangite. ¹⁶ Ida afa ohoi kijifita tenyi tenyi kuna loguliuni to genyun lo cio pafar lerihohinore ohoi ite golun ko lotuno lo Yesu Kristo ati ohoi afa sadeni kuna lodeu obolore nenge. ¹⁷ Tonyio orumu inyi rima ko kwatun iyo Lobanga Apa na lolotunore ogoro iyo inyi to obolore lo kai na lojio, “Kito nitole ene na lamaru nan to inyi akwama nan bebe”. ¹⁸ Ohoi to kenite lening na ogoro lolotu to kai lafar lengonore ohoi ko inyi kai lo donge na inyu. ¹⁹ Manyu kingoni ohoi ko tenyi tenyi kulo kamocak kuna lobehi, manyu itii cia ite ara na ijir kalifik ite taulo iyo icieng, iya na lefihare taulo iyo wangun na linwaha kangeriti lo kiwanyi katwa lo taulo kuningi. ²⁰ Na lilany fad, ojir ite iniang jimitan oru kimoca lo igeriti na lolotu to kitibibila lo kamocani to ken nenge. ²¹ Tonyio ida imociti oreu iyo wahun lo tungani. Ati otenya cio tenya lo Lobanga iya na lolotitare okorif na Inyu icieng.