¹ Otehunu nya ethamijani nahittok dihide: Athulo nangorwo imuho th’oholong, oyefa tholohop h’ahejek hanyong karik alohuluk n’ohilyefi tomon larehai dihu honyong. ² Imoho nya inyong, ekor dithomone karik emalang athamana n’oitho. ³ Thiya, atehunu nya ethamijani nabo dihide: Otiha! Owon nya oicang odoru layaa caa, lowon h’ahosi cofa karik omwaraha tomon, karik awoni nya halohuluhi cofa dihu honyong. ⁴ Ofeyo nya alisang nanyong 1/3 n’ohilyefi hotho hide arwasak adihap dihap. Oicang layaa caa lya awetha dihiithemi h’athulo naindek athamana na; dara athuhon nanyong athamana ahani, inyong adiloro oitho lonyong. ⁵ Ayisu inyong na nya oitho lobusuha loindu de indafaitho amisok th’ahinang ebindang. Afuni nya ikofaru oitho lonyong d’Ojok, ethswonik dikara honyong. ⁶ Athulo nangorwo na, angero dihidyefo, d’amaji nathuk Ojok ehuhumahina donyong, amijye donyong operok 1,260. ⁷ D’orii lya, awon nya ofere dihide. Mikaile h’anjelohio honyong ethariboyo oicang layaa caa lya; ara oicang layaa caa lya h’anjelohio honyong etharuhyo. ⁸ Ti, aang nya oco d’oicang layaa caa lya diteluna Mikaile. Ahani ne, aang nya amaji thohide donyong ho anjelohio honyong. ⁹ Oicang loyaa caa lya, amunu ahaboloni, nelongoi ara Omonyoroni dia Sitan, lethadwalyo ahap fodok, amirohini dihap ho anjelohio honyong bukulung. ¹⁰ Thiya nang ethairu omurut lohwat dihide,”Thene athuk ethalwahio, akolon, ohobye l’Ojok lohothai karik aindafaitho n’ahap no Kristo, ainduna. Aca ohoimangani l’olarok hohothai, lodwala thosong dihithemi h’Ojok th’afaning karikth’aharie, athuhi amirohina dihap. ¹¹ Atelu isong inyong th’ahotho th’Oker karik th’ocame tholonyahinerek atihanina arami hadiri h’Ojok, aca kabong isong hulo omuno esu nasong juk lwai diye. ¹² Th’ahani ne, omunothik, iye ahide karik ohothing fodok hoisuka ditha hosong. Ti, ara afuro dihap karik dihide h’ahari nahittok, anyo, athuk omonyoroni anden dihap dothai! Efong engere kwek kwek karik otek afithoro Omiru donyong tiibai. ¹³ Athuhon oicang loyaa caa lya atehan hijan amirohini inyong dihap, athiforo athulo nanya athamanu oitho lobusuha na. ¹⁴ Ti, esarahini td’athulo ne ewa arehai h’okobu lohittok dowarik inyong d’amaji nathuhi ehuhumahina inyong ditha h’ohidyefo. Amaji nya nyana nafwarik inyong indafaitherek th’oriihio olamarai th’amunu. ¹⁵ Amunu amithu ahari thohuthuk honyong iring owor, dowororo inyong adi. ¹⁶ Ti, ahap alwahu athulo ne. Ahap angayo ahuthuk nanyong, adiloro owor lonya obuhyo oicang loyaa caa lo thohuthuk honyonng. ¹⁷ Thiya oicang loyaa caa lya engere; alo iremorik ongerenyihio fodok h’athulo ne, ohothing hoiruk efahitha h’Ojok karik hoindafaitho arami hadiri ho Yesu.m ¹⁸ Thiya, oicang loyaa caa lya nya awetha dihide akujo, dihuthuk h’ahari nahittok.