¹ Ajara diya, nang atehu oicang ojingu thath’ahari nahittok. Owon h’omwaraha tomon karik ahosi ccofa. Dihide h’omwaraha owoni alohuluhi tomon; dihide h’ahu aboithe, owon h’afure lomoryo asang hadwa. ² Oicang latehu nang lya ojahitha ohwaru. Ojahitha ahejek hanyo hoibou loisuka d’amaji nelik, ara ahuthuk nanyong ajahitha n’oume. Ara oicang loyaa caa esarak donyong akolon, okara karik akolon nendafaitho nanyong. ³ Ojahitha owon ahu aboithe n’oicang hasongosong nethayeyo, ti, athuhi ethalihyo asongosong nya. Ofalanga ahap fodok, hothiforo inyong. ⁴ Amojo isong dang d’oicang loyaa caa lo, aca athuk esarahina akolon nanyong nendafaitho d’oibou. Isong dang amojo d’oibou ahibu isong ithabuho ajan, “Ngai ojahitha oibou?” karik,“Ngai ocohi eriborik inyong?” ⁵ Esarahini oicang ahuthuk nacama ocamitha h’ethadara karik omoritha h’asang hadwa. Ahorihini inyong thoithethemye akolon n’endafaitho d’oyefathik athomone arangwan larehai. ⁶ Ara oicang abucyo ahuthuk dimoryo Ojok, ofure, atabernakola nanyong karik ohothing hoisuka dihide. ⁷ Ahorihini oicang th’oremo h’ohothing h’Ojok hodwa, dingaterek isong. Esarahini dang inyong akolon nendafaitherek amukoko, ohothing, ahuthuk nacamai karik amiji. ⁸ Ohothing bukulung hoisuka dihap, omojoi de donyong, hokaang ofure igero ditha hamanini nesu, n’Oker lonya ongocye thoculwe h’ahap. ⁹ Lowon h’ehiyok thoithairye. ¹⁰ Ara eyarai othulo lobo difitha, thoilo difitha. Ara owak ottohori othulo lobo thodemi, thotohori thodemi. Oilonge lo l’angongyo nadiha karik eruhon n’ohothing hodwa h’Ojok. ¹¹ Thia nang atehu akadum nabo odohu thohop. Owon ho omuaraha arehai hotik dihu honyong iring nawonderek ho oker. Ti ochama iring namonyo iring ohinyang. ¹² Idefetho ohothing tha akolon dihandierek asang hawak akadum nahithemi. Iringak ohothing hesuka dihap di thahabuyo akadum nahithemi, inyong akadum naidek ayee ti nazuk asongosik elihan. ¹² Ethethemyo akolon n’endafaitho n’oicang ohoithemoni hibu inyong owon; esarak ahap h’ohothing homanya diya thomojoi doicang ohoithemoni, lathuk asongosong naang hoilik elihan lo. ¹³ Ehandyo asang hafalangai hako bebe. Ngonyena, esarak dang ahimang thoindu dihap thohide dihithemi h’ohothing. ¹⁴ Th’ethamijanitha, esarahini donyong akolon dimaji hoicang, ethatumyo ohothing hoisukai dihap, anyahi isong thoihuhumak dihide arijori n’oicang, lonya oromi th’odemi, ti, homojyo nya. ¹⁵ Ahorihini nya inyong thoihuthak aloyiri d’arijori n’oicang, doindu arijori icama, esarak ohothing head amojo thottohori. ¹⁶ Eringak dang ohothing fodok, hoko karik haang oko, hobara karik hoican, hoisuka iring owak isong karik ongacani, thongothohini ohoforo d’ahinang n’enget dia dihomong. ¹⁷ Ako nya bebe d’othulo loinyanga dia loithanyangyo, ara aang arijori n’oicang thonyong; ainyong bai? Ohifalai lowetha dimaji h’ofure lonyong. ¹⁸ Ilongo ne elofioro. Ara lotek arami ho moithe, thothemye ainyong ayiji n’oicang. Aca inyong ohifalai l’eheryerek othulo. Ohifalai lo, inyong lo 666.