¹ Nan Paul jayo lo Kristo Yesu to cuha lo Lobanga kalwahani niyang ko Kristo Yesu kigeno niyang. ² Diho Timoti kito nei lo dede iyo kiruk. Kisa, kibaya ko kisiliban iyo isi diho Lobanga Apa ko Kristo Yesu Lahitok niyang. ³ Iya lafar lahicihare nan isi lalorore nan Masedonia itongo inyia Epeso ojir irihohi kude cio ida itiyenati tenya lo talerun ⁴ kode kicwara kenite foro odohohin ko loreunorehin kuna lida icung. Iyauno kuna peha ida itiboloro tic lo Lobanga na lara to kiruk. ⁵ Ara tohi na lobolo tone tenya kimaruno na lolotu iyo tau na inyu ko kibuha na ijir ko kiruk na lara lo dede. ⁶ Lisabe kude iyo kuno sangite lofwori foro tenyi tenyi kuna lida otumohino. ⁷ Owahiti rahun katiyenak kunlo cik ati ida oyeniti tohi na lotenya icieng kode tohi na lotenya icieng to golun lo kweci. ⁸ Kiyen ohoi jimitan ojir cik kalitiyore tungani otoc. ⁹ Kiyen manyu ohoi kijo ida cik ara to cio kuna ijiri ati to kagilak kulo cik, katiremok, cio kuna lida owak Lobanga, kapalak, cio kuna lida onyuji, cio kuna loru ko dini, to cio kuna lifada monyeri ko ngotengeri, to kasasuok ¹⁰ to cio kulo lomuna, kayiak, cio katilotok kulo cio kulakude ko katalerok ko cio kuna litiyo ticitici kuna lokoraru ¹¹ ko kitiyena na ibir na lara layomit na ijir lo Loabanga lo deyo na lohicio nan. ¹² Akwama nan Kristo Yesu Lahitok niyang na lohicio nan golun, na lodeu kiruk nei manyu kinyumu nan kirwaa inyi. ¹³ Kileng afa lara nan kamoroni lo Lobanga ko katigemani ko kasasuoni olotu kitotorohi nan kibaya tonyio atiyo afa nan to lunya ko rujon lo kiruk. ¹⁴ Kijuhohini nan kisa lo Lahitok niyang rief ara Lobito ko kiruk ko kimaruno na longon iyo Kristo Yesu. ¹⁵ Tenya ene na locam to ningo otoc ojo olotu Kristo Yesu kof lwaha kapalak na lara nan lalany fad. ¹⁶ Ati tona tenya bito, kitotorohini nan kibaya ojir to nan kapalani na lalany fad, itotoru Kristo Yesu kidonyo lo tau nenge ara kitotorita iyo cio kuna liruk iyo inyi ojir orumu warun na losio tur. ¹⁷ Jijia diho Kabu na losio na lida owei, na lida oboto, Lobanga Lobito hilong, ingohi rima, kwatun ko deyo tongon karihin ko karihin Amen. ¹⁸ Timoti kito nei ahicio nan isi ene kisinga ara na lilihita ko imociti kulafa lotenyi tosi ojir to kijifita icieng irem rem na ijir, ¹⁹ iniefita kiruk ko kibuha na ijir. Lingohi kude ene oto itiworori kiruk neicieng. ²⁰ Kiji neicieng ongon Aimeneus ko Aleksanda kuna lacio nan iyo sitan ojir itiyeni rohojun lo moro Lobanga.