¹ Aciha nan jimitan ojir item kitifia, kilifa, kilelia ko kicwara kwama ojir itiyoti to cio pili, ² to kabuno ko kalanyunok fad lo jimitan ojir ohoi kitongo to kisiliban ko riejun iyo bangun lo Lobanga ko nyujon. ³ Ojir ene manyu itikwama Lobanga kalwahani niyang. ⁴ na lowak ojo ojir cio fad oolwahuno manyu ofwonu iyo yenun to tenya lo dede. ⁵ Tonyio ara Lobanga Lobito manyu ongon katiyomoni Lobito kiji lo Lobanga ko cio inyi Kristo Yesu. ⁶ na licio ken nenge ara kitilahita lo cio fad saden na liciori to tik na ibehi. ⁷ Manyu tone tenya kidumuni nan lo rahun ifak ko jayo. Atenya nan tenya lo dede, ida nan ataler manyu ara nan katiyenani lo tenya lo kiruk lo dede iyo misiok. ⁸ Awak nan cio to fajihit fad ojir otingi kac kuna inyuji iyo kilifa na loru kilongo ko risa. ⁹ Awak manyu nan ngorwo iciefita otoc to rima ko rica lo kenite ida ara to kikada lo kweci kode to dab ko tongosi kuna imedehi ko kyelani kuna igoli wel, ¹⁰ ati to ticitici kuna ijiri kuna locam to ngorwo kuna liwora Lobanga. ¹¹ Ojir ngorwo oningo lobubuhe to riejun. ¹² Ida nan aruk ngorwani itiyena kode lo bolorohino retoni, ojir inyi obuho ¹³ Tonyio itemi afa oduhuni Adam ida ara Eva. ¹⁴ Manyu ida afa ara Adam itinonongi ara afa ngorwani itinonongi olotu ara kapalani. ¹⁵ Ati olwahuni mute ngorwo to tomonuno tee kolosodoro icieng ko kiruk, kimaruno ko biran.